27°C , Partly sunny | Kigali-Rwanda

Athletisme: Muhitira yegukanye umwanya wa 22 muri shampiyona y’Isi

Yanditswe na Bugingo Fidèle

Ku ya 07-10-2019 saa 07:04:31
Muhitira Felicien wasoreje ku mwanya wa 22 muri shampiyona y'Isi 2019

Tariki 06 Ukwakira 2019 ni bwo i Doha muri Qatar hasojwe shampiyona y’Isi mu mikino ngororamubiri “IAAF World Athletics Championships 2019” yari yatangiye tariki 27 Nzeri 2019.

Muhitira Félicien, umwe mu bakinnyi baserukiye u Rwanda muri iyi mikino yegukanye umwanya wa 22 mu gusiganwa muri Marato (42,1km) mu kiciro cy’abagabo. Uyu mukinnyi yahatanye tariki 05 Ukwakira 2019 asoza akoresheje amasaha 2, iminota 16 n’amasegonda 21.

Muri iki kiciro, Lelisa Desisa ukomoka muri Ethiopia ni we wegukanye umwanya wa mbere aho yakoresheje amasaha 2, iminota 10 n’amasegonda 40. Yakurikiwe na Mosinet Geremew nawe ukomoka muri Ethiopia wakoresheje amasaha 2, iminota 10 n’amasegonda 44 mu gihe ku mwanya wa 3 haje Amos Kipruto ukomoka muri Kenya wakoresheje amasaha 2, iminota 10 n’amasegonda 51.

Mu bakinnyi 73 bitabiriye, 55 ni bo babashije gusoza mu gihe 18 batasoje isiganwa.

Muhitira yatangarije Imvaho Nshya ko shampiyona y’Isi iri ku rundi rwego. Gusa avuga ko n’ubwo yabashije gusoza isiganwa umwanya yasorejeho atari wo yifuzaga. Akomeza avuga ko ubu agiye kuruhuka nyuma akaba ari bwo azamenya gahunda y’irushanwa azongera kwitabira.

Kugira ngo Muhitira yitabire iyi shampiyona y’Isi ya 2019 ni uko yabashije kubona ibihe «Minima» bimwemerera nyuma yo kwitwara neza ubugira kabiri mu marushanwa atandukanye harimo “Asics Firenze Marathon 2018” ryabereye mu Butaliyani mu Gushyingo 2018 aho yegukanye umwanya wa 5 agakoresha amasaha 2, iminota 14 n’amasegonda 32.

Muri Mata 2019, Muhitira yitwaye neza muri “Roma International Marathon 2019” yabereye i Roma mu Butaliyani aho yegukanye umwanya wa 6 akoresheje amasaha 2 n’iminota 10 n’amasegonda 58 ari nabyo bihe byiza yakoresheje kugeza ubu. Ibi bihe bikaba byaratumye abona itike yo kuzitabira imikino Olempike izabera i Tokyo mu Buyapani umwaka utaha wa 2020.

Ibihe bisabwa akaba ari amasaha 2, iminota 11 n’amasegonda 30 mu bagabo naho mu bagore akaba ari amasaha 2, iminota 29 n’amasegonda 30. Ibi bivuze ko Muhitira afite itike mu bagabo mu gihe mu bagore nta mukinnyi w’u Rwanda urabasha kuyibona.

Muhitira ni inshuro ya kabiri yari yitabiriye shampiyona y’Isi akaba yaritabiriye bwa mbere muri 2015 ubwo yaberaga Beijing mu Bushinwa aho yasiganwe muri metero 5000 gusa yaviriyemo mu majonjora.

Undi mukinnyi waserukiye u Rwanda muri Marato, Mukandanga Clementine yakinnye tariki 27 Nzeri 2019 ariko ntiyabasha gusoza aho yavuyemo amaze gusiganwa kirometero 24.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.