Athletisme: Abakinnyi 9 ni bo bazaserukira u Rwanda mu mikino y’akarere ka 5

Yanditswe na BUGINGO FIDELE

Ku ya Mar 29, 2019

Nk’uko tubikesha ishyirahamwe ry’imikino ngororamubiri mu Rwanda “RAF”, abakinnyi 9 batarengeje imyaka 18 ni bo bazahagararira u Rwanda mu mikino y’akarere ka 5 mu kiciro cy’urubyiruko “ANOCA Zone 5 Youth Games 2019”, imikino izabera i Huye kuva tariki 02 kugeza 06 Mata 2019.

Aba bakinnyi ni Niyonkuru Marthe (100m/400m), Nzambazamariya Nadine (800m), Uwitonze Claire (1500m) na Niyonkuru Florence (3000m) mu bakobwa naho mu bahungu ni Karangwa Kwame (100m), Ishimwe David (400m), Habinshuti Alexis (800m), Bakunzi Aime Phrodite (1500m) na Uwimana Felix (5000m).

Niyonkuru Marthe, umwe mu bazaserukira u Rwanda mu mikino y’akarere ka 5

Aba bakinnyi b’u Rwanda bakaba bamaze iminsi bitegura ndetse bamwe banakinnye irushanwa ryabaye tariki 23 Werurwe 2019 ryari irushanwa ryo ku rwego rw’igihugu ryari rigamije gusuzuma ubushobozi bw’abakinnyi no kubongerera ubunararibonye mu rwego rwo kwitegura kuzahagararira igihugu mu marushanwa mpuzamahanga azaba mu 2019.

Muri iki kiciro, ibihugu bizahatana ni u Rwanda, Kenya, Tanzania, Burundi, Somalia, Eritrea, Uganda, Sudani y’Epfo, Ethiopia, Sudani na Misiri.

Iyi mikino twabibutsa ko yateguwe na Komite Olempike y’u Rwanda n’ihuriryo rya Komite Olempike mu bihugu bigize akarere ka 5 “ANOCA Zone 5” ku bufatanye na Minisiteri y’Umuco na Siporo mu Rwanda “MINISPOC”.