Kigali-Rwanda

Mostly cloudy
28°C
 

Basketball: REG BBC na APR BBC zegukanye igikombe k’irushanwa ryo kwibuka

Yanditswe na NKOMEJE GUILLAUME

Ku ya 22-05-2018 saa 08:58:54
Abakinnyi b'ikipe ya REG BBC bishimira igikombe k'irushanwa ryo kwibuka bari bamaze gutwara

Ikipe ya REG BBC mu bagabo na APR BBC mu bagore ni zo zegukanye igikombe k’irushanwa ryo kwibuka abari abakinnyi, abayobozi n’abakunzi b’umukino wa Basketball bazize Jenoside yakorewe Abatutsi mu 1994 “Genocide Memorial Tournament 2018”.

Abakinnyi b’ikipe ya REG BBC bishimira igikombe k’irushanwa ryo kwibuka bari bamaze gutwara

Iri rushanwa ngarukamwaka ryateguwe n’ishyirahamwe ry’umukino wa Basketball mu Rwanda “FERWABA” itewe inkunga na Safe Gas. Ryitabiriwe n’amikipe 14, arimo 9 y’abagabo n’atanu y’abagore. Iri rushanwa ryasojwe tariki 20 Gicurasi 2018  nyuma y’uko ryari ryatangiye tariki 11 Gicurasi 2018.

REG BBC yari yitabiriye iri rushanwa ku nshuro ya kabiri yegukanye iki gikombe itsinze APR BBC amanota 84 kuri 45. Muri uyu mukino, REG BBC yagaragaje ko iri ku rwego rwo hejuru ugereranyije na APR BBC kuko yatsinze uduce twose (30-15, 18-7, 18-13 na 16-10).

Patriots BBC yegukanye umwanya wa 3 muri iri rushanwa itsinze Espoir BBC ku manota 55 kuri 46 (13-8, 14-14, 15-12 na 13-12).  Iyi kipe ya Patriots BBC yegukanye igikombe cya shampiyona cya 2018 yari yasezerewe muri ½ na APR BBC naho Espoir BBC yari ifite iki gikombe yegukanye muri 2017 isezererwa na REG BBC.

Mu bagore, APR BBC yaje kwegukana igikombe cy’uyu mwaka wa 2018 nyuma y’uko itsinze imikino ibiri muri 3. Ibi kandi ikaba yari ibihuriyeho na IPRC-South BBC ariko harebwa umukino wabahuje kuko APR BBC yayitsinze amanota 70 kuri 63.

Mu bakanyujijeho muri uyu mukino, Patriot BBC yabaye iya mbere itsinze Espoir BBC ku mukino wa nyuma amanota 72 kuri 68.

REG BBC na APR BBC mu bagabo hamwe na APR BBC ndetse na IPRC-South BBC mu bagore ni yo makipe azitabira irushanwa ryo kwibuka mpuzamahanga rizatangira tariki 25 Gicurasi kugeza 27 Gicurasi 2018.

Mu bihembo byatanzwe, ikipe ya mbere mu byiciro byombi yahawe igikombe, giherekejwe na sheki y’amafaranga y’u Rwanda ibihumbi 500. Iya kabiri yahembwe ibihumbi 300.

Kami Kabange wa REG BBC yabaye umukinnyi mwiza w’iri rushanwa “MVP”, Munyaneza Eric wa APR BBC aba myugariro mwiza, naho uwatsinze amanota menshi aba Niyonkuru Pascal ukinira Espoir BBC.

Mu bagore, Urwibutso Nicole ukinira IPRC-South BBC ni we wabaye umukinnyi mwiza w’iri rushanwa, Sandra Kantore wa APR BBC aba uwatsinze amanota menshi naho myugariro mwiza aba Butera Hope w’ikipe y’igihugu U-18.

 

 

 

 

 

 

 

 

 

 

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.