Kigali-Rwanda

Partly cloudy
18°C
 

Basketball: Abana 94 barimo  gutozwa n’abatoza bavuye muri Amerika

Yanditswe na BUGINGO FIDELE

Ku ya 27-07-2021 saa 19:07:39
Bamwe mu bakinnyi bitabiriye imyitozo barimo guhabwa amabwiriza n'abatoza

Ishyirahamwe  ry’umukino wa Basketball mu Rwanda “FERWABA” ku bufatanye na Minisiteri ya Siporo “MINISPORTS” ndetse n’umutoza wungirije w’ikipe  ya Sacramento Kings ibarizwa muri  Shampiyona ya Basketball muri Amerika (NBA), Rico Hines  bateguye ingando z’abana bakina Basketball  kugira ngo bahabwe imyitozo n’abatoza b’inzobere baturutse muri Amerika.

Uyu mwiherero watangiye taliki 19 Nyakanga 2021 muri Green Hills Academy i Nyarutarama  witabiriwe  n’abana 94  barimo abakobwa 44 n’abahungu 50 baturutse mu bice bitandukanye by’igihugu  bakaba bari mu byiciro bibiri by’imyaka, abaterengeje imyaka 14 n’abatarengeje imyaka 17.

Iyi myitozo ikaba igamije gutegura amakipe y’Igihugu y’abato mu gihe kiri imbere.

Abatoza baturutse muri Amerika basanzwe bakorana na  Rico Hines   ari nabo bari gutoza aba bana barimo Khaila Andrea, Jalon Wilson, Mike C, Keyla Snowden na Jerred Cook. Mbere yo gutangira imyitozo babanje guhugura abatoza b’abana ba hano mu Rwanda bagera kuri 23 ubu nabo bakaba  barimo gufatanya mu gutoza aba bana.

Abatoza baturutse muri Amerika akaba ari bo barimo gutoza abana

Ahishakiye Alexandre, Umuhuzabikorwa w’izi ngando z’abana atangaza ko   bagitangira  aba bana basanze hari abari barasubiye inyuma kubera kumara igihe badakina ariko kuri ubu bamaze gusubira ku rwego rwiza.

Akomeza avuga ko babanje kubareka ngo  bagarure imbaraga, bongere bamenye kudunda umupira bityo bameze banabigishe ibindi  by’ibanze bikenerwa mu gukina Basketball.

Umwe mu bana b’abakobwa  witabiriye iyi ngando akaba  asanzwe yiga muri Leta Zunze Ubumwe za Amerika atangaza ko afite inzozi zo kuzakinira ikipe y’Igihugu. Yanashimangiye ko aba batoza  barimo kubafasha  kumenya iby’ibanze mu gikina Basketball bikajyana no kongera imbaraga.

Perezida wa FERWABA, Mugwiza Desire atangaza  ko aba bana ari bo bazashingirwaho mu gutoranya abazakinira amakipe y’Igihugu y’abato mu marushanwa y’Afurika azaba mu minsi iri imbere.

Yagize ati : “ Mu minsi iri imbere hari amarushanwa mpuzamahanga  tuzitabira mu batarengeje imyaka 16 ni amahirwe rero kuko muri aba bana harimo abatarengeje imyaka 14.”

Mugwiza yanakomeje avuga ko hari n’amarushanwa y’abatarengeje imyaka 18 azaba umwaka utaha wa 2022 aho na bwo  bazatoranya muri aba bana.

Ati : “ Muri ayo marushanwa yose tuzajyamo tuzajya dutoranya  duhereye muri aba bana bagaragaje impano kurenza abandi.”

Umunyamabanga Uhoraho muri Minisiteri ya Siporo “MINISPORTS”, Shema Maboko Didier yashimangiye ko ubu bufatanye bugamije  kuzamura impano nyinshi z’abana bakina Basketball bagakomeza gukurikiranwa n’abatoza babihuguriwe kugira ngo bazavemo abakinnyi beza b’Ikipe y’Igihugu.

Umunyamabanga Uhoraho muri MINISPORTS, Shema Maboko Didier

Iyi myitozo biteganyijwe ko izasozwa  taliki 31 Nyakanga 2021 aho abana bazasubira iwabo.

Iyi myitozo kandi irimo kuba   hubahirizwa ingamba zo kwirinda COVID-19 aho abitabiriye bose babanje gupimwa ndetse na buri masaha 24 bakaba bapimwa.

Abatoza b’Abanyarwanda babanje guhugurwa

 

Imyitozo y’abana irakomeje

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.