Kigali-Rwanda

Mostly cloudy
18°C
 

Basketball: REG yatsinze  Patriots itwara igikombe cya gatatu muri uyu mwaka wa 2019

Yanditswe na Amani Claude

Ku ya Jun 1, 2019

REG BBC 70-53 Patriots BBC

REG BBC yegukanye igikombe cya 3 muri uyu mwaka w’imikino wa 2019 muri Basketball, ni nyuma y’uko yitwaye neza itsinda mukeba, Patriots BBC ku manota 70 kuri 53.

Uyu mukino wateguwe n’ishyirahamwe ry’umukino wa Basketball mu Rwanda “FERWABA” ku bufatanye na Sosiyete y’Itumanaho ya “MTN Rwanda” wabereye kuri Sitade Nto i Remera tariki 31 Gicurasi 2019.

REG BBC yaje mu mukino ubona ko biteguye kwihorera kuri Patriots BBC dore itari yarabashije kugira umukino n’umwe itsinda muri ibiri yabahuje muri shampiyona ya 2019, yatangiye neza itsinda agace ka mbere ku manota 22 kuri 12.

REG BBC yaje kungukira ku mvune ya Hagumintwari Steve ukinira Patriots BBC wasohotse mu kibuga agace ka mbere kagiye kurangira, yatsinze agace ka kabiri ku manota 19-11, amakipe yombi ajya kuruhuka REG BBC iri imbere ku manota 41 kuri 23.

Mu gice cya kabiri, Patriots BBC yari ifite abafana benshi yagerageje kugaruka mu mukino maze agace ka 3 karangira amakipe yombi anganya amanota 16-16, maze yongera gutsinda agace ka nyuma ku manota 14-13, gusa ntacyo byayimariye kuko yatsinzwe ku kinyuranyo cy’amanota 20 (70 kuri 53).

Mu mikino ibiri iheruka guhuza aya makipe yombi, Patriots BBC yitwaye neza itsinda REG BBC mu mikino yombi. Yatinze umukino ubanza wa shampiyona, amanota 82 kuri 78 naho umukino wo kwishyura, iyitsinda amanota 74 kuri 65.

REG BBC  nyuma yo gutsinda uyu mukino yashyikirizwa igikombe giherekejwe n’amafaranga y’u Rwanda miriyoni imwe.

Abakinnyi ba REG BBC bishimira igikombe bari bamaze kwegukana batsinze Patriots BBC