17°C , Partly cloudy | Kigali-Rwanda

Beach Volleyball: Ikipe  zo muri Amerika ni zo zegukanye Rubavu Open 2021  

Yanditswe na BUGINGO FIDELE

Ku ya 18-07-2021 saa 21:00:03
Amakipe atatu ya mbere muri buri cyiciro nyuma yo guhabwa ibihembo

Kuva taliki 13 kugeza 18 Nyakanga 2019 i Rubavu mu Ntara y’u Burengerazuba habereye irushanwa  ryo ku rwego rw’Isi mu mukino wa Volleyball ikinirwa ku mucanga “Beach Volleyball World Tour  Rubavu 2021”  .

Iri rushanwa “Rubavu Open 2021” riri ku rwego rwa kabiri “Star 2”  ryegukanwe n’ikipe zo muri Leta Zunze Ubumwe z’Amerika (USA) mu bagabo n’abagore.

Ikipe yegukanye umwanya wa mbere mu bagabo yari igizwe na Chaim Schalk ufatanya na  Theodore Brunner  aho batsinze ku mukino wa nyuma ikipe igizwe na  Chase Budinger na Troy Field amaseti 2-0 (25-23 na 21-15). Aya makipe yombi akaba ari  ayo muri USA.

Iyi kipe ya  Chaim Schalk  na Theodore Brunner  yageze ku mukino wa nyuma isezereye muri ½  ikipe ya Daniil Kuvichka  na  Anton Kislytsyn bo mu Burusiya   ku maseti 2-0 (21-19 na 21-15) naho  naho ikipe  ya  Chase Budinger na Troy Field  nayo isezerera ikipe ya  Aleksandr Kramarenko na Maksim Hudyakov  bo mu Burusiya  ku maseti 2-0 (21-19 na 21-15).

Mu guhatanira umwanya wa 3, ikipe ya Aleksandr Kramarenko na Maksim Hudyakov yatsinze iya Daniil Kuvichka  na  Anton Kislytsyn  amaseti 2-0 (21-11 na 21-15). Aya amakipe akaba ari ayo mu Burusiya.

Mu bagore, ikipe  ya Sara Hughes na Emily Day  bakomoka muri USA yegukanye umwanya wa mbere  itsinze ikipe ya Chantal Laboureur na Sarah Schulz  bakomoka mu Budage amaseti 2-1 (19-21, 21-13 na 16-14).

Iyi kipe ya  Sara Hughes na Emily Day  yageze ku mukino wa nyuma isezereye  muri ½  ikipe ya  Svenja Müller na Sarah Schneider  bakomoka mu Budage  ku maseti 2-0 (21-16 na 21-18) naho ikipe Chantal Laboureur na Sarah Schulz  bakomoka mu Budage isezerera ikipe ya  Valentyna Davidova na Diana Lunina  bakomoka muri Ukraine ku maseti 2-1 (23-25, 23-21 na 15-11).

Ikipe ya Svenja Müller na Sarah Schneider yegukanye umwanya wa gatatu itsinze  Valentyna Davidova na Diana Lunina (Ukraine) amaseti 2-0 (21-19  na 21-19).

Muri iri rushanwa, ikipe ya mbere mu byiciro byombi (Abagore n’abagabo) yahawe amadorali ibihumbi 4, iya kabiri ihabwa ibihumbi 3, iya gatatu ihabwa ibihumbi 2 naho iya 4 ihabwa 1400. Gusa muri iri rushanwa riri ku rwego rwa kabiri “Star 2” hahembwa amakipe 19. Kuva ku ikipe ya 5 kugeza 8 zihabwa  amadorali 1000 buri kipe. Kuva ku 9 kugeza kuri 16 ahabwa amadorali 800 buri kipe. Ikipe ya 17 na 18 zihabwa amadorali 600 naho ikipe ya 19 igahabwa  amadorali 500.

Amakipe y’u Rwanda yaviriyemo muri 1/8

Muri iri  rushanwa, u Rwanda rwari ruhagarariwe n’amakipe 4 harimo abiri mu kiciro cy’abagabo ahari ikipe igizwe na Ntagengwa Olivier  na Akumuntu Kavalo Patrick  mu gihe ikipe ya kabiri yari igizwe na Habanzintwari Fils  afatanyije na Mutabazi Yves. Mu bagore hari ikipe ya Nzayisenga Charlotte  na  Munezero Valentine ndetse n’ikipe ya Mukandayisenga Benita  na Musanabageni Claudine.

Ikipe Habanzintwari Fils  afatanyije na Mutabazi Yves mu bagabo  ndetse n’ikipe Mukandayisenga Benita  na Musanabageni Claudine  mu bagore zaviriyemo mu majonjora naho ikipe ya Ntagengwa Olivier  na Akumuntu Kavalo mu bagabo n’ikipe ya Nzayisenga Charlotte  na  Munezero Valentine mu bagore ziviramo muri 1/8.

Ntagengwa Olivier (1) na Akumuntu Kavalo Patrick (2)

Habanzintwari Fils (iburyo)  na Mutabazi Yves (ibumoso)

Nzayisenga Charlotte (iburyo)  na  Munezero Valentine (ibumoso)

Mukandayisenga Benita  na Musanabageni Claudine.

Iri rushanwa ryagomba kuba muri 2020  ariko kubera COVID-19 ryimurirwa uyu mwaka wa 2021  aho ryabaye hubahirizwa amabwiriza yo kwirinda ikwirakwira ry’iki cyorezo.  Amakipe   yitabiriye ndetse n’abandi bose bari bafite  imirimo muri iri rushanwa babaga ahantu hamwe aho babanje gupimwa COVID-19 ndetse buri munsi bagapimwe. Buri mukino uko warangiraga, ikibuga cyarasukurwaga  kigaterwamo imiti.

Muri rusange, iri rushanwa ryitabiriwe n’amakipe 59 ni ukuvuga abakinnyi 118 baturutse mu bihugu 25.

Iri rushanwa ryateguwe n’Ishyirahamwe ry’umukino wa Volleyball mu Rwanda “FRVB” ku bufatanye na Minisiteri ya Siporo  “MINISPORTS” hamwe n’abaterankunga n’abafatanyabikorwa batandukanye  barimo  Laboratwari y’u Rwanda y’ibimenyetso bya gihanga bikoreshwa mu butabera “Rwanda Forensic Laboratory (RFL)”, Ikigo cy’Igihugu Gishinzwe Ibibuga by’Indege (Rwanda Airports Company), Visit Rwanda, Komite Olempike y’u Rwanda,Kigali Arena, CAVB-Zone V, Canal +,  Amaco Paints na Forzza Bet.

Iyi ni inshuro ya kabiri irushanwa nk’iri ribereye mu Rwanda kuko muri Kanama 2019 iri rushanwa ryari ryabaye gusa ryari ku rwego rwa mbere “Star 1”.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.