Basketball: Gasana ari mu bitwaye neza mu mikino yo gushaka itike y’igikombe k’isi

Yanditswe na NKOMEJE GUILLAUME

Ku ya 02-03-2018 saa 08:10:34

Gasana Wilson Kenneth ukinira ikipe y’igihugu ya Basketball yagaragaye mu bakinnyi bitwaye neza mu mikino y’ikiciro kibanza k’imikino y’amajonjora yo gushaka itike y’igikombe k’isi FIBA Basketball World Cup 2019yabereye i Bamako muri Mali kuva tariki 23 kugeza 25 Gashyantare 2018.

Gasana Wilson Kenneth ukinira ikipe y’igihugu witwaye neza mu mikino yo gushaka itike y’igikombe k’isi

Imikino y’ikiciro kizakurikiraho izakinwa kuva tariki 28 Kamena kugeza 01 Nyakanga 2018. Iyi mikino iri mu rwego rwo gushaka itike y’igikombe k’isi izabera mu Bushinwa kuva tariki 31 Kanama kugeza 15 Nzeri 2019.

Ku rutonde rwashyizwe ahagaragara na “Africa Basket” ni uko Gasana usanzwe ukina muri Maroc yaje mu bakinnyi 15 bitwaye neza mu bakinnyi 163  bari bitabiriye iyi mikino.

Gasana yaje ku mwanya wa 14 aho yatsinze amanota 42 mu mikino 3 yakinnye. Harimo amanota 16 yatsinze mu mukino wa mbere ikipe y’u Rwanda yatsinzemo Mali amanota 74 kuri 70. Yongeye gutsinda amanota 10 mu mukino wa kabiri u Rwanda rwatsinzwemo amanota 108 kuri 53.

Uyu mukinnyi yaje gusoza iyi mikino atsinda amanota 16 mu mukino ikipe y’u Rwanda yatsinzwemo na Uganda amanota 79 kuri 63.

Kuri urwo rutonde, Robinson Odoch ukinira ikipe y’igihugu ya Uganda ni we uyoboye abandi aho yatsinze amanota 63 mu mikino 3 yakinnye, akaba akurikirwa na mugenzi we bakinana Jimmy Abram Enabu na 54.

Haza kandi Ikechukwu Diogu ukinira Nigeria wa 3 n’amanota 53, Destin Simon Damachoua (CAF)‎ na 52, Maxi Munanga Shamba (RDC)‎ na 50, Michael Koibe (Tchad )‎ na 48, Michael James Efevberha (Nigera)‎ n’amanota 47, Evariste Tolembo (RDC)‎  na 47, Helton Ubisse (Mozambique)‎ na 46, Mamadou Keita (Mali) na 30 mu mikino ibiri  Noe-Charles Abouo (Cote d’Ivoire ) na 44 mu mikino 3.

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.