Kigali-Rwanda

Mostly cloudy
21°C
 

Basketball APR BBC yatsinze Patriots BBC bituma hazabaho umukino wa 5 wa “Playoffs 2019”

Yanditswe na NKOMEJE GUILLAUME

Ku ya Jul 22, 2019

Ikipe ya APR BBC na Patriots BBC zigomba gukina umukino wa 5 wa ½ w’irushanwa rya kamarampaka “Playoffs 2019” rihuza amakipe yabaye 4 ya mbere muri shampiyona nyuma y’uko banganyije imikino 2 kuri 2.

Mu mukino wa 4 wabereye kuri Sitade Amahoro i Remera, tariki 20 Nyakanga 2019, APR BBC yitwaye neza itsinda Patriots BBC ku manota 64 kuri 63.

APR BBC yari guhita isezererwa iyo itsindwa uyu mukino yatangiye neza itsinda agace ka mbere ku manota 18-17, n’aka kabiri kuri 22-14, amakipe yombi ajya kuruhuka APR BBC iri imbere n’amanota 40 kuri 31. Agace ka 3 karangira APR BBC yatsinzwe amanota 16-11 naho   aka 4  itsindwa 16-13.

Iyi kipe ya APR BBC ikaba kandi yari yatsinzwe na Patriots BBC mu mukino wa 3 ku manota 69 kuri 53 wari wabereye kuri Sitade Amahoro tariki 19 Nyakanga 2019.

Kugira ngo hamenyekane ikipe izakomeza ku mukino wa nyuma tariki 09 Kanama 2019 kuri Sitade Amahoro, APR BBC na Patriots BBC zizakina umukino wa 5.

Umutoza wa APR BBC, Nkusi Aime Karim avuga ko aka karuhuko kagiyemo kazamufasha gutegura abakinnyi mu buryo bw’imbaraga, tekinike no kubategura cyane mu mutwe kuko ni cyo kiba gikenewe muri iyi mikino ya Playoffs.

Asaba abakunzi b’ikipe ya APR BBC kuzaza ari benshi kubashyigikira kugira ngo bazarebe ko bagera ku mukino wa nyuma kuko ari ibintu bakumbuye.

Mugabe Aristide, kapiteni wa Patriots BBC atangaza ko gutakaza uyu mukino wa 4 byatewe n’uko batangiye nabi yizera ko aka gahe kazanyuramo bagiye kwitegura neza kuko umukino ukurikira bagomba kuwutsinda uko byagenda kose.

Ku rundi ruhande, REG BBC yamaze gukatisha itike yo kuzakina umukino wa nyuma wa “Playoffs 2019” nyuma yo  Espoir BBC mu mukino wa 3 amanota 79 kuri 58 wabereye kuri Sitade Amahoro tariki 19 Nyakanga 2019.

REG BBC igeze ku mukino wa nyuma wa “Playoffs” ku nshuro ya 3 yikurikiranya isezereye Espoir BBC muri ½ iyitsinze imikino 3-0.

Mu mikino ibiri yabanje, REG BBC yatsinze Espoir BBC amanota 85 kuri 52. Mu mukino wa kabiri REG BBC yongeye gutsinda Espoir BBC amanota 66 kuri 54.

Mu mwaka ushize wa 2018, Patriots BBC yisubije iki gikombe cya “Playoffs 2018”, yari yatwaye mu mwaka 2017 itsinze REG BBC ku mukino wa nyuma imikino 3 kuri 1.

Ishimwe Parfait, kapiteni w’ikipe ya APR BBC ni umwe mu bitwaye neza mu mukino wa 4 batsinzemo Patriots BBC