Béchir Ben Yahmed washinze ikinyamakuru “Jeune Afrique” yatabarutse

Yanditswe na TUMUKUNDE GEORGINE

Ku ya 03-05-2021 saa 16:35:27

Béchir Ben Yahmed washinze ikinyamakuru “Jeune Afrique” cyamamaye cyane ku isi, yitabye Imana uyu munsi ku wa 3 Gicurasi 2021, afite imyaka 93 azize COVID-19.

Ni nyuma y’igihe kitari gito yari amaze arwariye mu bitaro bya Lariboisière biri i Paris mu Bufaransa, aho yabigiyemo mu mpera za Werurwe 2021.

Uyu mugabo yavutse ku wa 2 Mata 1928, muri Djerba mu Gihugu cya Tuniziya. Béchir Ben Yahmed ni umwe mu binjiye muri Guverinoma bwa mbere Tuniziya ikimara kubona ubwigenge, ku butegetsi bw’uwari Perezida w’iki gihugu icyo gihe Habib Bourguiba.

Yari Umunyamabanga wa Leta ushinzwe itangazamakuru n’itumanaho kuva mu 1956-1957.

Mu 1956 yashinze ikinyamakuru cyandika mu rurimi rw’Igifaransa gisoboka buri cyumweru yise “L’Action “, mu 1960 ashinga ikitwa Afrique Action nyuma kiza guhindura izina kitwa Jeune Afrique, cyamamaye cyane mu gutangaza inkuru zo ku mugabane w’Afurika.

Nkuko byatangajwe ku rubuga rw’iki kinyamakuru www.jeuneafrique.com, uyu mugabo wakoraga umwuga w’itangazamakuru akawujyanisha n’inshingano zo muri Guverinoma, mu 1962, yiyemeje kujya kwikorera ava muri Tuniziya ajya gukorera i Roma mu Butaliyani, na bwo ahava ajya muri Paris ari na ho iki kinyamakuru gifite ibiro.

Uko ibihe byagiye bihita ikinyamakuru ke cyagiye cyaguka kigira amashami, abyara icyitwa Jeune Afrique Media Group, harimo iryandika mu rurimi rw’Icyongereza (The Africa Report), ibirebana n’ubukungu (Jeune Afrique Business) na La Revue ryibanda ku makuru yo hirya no hino ku isi.
Gusa mu 2020, Jeune Afrique Media Group yagizweho ingaruka na COVID-19, aho yakuyeho imyanya 21 ku 134 yari ifite, itangira no gushaka uburyo bwo gushyira ingufu mu itangazamakuru ryo kuri “internet”.

Umwanditsi:

TUMUKUNDE GEORGINE

One Comment on “Béchir Ben Yahmed washinze ikinyamakuru “Jeune Afrique” yatabarutse”

  1. Uyumugabo yatanzumusanzu we mugutezimbere itangazamakuru no kumenyekanisha into kuruyu mugabane aruhukire mumahoro ninkinzu yibitabo ihiye Bwana Asher Yahmed .

Tanga Igitekerezo

Email yanyu ntigaragazwa ku rubuga. Amazina na Email ni ngombwa.