Kigali-Rwanda

Mostly cloudy
21°C
 

Basketball: REG BBC irasabwa gutsinda umukino wa 3 igakomeza  ku mukino wa nyuma

Yanditswe na NKOMEJE GUILLAUME

Ku ya Jul 19, 2019

Uyu munsi

APR BBC-Patriots BBC  (Amahoro-19h00)

Espoir BBC-REG BBC  (Amahoro-21h00)

Mu mpera z’iki cyumweru harakomeza imikino ya ½ k’irushanwa rya kamarampaka “Playoffs 2019”, rihuza amakipe yabaye ane ya mbere muri shampiyona y’abagabo n’abagore y’uyu mwaka wa 2019.

Kuri uyu wa Gatanu tariki 19 Nyakanga 2019, ikipe ya REG BBC irahura na Espoir BBC mu mukino wa 3, ubere kuri Sitade Amahoro i Remera saa tatu z’ijoro (21h00).

Uyu mukino ufite byinshi usobanuye ku mpande z’aya makipe yombi, REG BBC yari yitwaye neza itsinda imikino ibiri yabahuje, irasabwa gutsinda kugira ngo biyihe amahirwe yo kugera ku mukino wa nyuma w’iri rushanwa.

Espoir BBC na yo iraza kuba ikora ibishoboka byose ngo irebe ko yabona insinzi yabo ya mbere yatuma idahita isezererwa muri iri rushanwa rya Playoffs hakiri kare.

Mu gihe Espoir BBC yaramuka itsinze uyu mukino wa 3, hazakinwa umukino wa 4 wazabera kuri Sitade Amahoro i Remera tariki 20 Nyakanga 2019 (17h00).

REG BBC yitwaye neza itsinda Espoir BBC mu mikino yombi yabahuje kuko yayitsinze umukino wa mbere ku manota 85 kuri 52. Mu mukino wa kabiri REG BBC yongeye gutsinda Espoir BBC amanota 66 kuri 54.

Uyu mukino wa REG BBC na Espoir BBC, uraza kuba wabanjirijwe n’umukino uribuhuze APR BBC na Patriots BBC (19h00). Aya makipe akaba yari yaratsindanye umukino umwe kuri umwe mu mikino ibiri imaze kubahuza.

Iyi mikino izakomeza ejo tariki 20 Nyakanga 2019, aho APR BBC izakina na Patriots BBC mu mukino wa 4 wa ½ muri Playoffs, ukazabera kuri Sitade Amahoro i Remera (21h00).

Mu bagore, ejo tariki 20 Nyakanga 2019, APR BBC izakina na IPRC Huye BBC (15h00) naho The Hoops BBC izakine n’ikipe y’Ubumwe BBC (19h00). Ni imikino yombi izabera kuri Sitade Amahoro i Remera.

The Hoops BBC na yo irasabwa gutsinda Ubumwe BBC muri uyu mukino wa 3 kugira ngo ihite igana ku mukino wa nyuma, kuko yari yabashije gutsinda imikino 2 iheruka kubahuza.

Mu gihe Ubumwe BBC batsinda uyu mukino wa 3, hazakinwa umukino wa 4 wazabera kuri Sitade Amahoro i Remera tariki 21 Nyakanga 2019 (11h00). Kuri uwo munsi kandi APR BBC izaba ihura na IPRC Huye BBC mu mukino wa 4 wa ½ uzabera kuri Sitade Amahoro i Remera saa saba z’amanywa (13h00).

Nkundwa Thierry ukinira Espoir BBC (ufite umupira) ahanganye na Engelbert Beleck Bell wa REG BBC mu mukino uheruka kubahuza