Bagaragaje uruhare rw’akarima k’igikoni mu gutegura indyo yuzuye

Yanditswe na TUMUKUNDE GEORGINE

Ku ya 23-11-2020 saa 13:38:46

Abaturage bitabiriye guhinga imboga mu karima k’igikoni bavuga ko kari mu by’ingenzi bibafasha kurwanya imirire mibi, kuko ugafite abasha gutegura indyo yuzuye.

Inzego z’ubuzima zinagaragaza ko imboga zigasoromweho ako kanya zigatekwa hari umwihariko ziba zifite ugereranyije n’izahashywe mu isoko ziba zanambye.

Bamwe mu baturage bafite akarima k’igikoni bo mu Karere ka Bugesera baganiriye n’Imvaho Nshya, batanze ubuhamya bw’ibyiza byako.

Mukakayanja Anne Marie utuye mu Mudugudu wa Bishweshwe, Akagari ka Murama, mu Murenge wa Nyamata, yatangaje ko atajya abura akarima k’igikoni kuko yamenye akamaro gafite.

Ati: “Nk’ababyeyi, mu gutegura indyo yuzuye tuba tugomba kwifashisha imboga, mu rwego rwo kubona izo mboga dukora akarima k’igikoni tukajya tuzisoromaho ntizibure mu mafunguro bikaturindira abana imirire mibi. Imboga tuzi akamaro kazo”!

Yunzemo ati: “Inama naha bagenzi bange, ni uko mu ngamba bafata mu gutegura indyo yuzuye bagira akarima k’igikoni kuko karafasha cyane kuko ubona imboga hafi utagombye kujya kuzihaha”.

Nubwo muri kariya Karere hakunze kuvugwa ikibazo k’ibura ry’amazi cyane cyane mu gihe k’impeshyi, Mukakayanja avuga ko kuba azi akamaro k’imboga bituma agerageza kuzigama ayo kukavomerera kugira ngo hatazajya haba icyuho mu mafunguro ategura.

Akarima k’igikoni gafasha mu kurwanya imirire mibi

Afite aho ahinga imboga habiri, iyo hamwe hakenewe gusazurwa aba asoroma ahandi.

Mugenzi we Nyirarugendo Christine akaba ari n’Umujyanama w’Ubuzima mu Mudugudu wa Bishweshwe, avuga ko muri rusange imyumvire ku karima k’igikoni yazamutse kubera ubukangurambaga bukorwa.

Yagize ati: “Akarima k’igikoni kari mu bya mbere biturinda indwara zituruka ku mirire mibi, imboga zitari mu byo duteka byose nta cyo twaba dukora[…], twakoze itsinda ry’isuku n’isukura (Club), dufatanyije n’inzego z’umudugudu twubakira buri mu turage akarima k’igikoni ku buryo n’abandi babigiraho bakajya baza kudushaka tukabubakira, ubu benshi bamaze kumva akamaro kako”.

Akarima k’igikoni no mu migi karashoboka

Ari abatuye mu bice by’umugi cyangwa mu cyaro nta rwitwazo bakwiye kugira rwo kutakagira, kuko gashoboka ku butaka waba ufite bwose.

Bizumuremyi Jackson utuye mu Mudugudu w’Akanyinya, mu Kagari ka Nyagatovu, mu Murenge wa Mukarange mu Mujyi w’Akarere ka Kayonza, ni umukozi wa Leta, iyo avuye ku kazi ahitira aho yororera inkoko mu rugo iwe akagira n’umwanya wo kwita ku mboga yahinze mu karima k’ igikoni.

Yasobanuye impamvu yitabiriye gahunda y’akarima k’igikoni agira ati: “Nayitekereje mu rwego rwo kwigira no kwirinda kujya guhaha mu isoko ibyo nagakwiye kubona hafi yange, nkuko Leta ibidushishikariza nakoze akarima k’igikoni mu rwego rwo kurwanya imirire mibi”.

