Kigali-Rwanda

Mostly cloudy
20°C
 

Athletisme: Muhitira yegukanye isiganwa “Marvejols-Mende Half Marathon 2019”

Yanditswe na NKOMEJE GUILLAUME

Ku ya Jul 23, 2019

1.Muhitira Felicien 01h13’16”

2.Chepkorom Ezakiel 01h14’24”

3. Bett Bernard 01h14’52”

Muhitira Felicien ukina imikino ngororamubiri yo gusiganwa ku maguru yegukanye umudari wa zahabu mu isiganwa rya “Marvejols-Mende Half Marathon 2019” ryabereye mu gihugu cy’u Bufaransa tariki 21 Nyakanga 2019.

Iri siganwa ngarukamwaka rireshya n’ibilometero 22 na metero 400 ryabaga ku nshuro ya 47, ryitabiriwe n’abakinnyi bagera ku bihumbi 2 369, ni mu gihe abagera ku 1917 ari bo babashije gusoza.

Muhitira Felicien “Magare” yaje kwegukana umudari wa zahabu, nyuma yo kwitwara neza aba uwa mbere akoresheje isaha imwe n’iminota 13 n’amasegonda 16 (1h11’16”).

Uyu mukinnyi wegukanaga iri siganwa ku nshuro ya gatatu yikurikiranya nyuma y’uko yanaritwaye mu mwaka wa 2017 na 2018 yakurikiwe na Chepkorom Ezakiel ukomoka muri Uganda wakoresheje isaha imwe iminota 14 n’amasegonda 24 (01h14’24”) naho Bett Bernard ukomoka muri Kenya aba uwa 3 (01h14’52”).

Mu mwaka ushize wa 2018, ubwo iri siganwa ryaherukaga kuba ku nshuro ya 46, Muhitira yaje kuryegukana nyuma yo gusoza ari ku mwanya wa mbere akoresheje isaha imwe n’iminota 11 n’amasegonda 22 (1h11’22’’).

Muhitira akaba yahise yinjira mu mateka y’iri siganwa, aho abaye umukinnyi wa 3 ubashije kuryegukana kenshi (3), inyuma y’umufaransa Dominique Chauvelier n’inshuro 5 (1981, 1984, 1989, 1990 na 1993) ndetse na Luka Kanda ukomoka muri Kenya waritwaye inshuro 4 (2009, 2010, 2011 na 2014).

Aganira n’Imvaho Nshya, Muhitira Felicien yatangaje ko kongera gutwara iri siganwa yabyakiriye neza cyane. Avuga ko kwitwara neza muri iri siganwa abikesha kubasha kwihanganira ubushyuhe bakiniyeho, kubasha kumenya inzira banyuragamo no kumenya ukuntu ari bugere aho basoreza ari imbere.

Muhitira atangaza ko nyuma yo gutwara iri siganwa ateganya gukina isiganwa muri shampiyona y’u Butaliyani rizaba ku wa Gatanu tariki 26 Nyakanga 2019.

Avuga ko nyuma yo gukina iri siganwa azahita agaruka i Kigali,  ku ya 31 Nyakanga 2019, mu rwego rwo kwitegura irushanwa rya “Semi Marathon International de Brazzaville 2019” rizabera muri Congo Brazzaville, tariki 16 Kanama 2019.

Muhitira watwaye iri rushanwa rya Semi Marathon International de Brazzaville inshuro 2 ziheruka (2017 na 2018) atangaza ko azahita atangira umwiherero wa shampiyona y’Isi “World Athletics Championship 2019” izabera i Doha muri Qatar kuva tariki 27 Nzeri kugeza 6 Ukwakira 2019.

Ubwo Muhitira Felicien uzwi nka Magare yari amaze gusoza isiganwa ari ku mwanya wa mbere