18°C , Mostly clear | Kigali-Rwanda

Basketball: Patriots BBC yatangiye umwiherero yitegura imikino y’Afurika

Yanditswe na Bugingo Fidèle

Ku ya 11-12-2019 saa 13:09:24
Ikipe ya Patriots BBC yatangiye umwiherero yitegura imikino y'Afurika

Kuva tariki 17 kugeza 22 Ukuboza 2019 muri Kigali Arena hazabera imikino y’amajonjora y’ikiciro cya kabiri yo gushaka amakipe 3 azakomeza mu kiciro cya nyuma k’irushanwa ry’amakipe yabaye aya mbere iwayo muri Afurika “Basketball Africa League”.

Iyi mikino izahuza amakipe 8 ari mu itsinda H rigizwe n’amakipe yo muri aka gace k’Afurika y’Uburasirazuba no hagati. Aya makipe yagabanyijwe mu matsinda abiri aho itsinda A rigizwe n’ikipe ya Patriots BBC (Rwanda), GNBC (Madagascar), UNZA Pacers (Zambia) na JKT BBC (Tanzania). Itsinda B rigizwe na City Oilers BBC (Uganda), Ferroviario de Maputo (Mozambique), Kenya Ports Authority (Kenya) na Cobra Sports (South Sudan).

Abakinnyi 14 batangiye umwiherero

Umutoza Mukuru w’ikipe ya Patriots BBC, Carey Francis Odhiambo n’umwungiriza we, Liz Mills bamaze guhitamo abakinnyi 14 ari na bo batangiye umwiherero. Aba bakinnyi bacumbitse muri Lebanon Hotel i Remera bakaba bakorera imyitozo muri Kigali Arena ahazabera irushanwa.

Aba bakinnyi ni Sagamba Sedar, Ndizeye Diedonne, Hagumintwali Steven, Ruzigande Ally, Gasana Kenneth, Mugabe Aristide, Kasongo Junior Aubin, Munyandamutsa Sanny, Ishimwe Didier, Makiadi Michael, Nijimbere Guibert, George Wilbert JR Blakeney, A’Darius Lamar Pegue na Mukama Jean Victor.

Mbere y’uko Patriots BBC ikina iri rushanwa ry’Afurika izakina imikino isoza irushanwa ribanziriza shampiyona “BK Preseason 2019-2020” aho ubu rigeze muri ½. Iyi kipe tariki 12 Ukuboza 2019 izakina na Espoir BBC (19h00) kuri Sitade Amahoro. Niramuka ikomeje izakina umukino wa nyuma tariki 13 Ukuboza 2019 n’ikipe izakomeza hagati ya APR BBC na REG BBC.

Patriots BBC izatangira ikina na JKT mu mikino y’Afurika

Ku munsi wa mbere w’iyi mikino y’Afurika, tariki 17 Ukuboza 2019 ikipe ya GNBC izakina na UNZA Pacers (12h30), Ferroviario de Maputo ikine na Cobra Sports (15h00), KPA ikine na City Oilers (17h30) mu gihe ikipe ya Patriots BBC izakina na JKT BBC (20h00).

Mu ijonjora ribanza izi kipe zari mu itsinda rimwe ryakiniye muri Tanzania aho ikipe ya Patriots BBC yasoreje ku mwaya wa mbere ikaba yaritwaye neza itsinda JKT BBC amanota 79 kuri 65.

Ku munsi wa kabiri w’iri rushanwa, tariki 18 Ukuboza 2019, Patriots BBC izakina na UNZA Pacers yo muri Zambia (20h00) naho umukino wa nyuma mu itsinda uzaba tariki 19 Ukuboza 2019, Patriots BBC ikine na GNBC yo muri Madagascar (20h0).

Tariki 20 Ukuboza 2019 ni ikiruhuko, hanyuma tariki 21 Ukuboza 2019 habe imikino ya ½ aho ikipe ya mbere mu itsinda A izahura n’ikipe ya kabiri mu itsinda B naho iya mbere mu itsinda B ihure n’iya kabiri mu itsinda A. Ku munsi wa nyuma w’irushanwa tariki 22 Ukuboza 2019, ikipe zatsinze zizakina umukino wa nyuma mu gihe izatsinzwe zizahatanira umwanya wa 3.

Nyuma y’iyi mikino amakipe yose uko ari 6 azaba abonetse kuko mu itsinda G ryakiniye muri Cameroun kuva tariki 26 Ugushyingo kugeza 01 Ukuboza 2019, amakipe 3 yabonye itike ari yo GSP yo muri Algeria, Police BBC yo muri Mali ndetse n’ikipe ya FAP yo muri Cameroun.

Aya makipe 6 aziyongeraho andi 6 yo mu bihugu bya Angola, Nigeria, Senegal, Tunisia, Misiri na Maroc yo atarakinnye imikino y’amajonjora hanyuma azakine imikino ya nyuma izatangira muri Werurwe 2020 isorezwe mu Rwanda muri Gicurasi 2020.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.