20°C , Intermittent clouds | Kigali-Rwanda

Basketball: Patriots BBC iri mu itsinda D mu mikino y’Afurika

Yanditswe na BUGINGO FIDELE

Ku ya 27-09-2019 saa 09:32:15
Patriots BBC iri mu itsinda D mu mikino y'Afurika

Ikipe ya Patriots BBC nyuma yo kwegukana  shampiyona ya Basketball  ya 2018-2020 igomba guserukira u Rwanda mu mikino y’Afurika  aho igiye gukinwa mu buryo bushya.

Iyi mikino y’Afurika “NBA & FIBA Basketball Africa League 2019-2020”  izatangira mu kwezi gutaha k’Ukwakira 2019 aho imikino y’amajonjora  izakinirwa mu bice bitandukanye.

Ikipe ya Patriots BBC ihagarariye u Rwanda iri mu itsinda D hamwe na  Hawassa BBC yo muri Ethiopia, City Oil BBC yo muri Uganda, JKT BBC yo muri Tanzania, Brave Hearts yo muri Malawi na Dynamo BBC y’i Burundi. Biteganyijwe ko imikino y’amajonjora izabera i Dar Es Salam muri Tanzania kuva tariki 15 kugeza 20 Ukwakira 2019.

Uko andi matsinda ateye

Mu itsinda A GSP (Algéria), Al Naser yo muri Libya, AS Police yo muri Mali na SLAC yo muri Guinée. Imikino izabera Bamako  muri Mali tariki 22 kugeza 27 Ukwakira 2019.

Itsinda B rigizwe na ABC (Côte d’Ivoire), ASPAC (Bénin), Braves (Ghana), AS Nigelec (Nigeria) na NPA Pythons yo muri Liberia.  Imikino biteganyijwe ko izaba tariki 29 Ukwakira kugeza 03 Ugushyingo 2019 gusa nta bwo heremezwa aho iyi mikino izabera.

Mu itsinda C harimo  FAP (Cameroun), Les Abeilles (Centrafrique), Manga (Gabon), Virgen Maria de Africa (Guinée Equatoriale) na ASB Mazembe  (RDC). Imikino izabera i Libreville muri Gabon kuva tariki 15 kugeza 20 Ukwakira 2019.

Mu itsinda E, imikino biteganyijwe ko izabera i Johannesburg muri Afurika y’Epfo  tariki 22 kugeza 27 Ukwakira 2019. Iri tsinda ririmo  Ferroviario Maputo (Mozambique), Jozi Nuggets (Afurika y’Epfo), Mercenaries (Zimbabwe), ikipe ihagarariye Zambia itaramenyekana, Dolphins (Botswana) na Lions Club yo muri Namibia.

Itsinda F ririmo KPA yo muri Kenya, GNBC yo muri Madagascar, Beau-Vallon Heat yo muri Mauritanie, ikipe iharagariye ibirwa bya Comores n’iy’ibirwa bya Seychelles zikaba zitaramenyekana. Imikino izabera Antananarivo muri Madagascar tariki 29 Ukwakira kugeza 03 Ugushyingo 2019.

Iyi mikino y’amajonjora izakinwa  hanyuma hazamuke amakipe 2 muri buri tsinda. Hanyuma akine imikino y’ikiciro cya kabiri  ku buryo hazasigara amakipe 6 aziyongeraho 6 yo atazakina imikino y’amajonjora akaba ari yo mu bihugu birimo  Angola, Nigeria, Senegal, Tunisia, Misiri na Maroc.

Biteganyijwe ko imikino izakomeza ibere mu migi itandukanye irimo Cairo (Misiri), Dakar (Sénégal), Lagos (Nigeria), Luanda (Angola), Rabat (Maroc) n’umwe hagati ya Monastir cyangwa Tunis (Tunisia).

Aya makipe uko ari 12 azakina irushanwa rya “The Basketball Africa League”, azashyirwa mu matsinda 2, amakipe atatu ya mbere mu buri tsinda (Super 6) azabona itike yo gukina imikino ya “Playoffs” azahura hagati yayo kugira ngo haboneke amakipe ane azakina irushanwa risoza  “BAL Final Four” rizabera i Kigali mu Rwanda muri  2020.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.