23°C , Mostly sunny | Kigali-Rwanda

B-Trey yasobanuye imigambi ye n’icyo yise ubujiji kuri Ni Muebue yitiriwe Bushali

Yanditswe na Imvaho Nshya

Ku ya 14-01-2020 saa 17:54:24
Umuhanzi B-Trey ubusanzwe witwa Muheto Bertrand

Muheto Betrand ukoresha mu buhanzi izina rya B-Trey  nyuma y’uko atandukanye n’inzu itunganya umuziki ya Green Ferry Music yamufashaga yavuze ko yashinze inzu ye itunganya umuziki  yitwa Ratio Music  ikorwamo n’utunganya indirimbo witwa Disal Rasta.

Muri iyo nzu kandi avuga ko bahaye amasezerano y’imikoranire umuhanzi witwa Trizzy.

Avuga ko kandi bafite itsinda ribakorera amashusho y’indirimbo ryitwa Climax Visual ikaba yaramaze kumukorera amashusho y’indirimbo ye yitwa “Impano ni ubuzima.”

Ku rundi ruhande gutandukana kwe na Green  Ferry yavuze ko ahanini byatewe n’uko yabonaga ibyo yari ayikeneyeho itabifitiye ubushobozi.

Ashimangira ko yiyemeje kwikorana na bagenzi be bandi ahitamo kureka gukorana na Green Ferry. Mbere yo gutandukana nabo kandi avuga hari amafaranga yari yaragiye akorera mu bitaramo bitandukanye  ahita yiyemeza gushinga inzu itunganya umuziki.

Nubwo kandi abenshi bari bazi ko yabaga mu itsinda rimwe n’abahanzi nka Bushali yavuze ko atari ko bimeze ngo ahubwo ni uko bahuriraga muri iyo nzu itunganya umuziki imikoranire ikabaho kubera iyo mpamvu.

Icyo umuntu yakwita gushwana kandi hagati ye na Bushali  avuga ko kwatewe cyane n’uko ingufu nyinshi bazishyira kuri Bushali kurusha uko abandi bahanzi bafashwa n’iyo nzu ya Green Ferry Music.

Impamvu  bikorwa uko B-Trey avuga ko ari uko Green Ferry ifite ubwoba  bw’uko Bushali aguye nayo yaba iguye burundu.

Gutandukana kwabo avuga ko kandi kwatewe ahanini n’uko hari abantu babagiye mu matwi barabashwanisha.

Nubwo  abantu bamenye cyane Bushali, B-Trey na Slum,  avuga ko abahanzi bari bahuriye muri Green Ferry bari 12 ubwo ngo hasigayemo 11.

Ariko nubwo ngo bari benshi uko,  4 na we arimo ngo  ni bo bagiraga amasezerano y’imikoranire.

Icyo yise ubujiji

Umuhanzi B-Trey avuga ko kuba indirimbo “Ni muebue” yaritiriwe Bushali ari ubujiji bukomeye cyane ngo kuko bayihuriyemo ari 3 we na Bushali ndetse na Slum Drip.

Abayobora Green Ferry avuga ko ari bo batumye  habako ko  indirimbo yitirirwa Bushali batangira kumubwira ko azajya ajya kuririmba iyo ndirimbo wenyine ahantu hatandukanye.

Avuga ko yakoze Alubumu ya mbere yitwa  “Nyamirambo”  avuga ko abantu bagiye bayumva binyuze ku mbuga nkoranyambaga zitandukanye.

Iyo Alubumu ye  avuga ko yari igizwe n’indirimbo 12. Avuga ko kandi yari yararimbweho n’abahanzi batandukanye bari batari bamenyekana.

Iyo Alubumu avuga ko atayikorewe yose na Green Ferry ngo kuko na we yajyaga ashoramo amafaranga ye.

Abatunganya indirimbo bakoze iyi Alubumu avuga ko batandukanye ngo ariko  harimo uwitwa Disal Rasta na Nganji.

Nubwo kandi aririmba mu njyana ya Trap avuga ko yatangiye ari umuraperi dore ko imizi ya Trap ari Hip Hop .

Avuga ko muri iyi minsi  afite indi Alubumu  yise 2040 aho avuga ko yayikoreye by’umwihariko abantu bavutse mu myaka ya 1990 ababwira ko icyo gihe cyazajya kugera barakataje mu iterambere ikerekezo gishya cy’igihugu cya 2050 kikazajya kugera  bageze ku rwego rushimishije cyane.

Mu 2040 kuri we kandi avuga ko ari icyerekezo cy’injyana ya Kinyatrap.

Yongeyeho ko kandi iyo Alubumu iriho ubutumwa butandukanye bw’uko abantu bakuru badakwiye kwiyumvisha ko abakora  iyo njyana banywa ibiyobyabwenge.

Iyo Alubumu avuga ko imaze nk’amezi abiri  ngo kandi iriho indirimbo z’urufatanye 2 iyo yakoranye n’umuhanzikazi Mariya Yohana ndetse n’abana baba mu kigo cy’ahazwi nko kwa Gisimba.

Indirimbo yakoranye n’umuhanzikazi Mariya Yohana  yitwa “Urwagasabo” naho iyo yakoranye nabo bana yo ngo yitwa “Ikinyabupfura”.

Agarutse ku kuntu bamenyekanye muri rusange yavuze ko  babifashijwemo n’urubyiruko bakuranye   rwabafashaga kumenyekanisha ibikorwa byabo.

B-Trey umaze gusohora Alubumu ebyiri mu gihe usanga abahanzi batandukanye batinya gusohora Alubumu yavuze ko  yabigiriwemo inama n’utunganya indirimbo witwa  Disal Rasta ngo kandi ibyo yakoze byose ntabwo yigeze ahomba ngo kuko indirimbo ze zicuruzwa mu buryo butandukanye hifashishijwe ikoranabuhanga ngo ariko kandi    Alubumu ya mbere yamuciriye inzira.

Umuhanzi B- Trey yaboneyeho umwanya wo gushimira itangazamakuru ngo kuko ryabazamuye muri rusange.

Zimwe mu ndirimbo afite kandi harimo iyitwa “Sindaza”, “Mu makorosi”, “Iryamukuru” “Impano ni ubuzima” yamaze gusohorera amashusho  kandi afite  n’izindi.

Umwanditsi:

Imvaho Nshya

One Comment on “B-Trey yasobanuye imigambi ye n’icyo yise ubujiji kuri Ni Muebue yitiriwe Bushali”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.