Basketball: Niyonshuti yahishuye icyatumye yerekeza muri Rusizi BBC

Yanditswe na NKOMEJE GUILLAUME

Ku ya 25-01-2018 saa 08:04:12

Niyonshuti Samuel bakunze kwita “Kazungu” ni umwe mu bakinnyi ngenderwaho mu ikipe y’Akarere ka Rusizi y’umukino wa Basketball mu bagabo “Rusizi BBC” muri shampiyona y’umwaka wa 2017-2018.

Niyonshuti Samuel utangaza ko yagiye muri Rusizi BBC kugira ngo abone umwanya uhagije wo gukina

Niyonshuti yageze muri Rusizi BBC muri uyu mwaka wa 2018 avuye muri Espoir BBC yari amazemo igihe kitari gito kuko yatangiye kuyikinira akiri muto kuva mu 2014.

Mu kiganiro yagiranye n’Imvaho Nshya, Niyonshuti Samuel yatangaje ko yahisemo gukinira Rusizi BBC kubera ko yari akeneye umwanya uhagije wo gukina kugira ngo yongere kuzamura urwego rwe rw’imikinire.

Avuga ko gukinira Rusizi BBC abona ariho akwiriye kuba bitewe nuko izamufasha kuba yazamuka bitandukanye na Espoir BBC ko ari ikipe imurusha izina. Ati Numvaga nshaka iminota yo gukina ihagije ku buryo urwego rwange rwongera rukazamuka. Urebye Espoir BBC ni ikipe ifite izina rikomeye kurusha Rusizi BBC, ariko kuri nge ni ikipe yo kuzamukiramo kuko igihe cyo gukina ni kinini ugereranyije no muri Espoir BBC”.

Niyonshuti Samuel wakiniye ikipe y’igihugu y’abatarengeje imyaka 18 (2015-2016) agaragaza ko kuva yagera muri Rusizi BBC asabwa gutanga umusaruro mwinshi ugereranyije nuko byari bimeze muri Espoir BBC. Ati Bitewe n’iminota nabonaga muri Espoir BBC, umusaruro nasabwaga ntabwo nawugereranya nuwo muri Rusizi BBC kuko umusaruro watanga wakinnye iminota 10 si wo watanga wakinnye 35 rero kuri nge muri Rusizi BBC nsabwa gutanga umusaruro mwinshi kuko mbona iminota ihagije yo gukina”.

Icyo atangaza ku kutitwara neza kwa Rusizi BBC

Niyonshuti Samuel atangaza ko we na bagenzi babo bajya mu mukino bashaka insinzi  kandi baba bafite n’ikizere cyo kuba batsinda gusa ko bagira ikibazo cyo kutabona umwanya uhagije wo gutegura umukino nk’ikipe. Ati Nk’uko bizwi ntawuza gukina adashaka insinzi, akenshi nge na bagenzi bange tuba twumva dufite ikizere ko buri mukino tugomba kuwutsinda ariko ikibazo mbona tugira tubonana gake ku buryo twakorera hamwe tugahuza umukino”.

Akomeza avuga ko ikindi kibagora ari uko nta bakinnyi b’abasimbura bagira bityo bagera mu minota ya nyuma y’umukino bakawutakaza kubera ko baba bananiwe. Ati Ikindi kitugora ni uko abakinnyi bo ku ntebe yacu badahagije, ni bwo usanga mu gace ka nyuma ari bwo badusiga kuko abakinnyi baba barushye”.

N’ubwo bimeze gutyo, Niyonshuti Samuel avuga ko iyo baganiriye n’ubuyobozi bw’ikipe ya Rusizi BBC kuri icyo kibazo bubaha ikizere cy’uko bazabashakira abandi bakinnyi nka babiri bazabafasha mu mikino yo kwishyura.

Iyi kipe ya Rusizi BBC ubu ni iyo ya nyuma ku rutonde   n’amanota 7 aho mu mikino 7 ibanza ya shampiyona nta mukino yabashije gutsinda.

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.