Kigali-Rwanda

Mostly cloudy
21°C
 

Basketball: Nigeria na Tunisia zabonye itike y’igikombe k’Isi u Rwanda rutakaza ikizere

Yanditswe na NKOMEJE GUILLAUME

Ku ya Sep 18, 2018

Kuva tariki 14 kugeza 16 Nzeri 2018, i Lagos muri Nigeria habereye imikino y’amajonjora y’ikiciro cya kabiri yo gushaka itike y’igikombe k’Isi “FIBA Basketball World Cup 2019 African Qualifiers” yasize Nigeria na Tunisia zibonye iyi tike naho ikipe y’u Rwanda itakaza ikizere.

Ikipe y’u Rwanda yasoreje ku mwanya wa 5 mu mikino y’amajonjora yo gushaka itike y’igikombe k’Isi

Iyi kipe y’igihugu itozwa na Vladimir Bosnjak ukomoka muri Serbie yatakaje iki kizere bitewe n’uko  itabashije kubona insinzi n’imwe mu mikino 3 yakinnye.

Yatangiye ikina na Senegal maze itsindwa amanota 94 kuri 89, tariki 14 Nzeri 2018. Yongeye gutsindwa na Cote d’Ivoire amanota 71 kuri 53, tariki 15 Nzeri 2018 naho isoza itsindwa  na Centrafrique amanota 68 kuri 61.

Ibi byatumye ikipe y’u Rwanda isoza iyi mikino iri ku mwanya wa 5 mu itsinda F, n’amanota 12, inyuma ya Nigeria ya mbere n’amanota 16, Senegal ya kabiri na 16, Centrafrique na Cote d’Ivoire zinganya amanota 13 naho Mali ni iya nyuma (6) na 12.

Iyi kipe y’u Rwanda irasabwa kuzakora ibishoboka byose ikaba yazitwara neza mu mikino y’ikindi kiciro yo muri iri tsinda “F” izaba kuva tariki 22 kugeza 24 Gashyatare 2019.

Ku rundi ruhande, mu itsinda rya mbere “E”, Tunisia yari mu rugo yarangije imikino iri ku mwanya wa mbere n’amanota 18, ikurikirwa na Angola na 15, Misiri na Cameroun zinganya amanota 14 naho Chad na Maroc zikanganya amanota 12.

Nyuma y’iyi mikino, Nigeria na Tunisia zabaye iza mbere muri buri tsinda zahise zikatisha itike yo kuzakina igikombe k’Isi “FIBA Basketball World Cup 2019” kizabera mu Bushinwa kuva tariki 31 Kanama kugeza tariki 15 Nzeri 2019.

Andi makipe 3 ategerejwe kuziyongera kuri ibi bihugu bibiri ni azasoza ari ku mwanya wa kabiri muri buri tsinda ndetse n’ikipe imwe yabaye iya gatatu yitwaye neza mu matsinda yombi.