Kigali-Rwanda

Partly cloudy
18°C
 

Basketball: Patriots BBC yitwaye neza yongera gufata umwanya wa mbere

Yanditswe na NKOMEJE GUILLAUME

Ku ya Apr 23, 2019

Ikipe ya Patriots BBC yongeye kuyobora by’agateganyo urutonde rwa shampiyona ya Basketball “BK-Baskeball National League 2018-2019”  nyuma y’uko yitwaye neza itsinda imikino ibiri yakinnye mu mpera z’icyumweru gishize.

Mu mukino wahuje Patriots BBC na Rusizi BBC ku manota 84 kuri 37

Iyi kipe ifite igikombe cya shampiyona iheruka ya 2018 yari yerekeje mu Karere ka Huye aho yitwaye neza mu mukino wa mbere itsinda IPRC-Huye ku manota 71 kuri 58.

Kuri uyu mukino wo ku munsi wa 9 wo kwishyura wabaye tariki 20 Mata 2019, Patriots BBC nta bwo yatangiye neza kuko yatsinzwe agace ka mbere ku manota 21 kuri 14, itsinda aka kabiri kuri  24-08, itsindwa aka 3 kuri 16-13 mbere y’uko isoza itsinda agace ka nyuma (4) ku manota 21 kuri 13.

Patriots BBC yaje no kwerekeza i Rusizi, maze ibasha kubona insinzi ya kabiri nyuma yo gutsinda Rusizi BBC ku manota 84 kuri 37 hari mu mukino wo ku munsi wa 10 w’imikino yo kwishyura wabaye tariki 21 Mata 2019.

Iyi kipe yatangiye iri hejuru itsinda agace ka mbere ku manota 20-13, aka kabiri kuri 20- 06, aka 3 kuri 15-9 n’agace ka nyuma  ku manota 30-9.

Mu yindi mikino yabaye, APR BBC yatsinze UGB BBC amanota 70 kuri 63 naho REG BBC itsinda Espoir BBC ku manota 75 kuri 57, IPRC Kigali BBC itsinda Rusizi BBC amanota 68 kuri 58 ndetse IPRC Kigali BBC itsinda UR Huye BBC amanota 100 kuri 79.

Nyuma yo gutsinda iyi mikino ibiri, Patriots BBC yafashe umwanya wa mbere n’amanota 24 mu mikino 13, ikurikirwa na REG BBC n’amanota 23 mu mikino 12, hakaza Espoir BBC na IPRC Huye BBC na IPRC Kigali BBC zinganya 18, APR BBC na 17, UGB na 15, Rusizi BBC na 14 naho UR Huye ni iya nyuma (9) n’amanota 11.

Mu kiciro cy’abagore, shampiyona yari yakomeje hakinwa imikino yo kwishyura yo ku munsi wa 5 n’uwa 6 . IPRC Huye BBC yari mu rugo yaje gutsinda APR BBC amanota 85 kuri 53 ndetse APR BBC itsinda UR BBC amanota 53 kuri 35.

Kugeza ubu, IPRC Huye BBC irayoboye n’amanota 15 mu mikino 8, ikurikirwa na APR BBC  na 14 mu mikino 9, naho The  Hoops  Rwanda BBC  ni iya 3 n’amanota 13 mu mikino 7.