22°C , Partly cloudy | Kigali-Rwanda

Basketball: FERWABA yabonye umuterankunga mu gihe k’imyaka 3

Yanditswe na NKOMEJE GUILLAUME

Ku ya 26-01-2018 saa 07:57:28
Ubwo Perezida wa FERWABA, Mugwiza Desire (ibumoso) n'umuyobozi wa Star Times, Jess Jing bashyiraga umukono ku masezerano

Ishyirahamwe ry’umukino wa Basketball mu Rwanda “FERWABA” igiye gukorana n’ikigo cy’ubucuruzi mu buryo bw’isakazamashusho “Star Times” nk’umuterankunga aho basinye amasezerano y’ubufatanye  y’imyaka 3.

Ubwo Perezida wa FERWABA, Mugwiza Desire (ibumoso) n’umuyobozi wa Star Times, Jess Jing bashyiraga umukono ku masezerano

Tariki 24 Mutarama 2017 ni bwo hasinywe amasezerano y’ubufatanye yashyizweho umukono na Perezida wa FERWABA, Mugwiza Desire ndetse n’umuyobozi wa Star Times, Jess Jing. Iki kigo kizajya gitanga miliyoni 25 z’amafaranga y’u Rwanda buri mwaka.

Perezida wa FERWABA, Mugwiza yatangaje ko aya masezerano bagiranye na Star Times azagira akamaro gakomeye ku makipe kubera ko azabongerera ubushobozi byagaragaraga ko ari buke. Ati Icya mbere ari buhindure ni ukubaka amakipe, nk’uko mwabibonye hafi 60 % (amafaranga) arajya mu makipe, ubwo ni ukuvuga ngo ni inkunga ije yongera ku bushobozi buke bari bafite”.

Nahimana Claude, ushinzwe guhuza ibikorwa bya Star Times n’izindi nzego yavuze ko bahisemo gukorana na FERWABA kubera ko Basketball ari umukino ukunzwe n’abatari bake nyuma y’umupira w’amaguru mu Rwanda bityo bifuza kujya bayereka Abanyarwanda binyuze kuri televiziyo.

Ati Twarebye undi mukino wa kabiri mu Rwanda witabirwa n’abantu benshi cyane ariko usa naho ukiri inyuma ho gato, turavuga tuti reka twegere FERWABA dutere inkunga, kugira ngo Abanyarwanda muri rusange babashe kubona Basketball binyuze ku mirongo twahurije hamwe ya Star Times”.

Aya masezerano avuga ko ikipe izajya yegukana shampiyona mu byiciro byombi izajya ihabwa miliyoni imwe n’igice, iya kabiri ihabwe miliyoni imwe ni mu gihe buri kipe ikina muri shampiyona (14), izahabwa miliyoni imwe kugira ngo yitegure ibikorwa byayo bitandukanye.

Ikindi Star Times izitirirwa shampiyona inahabwa uburenganzira bwo kuzajya yerekana imikino ya shampiyona, ibanziriza shampiyona “Pre-season”, ndetse n’iya kamarampaka “Play offs”.

Iyo gahunda yo kwerekana imikino izatangira muri Gashyantare 2018, gusa Star Times  iratangirana n’umukino uba kuri uyu munsi tariki 26 Mutarama 2018, hagati ya REG BBC na IPRC-Kigali BBC kuri Sitade Nto, i Remera (19h00).

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.