Kigali-Rwanda

Partly cloudy
19°C
 

AS Kigali yatsindiwe mu rugo na DCMP mu mikino y’Afurika

Yanditswe na BUGINGO FIDELE

Ku ya 17-10-2021 saa 18:00:00
AS Kigali yatsinzwe na DCMP mu mukino ubanza mu mikino y'Afurika

AS Kigali 1-2 DCMP

Taliki 24-10-2021

DCMP -AS Kigali (Kinshasa)

Ikipe ya AS Kigali ihagarariye u Rwanda mu mikino y’Afurika y’amakipe yitwaye neza iwayo  “ Total CAF Confederation Cup 2021-2022”   yatsindiwe mu rugo n’ikipe ya Darling Club Motema Pembe (DCMP) yo muri RDC mu mukino ubanza ibitego 2-1.

Muri uyu mukino wabereye kuri Sitade ya Kigali i Nyamirambo, ikipe ya DCMP ni yo yafunguye amazamu ku gitego cyatsinzwe na William Likuta Luezi ku munota 9. Iyi kipe  kandi yatsinze igitego cya kabiri ku munota wa 44 gitsinzwe na Katulondi Kati.

Mu gice cya kabiri, ikipe ya AS Kigali yagerageje  uburyo bwo kwishyura   aho umutoza Nshimiyimana Eric yakoze impinduka ashyira mu kibuga  Niyonzima Haruna asimbuye Buteera Andrew. Ku munota wa 62, AS Kigali yabonye igitego gitsinzwe na Kwizera Pierrot ku mupira w’umuterekano.

Ikipe ya AS Kigali yakomeje gukora izindi mpinduka aho umutoza  yashyize mu kibuga Biramahire Abeddy, Robert Saba na Ahoyikuye Jean Paul  basimbuye Aboubakar Lawal, Niyibizi Ramadhan na Rukundo Denis. Iminota 90 y’umukino yarangiye, DCMP yegukanye intsinzi  ku bitego 2-1.

Biteganyijwe ko umukino wo kwishyura uzabera i Kinshasa taliki 24 Ukwakira 2021. Ikipe ya AS Kigali ikaba isabwa gutsindira DCMP iwayo  ibitego 2-0 kugira ngo ikomeze mu cyiciro cya gatatu ari na cyo kibanzirira kujya mu matsinda.

Ikipe ya AS Kigali yageze muri iki cyiciro cya kabiri cy’imikino y’amajonjora  nyuma yo gusezerera Olympique de Missiri yo muri Comores ku bitego 8-1 mu mikino yombi. Ikipe ya DCMP yo kuko yitwaye neza mu mikino y’Afurika iheruka  nta bwo yakinnye imikino y’ijonjora rya mbere yahise ikomeza muri iki  cyiciro ari  cyo yatangiye neza itsinda AS Kigali.

Hagati ya AS Kigali na DCMP, ikipe izakomeza izajya mu cyiciro cya gatatu aho izahura n’ikipe izasezererwa  muri  “Total CAF Champions League 2021-2022”, ikipe itsinze ikomeze mu matsinda.

Abakinnyi babanje mu kibuga ku mpande zombi

AS Kigali: Ntwari Fiacre, Rukundo Denis (Ahoyikuye Jean Paul  ), Rurangwa Mossi, Bishira Latif , Ishimwe Christian, Buteera Andrew (Haruna Niyonzima), Shaban Hussein, Kakule Mugheni Fabrice, Kwizera Pierrot, Abubakar Lawal (Biramahire Abeddy) na Niyibizi Ramadhan (Saba Robert).

DCMP: Henock Kamalanduaka Kama, Henock Mangindula, Arianom Kasereka, Ikanga Kapela, Ikoyo Iyembe, Katulondi Kati, Christian Nsundi Landu, Mbomba Motu, Likuta Luezi, Kayembe Ndotoni  na  Karim Kimvuindi Ntikubuka.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.