Kigali-Rwanda

Partly cloudy
19°C
 

Basketball: Patriots, REG BBC, APR BBC na IPRC Kigali zageze muri ½

Yanditswe na BUGINGO FIDELE

Ku ya 09-10-2021 saa 22:00:00

Patriots BBC 106-61 30 Plus BBC

REG BBC 81-53 Shoot 4 Stars

APR BBC 93-51 UGB

IPRC Kigali 88-77 IPRC Huye

Nyuma yo kwitwara neza mu mikino ya ¼ ya “Playoffs 2021”, ikipe ya Patriots BBC, REG BBC, APR BBC na IPRC Kigali zakomeje muri ½ cy’irangiza.

Iyi mikino ya ¼  yabaye kuri uyu wa  Gatandatu taliki 09 Ukwakira 2021 aho ikipe Patriots BBC yatsinze 30 Plus BBC amanota 106 kuri 61.  Ikipe ya Patriots BBC yatsinze   agace ka mbere ku manota 30 kuri 14, itsinda agace ka kabiri  amanota 18 kuri 15, itsinda agace ka 3 ku manota 29 kuri 18 inatsinda agace ka 4 ku manota 29 kuri 14.

Umukinnyi wa Patriots BBC, Ndayisaba Ndizeye Dieudonne  ni we witwaye neza muri uyu mukino aho yatsinze amanota menshi (25) atanga imipira 5 yavuyemo amanota anafata imipira 10 itageze mu nkangara.

Ndayisaba Ndizeye Dieudonne ukinira Patriots BBC

Ikipe ya REG BBC yatsinze Shoot 4 Stars BBC amanota 81 kuri 53. REG BBC yatsinze agace ka mbere ku manota 18 kuri 9, itsinda aka kabiri 16-13, aka gatatu 24 kuri 16 inatsinda agace ka kane ku manota 23 kuri 15. Niyonkuru Pascal ukinira REG BBC ni we watsinze amanota menshi  (17).

Ikipe ya APR BBC nayo yitwaye neza ikomeza muri ½ nyuma yo gutsinda ikipe ya UGB amanota 93 kuri 51. APR BBC yatsinze bitayigoye uduce twose tw’uyu  mukino ku manota 26 kuri 7, 24-14, 19-10 na 24-20. Sangwe Armel ukinira ikipe ya APR BBC ni we witwaye neza aho yatsinze amanota  18.

Undi mukino wabaye, ikipe ya IPRC Kigali yitwaye neza itsinda IPRC Huye amanota 88 kuri 77 (23-17, 24-20, 19-15 na 22-25). Nyamwasa Bruno ukinira IPRC Kigali ni we witwaye neza muri uyu mukino aho yatsinze amanota 21.

Muri ½ , ikipe ya Patriots BBC izahura na APR BBC naho ikipe ya REG BBC ihure na IPRC Kigali. Ikipe izagera ku mukino wa nyuma ikaba isabwa gutsinda imikino ibiri.

Hagiye gukinwa imikino yo guhatanira imyanya

Kuri iki Cyumweru taliki 10 Ukwakira 2021 hateganyijwe imikino yo guhatanira imyanya (9-14) ku makipe atarashoboye gukina “Playoffs 2021”. Imikino iteganyijwe, ikipe ya UR Huye irakina na UR CMHS (11h00) mu guhatanira umwanya wa 13.

Ikipe IPRC Musanze irakina  na Espoir BBC (13h000) mu guhatanira umwanya wa 11  naho Tigers BBC ikine na Rusizi BBC (15h00) mu guhatanira umwanya wa 9. Iyi mikino yose igomba kubera muri Sitade Nto Amahoro i Remera.

Amakipe azakina “Playoffs 2021” mu bagore yamenyekanye

Mu cyiciro cy’abagore  amakipe yitabiriye shampiyona ni 6 aho yakinnye hagati yayo. Kuri uyu wa Gatandatu taliki 09 Ukwakira 2021,  hakinwe imikino ibiri  yatumye hamenyekana  uko amakipe azakina “Playoffs 2021” akurikiranye. Imikino yabaye,  The Hoops yatsinze  APR BBC  amanota 53 kuri 46 naho REG W BBC itsindira  IPRC Huye  iwayo amanota 76 kuri 54.

Ubwo The Hoops yakinaga na APR BBC
Ikipe ya REG W BBC ubwo yakinaga na IPRC Huye

Amakipe azakina “Playoffs 2021” ni  IPRC Huye (18), The Hoops (18), REG W BBC (17) na APR BBC (15). Amakipe abiri atashoboye gukomeza ni UR Huye (9) na GS Marie Reine Rwaza (9). Aya amakipe akaba agomba gukina umukino wa shampiyona utarakiniwe igihe taliki 16 Ukwakira 2021.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.