AS Kigali yegukanye igikombe cy’Amahoro 2019 itsinze Kiyovu

Yanditswe na BUGINGO FIDELE

Ku ya Jul 5, 2019

AS Kigali 2-1 Kiyovu

Ikipe ya AS Kigali  yitwaye neza yegukana igikombe cy’Amahoro 2019  itsinze ku mukino wa nyuma ikipe ya   Kiyovu ibitego 2-1.

Uyu mukino wabereye kuri Sitade ya Kigali i Nyamirambo tariki 04 Nyakanga 2019, Kiyovu ni yo yatangiye neza itsinda AS Kigali igitego cyabonetse  ku munota wa 39 w’igice cya mbere gitsinzwe na Rwabuhihi Aimee Placide.

Mu gice cya kabiri ikipe ya AS Kigali yahinduye umukino isatira cyane izamu rya Kiyovu maze  ku munota wa 54, Niyomugabo Jean Claude yishyura iki gitego. Izi kipe zombi zakomeje  gusatirana cyane buri yose ishaka igitego cya kabiri ngo yegukane igikombe gusa iminota 90 irangira nta gitego kindi kibonetse.

Nyuma yo gusoza iminota 90 izi kipe zinganya igitego 1-1 hitabajwe iminota 30 y’ingongera maze  ku munota wa 3 w’inyongera, Nsabimana Eric atsindira AS Kigali igitego cya 2 k’insinzi. Iminota 120 ikaba yararangiye, AS Kigali itsinze  ibitego 2-1.

Iyi kipe yegukanye igikombe cy’Amahoro ku nshuro ya gatatu nyuma y’icyo yegukanye muri 2001 ubwo yitwaga Les Citadins ndetse n’icyo yegukanye  muri 2013 ari nacyo yaherukaga ubwo yatsindaga ikipe ya AS Muhanga ibitego 3-0  ku mukino wa nyuma.

AS Kigali yegukanye iki gikombe ibikwiye kuko yaciye mu nzira igoye  dore ko yasezereye ikipe ya APR FC muri 1/8 nyuma inagera ku mukino wa nyuma isezereye ikipe ya Rayon Sports yegukanye igikombe cya shampiyona ya 2018-2019.

Iyi kipe ya Rayon Sports ikaba yaregukanye umwanya wa 3 itsinze Police FC ibitego 3-1.

AS Kigali mu bagore nayo yegukanye igikombe cy’Amahoro 2019

Bwa mbere habaye irushanwa ry’igikombe cy’Amahoro mu bagore, ikipe ya AS Kigali ni yo yegukanye igikombe itsinze ikipe ya  Scandinavia WFC  igitego 1-0, umukino nawo wabereye kuri Sitade ya Kigali i Nyamirambo. Umwanya wa 3 wegukanwe n’ikipe y’Inyemera itsinze ES Mutunda ibitego 4-1.

Nanone kandi bwa mbere habaye irushanwa ry’igikombe cy’Amahoro mu bakanyujijeho  aho ikipe ya ASC Wahad yegukanye igikombe itsinze  Karibu FC igitego 1-0 naho  ASC Intwari yegukana umwanya wa 3 itsinze Mulindi FC ibitego 3-0.

Amakipe yitwaye neza yahawe ibihembo

Mu bagabo, ikipe ya AS Kigali yahawe igikombe na sheki ya miriyoni 10, Kiyovu ihabwa miriyoni 3, Rayon Sports yegukanye umwanya wa 3 ihabwa miliyoni naho ikipe ya Police FC yabaye iya 3 ihabwa miriyoni 1.

Mu bagore ikipe ya AS Kigali yahabwe igikombe na sheki ya miriyoni 2, Scandinavia WFC  ihabwa miriyoni 1 naho ikipe ya 3, Inyerama WFC ihabwa ibihumbi 500.

Ikipe yegukanye igikombe cy’Amahoro ni yo ihagararira u Rwanda mu mikino y’Afurika y’amakipe yitwaye neza iwayo “Total CAF Confederation Cup”.  Ubu ikipe ya AS Kigali ni yo yahise ibona itike yo kuzahagararira u Rwanda muri iyi mikino y’Afurika  ya 2019-2019 izatangira muri Kanama 2019.

Abakinnyi n’abayobozi ba AS Kigali bishimira igikombe cy’Amahoro 2019