18°C , Mostly cloudy with showers | Kigali-Rwanda

Basketball: Patriots BBC  yamurikiye abakunzi  bayo muri Kigali  igikombe  yegukanye

Yanditswe na BUGINGO FIDELE

Ku ya 29-09-2019 saa 10:56:10
Abakinnyi ba Patriots BBC ubwo batambagizaga igikombe begukanye mu mujyi wa Kigali

Nyuma yo kwegukana igikombe cya shampiyona ya 2018-2019, ikipe ya Patriots BBC, tariki 28 Nzeri 2019 yatambagije mu mujyi wa Kigali iki gikombe yegukanye ikereka abakunzi bayo bayibaye inyuma mu mwaka wose w’imikino.

Iyi kipe yegukanye iki gikombe tariki 21 Nzeri 2019  aho yatsinze REG BBC imikino 4-3 aho umukino wa nyuma Patriots BBC yatsinze REG BBC amanota 65 kuri 59.

Abakinnyi, abayobozi ndetse na bamwe mu bakunzi ba Patriots BBC bakoze urugendo rwo kwishimira igikombe bari mu modoka yabugenewe isanzwe ifasha ba mukerarugendo gutembera   bareba ibice bimwe na bimwe bigize umujyi wa Kigali.

Uru rugendo rwatangiriye  kuri Golf-Nyarutarama bakomereza  RDB-Sitade Amahoro-KIE baragaruka Chez Lando-RDB bakomereza Kacyiru banyura kuri Ambasade y’Amerika mu Rwanda bakomereza Kimicanga-mu Mujyi- Sitade Nyamirambo-Nyabugogo nyuma basoreza ku Ruyenzi ari naho biyakiriye.

Visi Perezida w’ikipe ya  Patriots BBC, Nzaramba Thiery  avuga uburyo bateguye iki gikorwa yagize ati : «Nyuma yo kwishima n’ibikerezo biraza. Hari hashize icyumweru twegukanye igikombe nyuma twarahuye nka 2 kugira ngo dutegure iki gikorwa mu gihe gito   gishoboka kuko tugomba gukomeza ibindi bikorwa ubu akazi ni bwo gakomeye.”

Yavuze ko ukurikije igihe gito bateguye iki gikorwa bishimiye uko cyagenze kuko aho banyuraga hose bahasangaga abakunzi babo. Ati “Byatweretse ko badushyigikiye.”

Kapiteni w’iyi kipe ya Patriots BBC, Mugabe Aristide yatangaje ko bateguye iki gikorwa ngo bashimire abakunzi babo babaye hafi. Yakomeje avuga Patriots BBC yaje kugira ngo ihindure byinshi  kuko ibi bitakorwaga.

Ati : “ Ati hari abumva ko bisaba amafaranga y’umurengerango kugira ngo igikorwa nk’iki kibe kandi urebye ni imyumvire,  twateguye iki gikorwa ngo twishimire igikombe ubundi dusangire n’abanyamuryango ndetse n’abakunzi bacu.”

Patriots BBC igiye gutangira kwitegura imikino y’Afurika

Guhera kuri uyu wa Mbere tariki 30 Nzeri 2019, ikipe ya Patriots BBC iratangira imyiteguro y’imikino y’Afurika  “NBA & FIBA Basketball Africa League 2019-2020”  izatangira mu kwezi gutaha k’Ukwakira 2019 ikazasorezwa mu Rwanda umwaka utaha wa 2020.

Imikino y’amajonjora biteganyijwe ko izabera muri Tanzania kuva tariki 15 kugeza 20 Ukwakira 2019. Ikipe ya Patriots BBC izaba ihagarariye u Rwanda iri mu itsinda D  hamwe na  Hawassa BBC (Ethiopia), City Oil BBC (Uganda, JKT BBC (Tanzania) , Brave Hearts (Malawi) na Dynamo BBC (Burundi).

Visi Perezida wa Patriots BBC,  Nzaramba Thierry atangaza ko bagomba kwitegura  bihagije n’ubwo umwanya ari muto.  Avuga ko ubu bari muri gahunda yo gushaka abandi bakinnyi bakongeramo  kuko  bari baranabitekereje na mbere y’uko begukana igikombe kuko babonaga bishoboka.

Mugabe Aristide, kapiteni wa Patriots BBC we avuga ko   iyi mikino izaba iri ku rwego rwo hejuru ariko ko bafite intego yo kwitwara neza muri iyi mikino bagiye kubanzamo  kuko amakipe bazahura amenshi bayazi neza. Yavuze ko bagize amahirwe yo gusoza neza batsinda ko bifuza gukomerezaho ku buryo bazaza mu makipe 8.

Ikipe ya Patriots BBC imaze kwegukana ibikombe 3 bya shampiyona (2016,2018 na 2019) n’ibikombe 3 bya Playoffs  (2017,2018 na 2019).

Foto: Muzogeye Plaisir

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.