20°C , Partly cloudy | Kigali-Rwanda

Basketball: Patriots BBC yongeye kwegukana igikombe cya “Legacy Tournament”

Yanditswe na BUGINGO FIDELE

Ku ya 11-11-2019 saa 09:02:30
Ikipe ya Patriots BBC yisubije igikombe k'irushanwa rya “Legacy Tournament” (Foto Delphin U.)

Ikipe ya Patriots BBC mu bagabo yegukanye igikombe k’irushanwa ngarukamwaka ry’Umurage muri Basketball “Legacy Tournament 2019” ryabaye kuva tariki 06 kugeza 09 Ugushyingo 2019.

Iri rushanwa ryateguwe n’ikipe ya United Generation Basketball (UGB) ku bufatanye n’ishyirahamwe ry’umukino wa Basketball mu Rwanda “FERWABA”, rigamije kwibuka Nyakwigendera Shampiyona Aimable na Nizeyimana Jean de Dieu bagize uruhare mu guteza imbere uyu mukino mu ishuri rya Lyceé de Kigali, bakanashinga ikipe ya UGB.

Patriots BBC yegukanye iki gikombe ku nshuro ya kabiri itsinze ku mukino wa nyuma ikipe ya REG BBC amanota 69 kuri 58, umukino wabereye muri Kigali Arena  tariki 09 Ugushyingo 2019. Wari  umukino wa 5 Patriots BBC itsinda REG BBC muri uyu mwaka. Ni umukino wa mbere umutoza Mwinuka Henry yari atoje nyuma yo gutangira gutoza iyi kipe REG BBC avuye muri Patriots BBC.

Muri iki kiciro hari hitabiriye 7 aho yari agabanyije mu matsinda 2. Itsinda A ryarimo Patriots BBC, APR BBC, IPRC Kigali na IPRC-Huye naho itsinda B ririmo REG BBC, UGB na Espoir BBC. Izi kipe zarakinnye hanyuma ikipe ya  mbere mu itsinda A (Patriots BBC) n’iya mbere mu itsinda B (REG BBC) zikina umukino wa nyuma.

Mu kiciro cy’abagore, ikipe ya IPRC Huye nayo yisubije iki gikombe ihigitse  izindi kipe ebyiri yari ihanganye nazo, The Hoops n’Ubumwe BBC. Ikipe ya IPRC  Huye yatsinze The Hoops amanota 69 kuri 55,  The Hoops itsinda Ubumwe BBC amanota 53 kuri 47 nyuma ikipe y’Ubumwe BBC itsinda IPRC Huye amanota 82 kuri 79. Kuko izi kipe zose zari zatsinze umukino harebwe iyatsinze amanota menshi, IPRC Huye ihita ifata umwanya wa mbere.

Ikipe yegukanye igikombe mu byiciro byombi yanahawe ibihumbi 500 by’amafaranga y’u Rwanda.

Mu bakiri bato “Juniors”, ikipe ya Elite Lakers ni yo yegukanye igikombe mu gihe mu bakanyujijeho iyabaye iya mbere ari  UGB.

Mu bihembo byatanzwe, Sagamba Sedar ukinira Patriots BBC ni we wabaye umukinnyi witwaye neza kurenza abandi mu kiciro cy’abagabo (MVP), mu bagore kegukanwe na  Nzaramba Cecile (IPRC-Huye) naho mu bakanyujijeho gihabwa  Gatete Andre (UGB).

Ubwo iri rushanwa ryabaga ku nshuro ya mbere muri 2018, Patriots BBC ni yo yegukanye  igikombe mu bagabo, IPRC Huye BBC irakegukana mu bagore  naho  UGB yegukanye iki gikombe mu bakanyujijeho.

Ikipe ya IPRC Huye mu bagore nyuma yo gushyikirizwa igikombe (Foto: Delphin U.)

Elite Lakers yegukanye igikombe mu kiciro k’ingimbi (Foto: Delphin U.)

Sagamba Sedar (Patriots BBC) wahawe igihembo cy’umukinnyi witwaye neza mu irushanwa (MVP) (Foto: Delphin U.)

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.