17°C , Partly cloudy | Kigali-Rwanda

Basketball: Ikipe y’u Rwanda yasezerewe na Kenya mu gushaka itike y’imikino y’Afurika

Yanditswe na BUGINGO FIDELE

Ku ya 16-07-2021 saa 22:12:41
Ubwo ikipe y'u Rwanda yakinaga na Kenya mu mukino wa 1/2

Rwanda 52-79 Kenya

Misiri 99-65 South Sudan

 Taliki 17-07-2021

Umwanya wa gatatu

Rwanda-South Sudan (Arena-15h00)

Umukino wa nyuma

Misiri-Kenya (Arena-18h00)

Ikipe y’u Rwanda mu mukino wa Basketball  yasezerewe na Kenya muri ½  mu mikino  y’akarere ka 5 yo gushaka itike y’imikino ya nyuma y’Afurika mu bagore “FIBA Women’s Afrobasket 2021 Zone 5 Qualifiers”.

Iyi mikino irimo kubera mu Rwanda kuva taliki 12 Nyakanga 2021 yahuje amakipe 4 ari yo u Rwanda, Misiri, Kenya na South Sudan.

Amakipe yabanje gukina hagati yayo  aho ku munsi wa mbere ikipe y’u Rwanda yatsinze Kenya amanota 77 kuri 45, Misiri itsinda South Sudan amanota 95 kuri 65. Ku munsi wa kabiri, ikipe y’u Rwanda yatsinzwe na Misiri amanota 71 kuri 59 naho ku munsi wa gatatu, ikipe y’u Rwanda itsinda South Sudan amanota 65 kuri 52 mu gihe Misiri yatsinze Kenya amanota 107 ku 106.

Nyuma y’iyi mikino y’amajonjora, Misiri yazamutse iyoboye n’amanota 6 ikurikiwe n’u Rwanda n’amanota 5, Kenya n’amanota 4 naho ku mwnaya wa 4 hari ikipe ya South Sudan n’amanota 3. Uko byari biteganyijwe mu mikino ya ½, ikipe ya mbere yagombaga gukina n’iya 4 naho iya 2 igakina n’iya 3.

Kuri uyu wa Gatanu taliki 16 Nyakanga 2021 ni bwo hakinwe imikino ya ½ aho ikipe y’u Rwanda yakinnye na Kenya, umukino ukarangira ikipe ya Kenya itsinze u Rwanda ku manota 79 kuri 52.

Ikipe y’u Rwanda yari yatsinze Kenya mu mikino y’amajonjora amanota 77 kuri 45 yatangiye nabi kuko yatsinzwe uduce 3 tubanza, ku manota 25 kuri 11, 17 kuri 12 na 26 kuri 14. Agace ka nyuma ikipe y’u Rwanda yatsinze amanota 15 kuri 11 ya Kenya.

Misiri yageze ku mukino wa nyuma isezereye South Sudan

Undi mukino wa ½ , ikipe ya Misiri yatsinze South Sudan amanota 95 kuri 65. Mu mikino y’amajonjora  na bwo Misiri yari yatsinze South Sudan amanota 95 kuri 65.

 Kenya na Misiri ku mukino wa nyuma

Kuri uyu wa Gatandatu taliki 17 Nyakanga 2021 ni bwo hasozwa imikino y’akarere 5 hanamenyekane ikipe izaserukira aka karere mu mikino y’Afurika “FIBA Women’s Afrobasket 2021”.

Ikipe ya Misiri irakina na Kenya (18h00) gusa uyu mukino urabanzirizwa n’uwo guhatanira umwanya wa 3 ugomba guhuza ikipe y’u Rwanda na South Sudan (15h00). Imikino yombi irabera muri Kigali Arena.

Hagati y’ikipe ya Misiri na Kenya itsinda uyu mukino wa  nyuma ni yo izitabira imikino ya nyuma  y’Afurika mu bagore “FIBA Women’s AfroBasket 2021″ izabera muri Cameroun kuva taliki  17 kugera 26 Nzeri 2021.

Ikipe y’u Rwanda  yaherukaga kwitabira iyi mikino muri 2011 ubwo yaberaga muri  Mali. Iyi kipe kandi yitabiriye bwa mbere iyi mikino y’Afurika muri 2009 muri Madagascar. Muri izi nshuro 2, ikipe y’u Rwanda yasoreje ku mwanya wa 9.

Foto: FERWABA

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.