Hari bamwe bavuga ko kugira akarima k’igikoni mu migi bigoye bitewe n’uko batabona ubutaka bakubakaho kuko aba ari hato. Abo Bizumuremyi ntiyemeranya na bo kuko we avuga ko akanya kose wabona mu rugo ushobora kugahingamo imboga bigakunda.

Bizumuremyi Jackson anahinga imboga mu mifuka

Ni muri urwo rwego mu rugo iwe afite akarima azihingamo, akagira n’ubundi buryo bwo kuzihinga mu bikoresho bitagikoreshwa nk’amabase, imifuka…

Ati: “Imboga wakagombye kuba uzifite hafi mu rugo kuko ni bwo uba wizeye kubona iz’umwimerere”.

Umuturanyi we Mukandirima Josiane na we asanga buri wese yagira akarima k’igikoni kuko katagoye kandi kadatwara umwanya munini.

Umwihariko imboga zisoromwe ako kanya ziba zifite

Muhimpundu Christella ushinzwe imirire ku Kigo Nderabuzima cya Nyamirama, mu Karere ka Kayonza yagarutse ku kamaro k’akarima k’igikoni n’impamvu buri wese akwiye kukagira.

Yagize ati: “Akamaro ka mbere gafitiye umuryango cyangwa abana, ni uko ababyeyi babo bashobora kubategurira indyo yuzuye, ikindi ni uko gafasha ababyeyi kwizigamira amafaranga, ayo bakagombye kugura imboga bakayakoresha mu bindi bibafasha guhaha kugira ngo bategure iyo ndyo yuzuye”.

Yakomeje avuga ko imboga zinafite akamaro ko kurwanya indwara z’amaso kuko zibonekamo vitamini A ifasha mu gukumira ubuhumyi, zinarwanya indwara zirimo iz’uruhu z’ibiheri ahanini biterwa n’ibura ryazo.

Zibonekamo ubwoko bunyuranye bwa  vitamini A ituma abana bakura neza, ikabarinda kurwaragurika ndetse n’ubuhumyi.

Habonekamo umunyu w’ubutare (fer) utuma hatabaho ibura ry’amaraso mu mubiri, bityo umwana wabonye imboga mu ifunguro rya buri munsi aba arinzwe imirire mibi ndetse no kugwingira.

Muhimpundu yongeyeho ati: “Ikindi ni uko umubyeyi wifitiye akarima k’igikoni asaruraho imboga zigifite ubuziranenge, bitandukanye no kuba yajya kuzigura mu isoko aho zishobora kuba zaraye cyangwa zimazemo iminota runaka, zabitswe mu byuma bikonjesha (frigo) kuko haba hari ibyo zatakaje”.

Mukakayanja Anne Marie avugurura akarima k’igikoni

Iyo umuntu azisoromye agahita azitunganyiriza akaziteka, intungamubiri zose ziba zikirimo.

Uko akarima k’igikoni gakorwa

Hari ako mu bwoko bwa etaje, gakorwa hifashishijwe imambo, imifuka, ifumbire n’itaka risanzwe. Ugiye kukubaka ashinga imambo akora inziga eshatu nini rumwe ruzengurutse urundi, zikagenda zirutanwa hakurikijwe umubare w’imambo n’indeshyo yazo, zikazengurutswaho imifuka. Hagati y’izo nziga hashyirwa itaka n’ifumbire.

Hiyongeraho n’uruziga ruto imbere ruhumbikwamo umurama w’imboga zizagemurwa ahashyizwe itaka zimaze gukura.

Utabonye imifuka yo gukikiza imambo yakwifashisha ibindi bishobora kwegeranywa bigatangira itaka birimo imigwegwe, imigano, imitumba y’insina…

Abaturage bagaragaza ko utabashishije ako muri ubwo bwoko bitewe n’ubutaka afite ashobora guhinga imboga mu mifuka cyangwa ibikoresho bishaje bitagikoreshwa; nk’amabase, amapine y’imodoka n’ibindi, agapakiramo itaka akagenda ajombamo ingemwe z’imboga.

Mukandirima Josiane asanga no mu migi akarima k’igikoni gashoboka

Udafite ubutaka bunini ashobora guhinga imboga mu mifuka

 

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.