Basketball: REG BBC yateye intambwe iyiganisha ku mukino wa nyuma wa “Playoffs 2019”

Yanditswe na NKOMEJE GUILLAUME

Ku ya Jul 15, 2019

REG BBC 85-52 Espoir BBC

Patriots BBC 80-87 APR BBC

REG BBC 66-54 Espoir BBC

Patriots BBC 63-51 APR BBC

Ikipe ya REG BBC yateye intambwe iyiganisha ku mukino wa nyuma w’imikino y’irushanwa rya kamarampaka “Playoffs 2019″ rihuza amakipe yabaye ane ya mbere muri shampiyona y’abagabo mu  mwaka wa 2019.

Iyi kipe yabaye iya kabiri muri shampiyona n’amanota 30 yiyongereye aya mahirwe yo kugera ku mukino wa nyuma wa Playoffs 2019 ibikesha kwitwara neza itsinda Espoir BBC yaje ku mwanya wa 3 n’amanota 27 mu mikino ibiri ya ½ yombi yabaye mu mpera z’icyumweru gishize.

REG BBC itozwa na Ngwijuruvugo Richard Patrick yatsinze Espoir BBC itozwa na Mwiseneza Maxime mu mukino wa mbere amanota 85 kuri 52. Muri uwo mukino wabereye kuri Sitade Amahoro i Remera tariki 12 Nyakanga 2019, REG BBC yatsinze agace ka mbere ku manota 29-8, banganya agace ka kabiri ku manota 14-14, amakipe yombi ajya kuruhuka REG BBC iri imbere n’amanota 43 kuri 22.

REG BBC yagarutse mu gice cya kabiri nabwo iri hejuru ibasha no gutsinda Espoir BBC agace ka gatatu ku manota 28-17 ndetse itsinda agace ka nyuma (4), ku manota 14-13, isoza umukino ku kinyuranyo cy’amanota 33 (85-52).

Mu mukino wa kabiri, REG BBC yongeye gutsinda Espoir BBC amanota 66 kuri 54, wabereye kuri Sitade Amahoro i Remera tariki 13 Nyakanga 2019 (8-21, 23-7, 23-20 na 14-11).

REG BBC yabaye iya kabiri muri shampiyona y’umwaka ushize wa 2018, irasabwa gutsinda Espoir BBC mu mukino wa gatatu wa ½ uzabera kuri Sitade Amahoro i Remera, tariki 19 Nyakanga 2019.

Mu gihe Espoir BBC yaramuka itsinze uyu mukino wa 3 byaba ngombwa ko hazakinwa umukino wa 4 wazabera kuri Sitade Amahoro i Remera tariki 20 Nyakanga 2019.

Ku rundi ruhande, hagati ya Patriots BBC na APR BBC nta bwo birasobanuka kuko mu mikino ibiri yabahuje, buri kipe yabashije gutsinda umukino umwe. APR BBC ni yo yabanje itsinda umukino wa mbere ku manota 87 kuri 80, wabereye kuri Sitade Amahoro i Remera tariki 12 Nyakanga 2019.

Mu mukino wa kabiri wabereye kuri Sitade Amahoro i Remera tariki 13 Nyakanga 2019, Patriots BBC yigaranzuye APR BBC iyitsinda amanota 63 kuri 51. Biteganyijwe ko umukino wa 3 wa ½ uzabera kuri Sitade Amahoro i Remera, tariki 19 Nyakanga 2019.

Kugira ngo haboneke amakipe azagera ku mukino wa nyuma wa “Playoffs 2019”, agomba gutanguranwa gutsinda imikino 3 muri 5 igombwa gukinwa. Ikipe izaba iya mbere muri Playoffs 2019 ni yo izahita ihabwa igikombe cya shampiyona ya 2019.

Mu mwaka ushize wa 2018, Patriots BBC yisubije iki gikombe cya “Playoffs 2018”, yari yatwaye mu mwaka 2017 nyuma y’uko itsinze REG BBC imikino 3 kuri 1.

Shyaka Olivier ukinira REG BBC (ufite umupira) ahanganye na Kamilindi Olivier ukinira Espoir BBC mu mukino wabahuje