Kigali-Rwanda

Partly sunny
26°C
 

Basketball: Ikipe y’igihugu irakina na Mozambique mu mukino wa mbere wa gicuti

Yanditswe na NKOMEJE GUILLAUME

Ku ya Jun 23, 2018

Uyu munsi

Rwanda-Mozambique (Amahoro-18h00)

Ejo, tariki 24-06-2018

Rwanda – Mozambique (Amahoro-16h00)

Kuri uyu wa Gatandatu tariki 23 Kamena 2018, ikipe y’u Rwanda nkuru mu mukino wa Basketball irakina n’ikipe y’igihugu ya Mozambique mu mukino wa mbere wa gicuti uza kubera kuri Sitade Amahoro i Remera saa kumi n’ebyiri  (18h00).

Ikipe y’u Rwanda irakina na Mozambique mu mukino wa mbere wa gicuti yitegura imikino y’amajonjora y’igikombe k’Isi

Uyu mukino wa gicuti ukaba uri mu rwego rwo kwitegura imikino y’ikiciro cya kabiri igamije gushaka itike y’igikombe k’Isi “FIBA Basketball World Cup 2019 Qualifiers” izabera muri Nigeria kuva tariki 29 Kamena- 01 Nyakanga 2018.

Amakuru dukesha ishyirahamwe ry’umukino wa Basketball mu Rwanda “FERWABA” ni uko nyuma yo gukina uyu mukino, aya makipe yombi azongera guhura mu mukino wa kabiri wa gicuti uzaba ejo tariki 24 Kamena 2018, kuri Sitade Amahoro i Remera (16h00).

Mu kiganiro Imvaho Nshya iheruka kugirana na Mwiseneza Maxime, umutoza mukuru w’ikipe y’igihugu yatangaje ko gukina imikino ibiri ya gicuti na Mozambique  bizabafasha  muri byinshi birimo kumenya urwego abakinnyi be bariho mbere yo kwitabira iyi mikino.

Ikipe y’u Rwanda iri mu itsinda rya kabiri “B hamwe na  Nigeria, Mali na Uganda. Izatangira ikina na Mali tariki 29 Kamena 2018, ikurikizeho Nigeria tariki 30 Kamena 2018  izasoze ihura na Uganda tariki 01 Nyakanga 2018.

Mozambique na yo iri gukina iyi mikino y’amajonjora y’igikombe k’Isi, yageze mu Rwanda tariki 21 Kamena 2018, iri ku mwanya wa kabiri n’amanota 5 iyanganya na Senegal iyoboye itsinda rya kane D, hamwe na Central African Republic ya 3 ndetse na Cote d’Ivoire zinganya amanota 4.

Abakinnyi Mozambique yazanye mu Rwanda 

Hari Pio Matos, Orlando Novela, Ismael Nurmamad, Augusto Matos, Kendal Manuel, Ermelindo Novela, David Canivete,  Elvis Houane, Custodio Muchate, Octavio Magoliço, Helton Ubisse, Inelcio Chire, Dercio Mula, Iñaki Garcia, Milagre Macome na César Mujui.