18°C , Partly cloudy | Kigali-Rwanda

Athletisme: RAF yashyirijwe ibikoresho byifashishwa mu gutoza byavuye mu Budage

Yanditswe na BUGINGO FIDELE

Ku ya 18-01-2020 saa 03:10:00
Ambasaderi w’u Budage mu Rwanda, Dr. Thomas Kurz nyuma yo gushyikiriza RAF ibikoresho byavuye mu Budage

Ambasaderi w’u Budage mu Rwanda, Dr. Thomas Kurz  tariki 17 Mutarama 2020 yasuye ishyirahamwe ry’imikino ngororamubiri mu Rwanda “RAF” abashyikiriza ibikoresho byifashishwa mu gutoza  byatanzwe na Komite Olempike y’u Budage.

Ibi bikoresho birimo ibibaho bibiri  bizajya byifashishwa n’abatoza mu gihe barimo gutanga imyitozo bibafashe bakurikirana uko  abakinnyi bakora imyitozo. Ibi bikoresho bikaba bikorerwa gusa mu gihugu cya Thailand.

Nyuma ku gushyikiriza RAF ibi bikoresho, Ambasaderi w’u Budage mu Rwanda, Dr. Thomas Kurz yavuze ko  bari bazaniye RAF ibi bikoresho  bizeye ko bizafasha cyane mu mitoreze.

Yakomeje avuga banaboneyeho kuganira  byinshi bijyanye n’urwego umukino ugezeho  ndetse n’imishinga migari yo gukomeza guteza imbere uyu mukino.

Perezida wa RAF, Mubiligi Fidele yavuze ko bishimiye uruzinduko rw’Ambasaderi w’u Budage mu Rwanda. Yakomeje avuga ko Komite Olempike y’u Budage umwaka ushize yabohereje umutoza Torsten Tesch ahugura abatoza  bagera kuri 19 ku kiciro cya mbere.

Ati : “Hari n’ibikoresho bari batugeye  bifasha  abatoza  gutanga imyitozo n’uburyo bwo kureba ko yakozwe neza ari byo twashyikirijwe uyu munsi.”

Mubiligi yavuze ko nk’abantu bakorana byari byiza ko Ambasaderi asura ishyirahamwe ry’imikino ngororamibiri kugira ngo amenye aho bakorera ndetse banamugezeho imishinga itandukanye bafite yo guteza imbere imikino ngororamubiri.

Perezida wa RAF yagarutse ku mushinga bafitanye  n’igihugu cy’u Budage  aho bafitanye ubufanye n’umujyi wa Trier aho mu mwaka ushize boherejeyo  abana 6 n’umutoza bakagenda bakitoza ndetse uyu mwaka muri Nyakanga  nabo bakaba bazohereza abana babo nabo bamare ibyumweru bibiri bitoreza mu Rwanda.

Aba bana bagiye mu Budage kuva tariki 15 kugeza 26 Kanama 2019 ni abakobwa 3 n’abahungu 3. Aba ni Niyonkuru Marthe, Uwitonze Claire, Niyonkuru Florence, Bakunzi Aime Phrodite, Habinshuti Alexis na Karangwa Kwame bakaba barajyanye n’umutoza Bizimana Manasse.

Mu bindi, Mubiligi yatangaje ko bafite gahunda yo gukomeza guhugura abatoza ndetse ko bafite n’umushinga mugari banagejeje kuri Ambasaderi wo kubaka ikigo k’imyitozo.  Ati: “Ibi byose kubikora no kubigeraho byagorana tudafite aho abakinnyi bitoreza hazima, hari ibyo  turimo dukorana na Minisiteri nibigera aho  bigera ni ho tuzaganira  n’Ambasaderi  kugira ngo turebe niba hari icyo twafatanya.”

Nyuma yo gusura  RAF, Ambasaderi w’u Budage mu Rwanda, Dr. Thomas Kurz yatambagijwe ibikorwa remezo bya siporo bibarizwa i Remera birimo Sitade Amahoro igiye kubugururwa mu minsi ya vuba. Yasuye kandi inzu y’imikino  n’imyidagaduro ya Kigali Arena yubatswe umwaka ushize wa 2019.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.