Kigali-Rwanda

Partly sunny
26°C
 

Basketball: Patriots irakira REG mu mukino wa nyuma ubanza muri “Playoffs 2018”

Yanditswe na NKOMEJE GUILLAUME

Ku ya Jul 20, 2018

Uyu munsi

Patriots BBC-REG BBC (Amahoro-20h00)

uyu munsi, tariki 20 Nyakanga 2018, ikipe ya Patriots BBC irakira REG BBC mu mukino wa nyuma ubanza wa “Playoffs 2018” ubere kuri Sitade Amahoro i Remera (20h00).

Shyaka Olivier ukinira REG BBC (ufite umupira) ahanganye na Hagumintwari Steven ukinira Patriots BBC mu mukino uheruka kubahuza

Uyu mukino utegerejwe n’abakunzi benshi b’umukino wa Basketball  bitewe n’uko aya makipe yombi amaze kugaragaza ko ari yo ahanganiye ibikombe bikinirwa imbere mu gihugu.

Patriots BBC ifite igikombe k’iri rushanwa riheruka yageze ku mukino wa nyuma isezereye IPRC Kigali muri ½ iyitsinze imikino 2-0 ndetse na REG BBC itozwa na Ngwijuruvugo Patrick isezereye APR BBC iyitsinze imikino 2-0.

Mu mukino uheruka guhuza aya makipe yombi, mu irushanwa ryo kwibuka mpuzamahanga, REG BBC yatsinze Patriots BBC ku mukino wa nyuma amanota 73 kuri 67.

Biteganyijwe ko Patriots BBC na REG BBC zigomba gutanguranwa gutsinda imikino itatu muri itanu, kugira ngo hamenyekane izegukana igikombe k’iri rushanwa. Mu mukino wa nyuma wa kabiri, REG BBC izakira Patriots BBC kuri Sitade Amahoro i Remera tariki 27 Nyakanga 2018 (21h00).

Mu guhatanira umwanya wa 3, ejo tariki 21 Nyakanga 2018, APR BBC izakira IPRC-Kigali BBC mu mukino wa mbere, uzabere ku kibuga cya Club Rafiki (16h00). Ni mu gihe ku cyumweru tariki 22 Nyakanga 2018, IPRC-Kigali BBC izakira APR BBC uzabere ku kibuga cya Club Rafiki (15h00).

Mu bagore, imikino y’iri rushanwa izatangira ku wa Gatandatu tariki 21 Nyakanga 2018, ikipe y’Ubumwe BBC yabaye iya kabiri muri shampiyona izahura na APR BBC yabaye iya 3, uzabere ku kibuga cya Club Rafiki i Nyamirambo (14h00).

Mu wundi mukino, IPRC-South BBC ifite igikombe cya shampiyona, izahura n’ikipe izaba iya kane izava hagati ya The Hoops n’ikipe y’igihugu y’abatarengeje imyaka 18, zo zifitanye umukino wo kwisobanura kuri uyu wa Gatanu.