AS Kigali na Kiyovu zirahatanira igikombe cy’Amahoro 2019

Yanditswe na BUGINGO FIDELE

Ku ya Jul 4, 2019

Tariki 04-07-2019

Scandinavia-AS Kigali (Nyamirambo-14h00)

AS Kigali-Kiyovu (Nyamirambo-16h00)

Kuri uyu wa Kane tariki 04 Nyakanga 2019 ni bwo hasozwa imikino y’igikombe cy’Amahoro 2019 mu kiciro cy’abagabo n’abagore.

Mu bagore, ikipe ya Scandinavia WFC   irakina na  AS Kigali, umukino ubere kuri Sitade ya Kigali i Nyamirambo saa munani (14h00). Muri iki kiciro akaba ari ubwa mbere  iri rushanwa ribaye.

Ikipe ya  Scandinavia WFC yageze ku mukino wa nyuma isezereye ES Mutunda muri ½ ku bitego 3-2  naho AS Kigali isezerera Inyemera WFC ku bitego 3-0.

Ikipe ya ES Mutunda na Inyemera WFC ejo hashize tariki 03 Nyakanga 2019 zahataniye umwanya wa 3, ikipe ya Inyemera WFC itsinda ES Mutunda ibitego 4-1.

Kiyovu  na AS Kigali  zishobora kwandika  amateka

Mu bagabo, umukino wa nyuma urahuza ikipe ya AS Kigali  na Kiyovu, umukino urabera kuri Sitade ya Kigali i Nyamirambo  saa kumi (16h00). Izi kipe zakoze akazi gakomeye.

AS Kigali yageze ku mukino wa nyuma isezereye Rayon Sports yegukanye igikombe cya shampiyona ya 2018-2019. Iyi kipe kandi yanyuze mu nzira itari yoroshye kuko muri 1/8 yari yasezereye ikipe ya APR FC.

Ku ruhande rw’ikipe ya Kiyovu yageze ku mukino wa nyuma isezereye ikipe ya Police FC yegukanye iki gikombe muri 2015. Iyi kipe ya Kiyovu  yasezereye Mukura ari nayo yari ifite igikombe giheruka muri 2018.

Ikipe ya Kiyovu yaherukaga ku mukino wa nyuma mu 1998  naho AS Kigali ikaba yaherukaga ku mukino wa nyuma  muri 2013 ubwo yanegukagana iki gikombe itsinze AS Muhanga.

Mu mikino iheruka guhuza izi kipe zombi muri shampiyona, Kiyovu yatsinze umukino ubanza igitego 1-0 naho mu mukino wo kwishyura AS Kigali nayo itsinda Kiyovu  igitego 1-0.

Mbere y’uyu mukino wa nyuma, ejo hashize tariki 03 Nyakanga 2019 habayeho umukino wo guhatanira umwanya wa 3 aho ikipe ya Rayon Sport yatsinze Police FC ibitego 3-1.

Nyuma y’imikino ya nyuma, izipe zitwaye neza  zirashyikirizwa ibihembo. Ikipe ya mbere mu bagabo   irahabwa igikombe na miriyoni 10 iya kabiri ihabwe miriyoni 3, iya 3 ihabwe 2 naho iya 4 ihabwe miriyoni 1.Mu bagore ikipe ya mbere irahabwa igikombe na miriyoni 5, iya kabiri ihabwe 3, iya gatatu ihabwe 2 naho iya 4 ihabwe miriyoni 1.

Ikipe ya Kiyovu na AS Kigali zishobora gukora amateka  yo kwivanga nyuma y’aho zatanze ubusabe mu mujyi wa Kigali.  Ubusanzwe, Kiyovu ifashwa n’akarere ka Nyarugenge naho AS Kigali igafashwa n’Umujyi wa Kigali. Mu mpera z’uku kwezi kwa Nyakanga 2019  akaba ari bwo hazamenyekana umwanzuro w’ubusabe bw’aya makipe.

Ikipe yegukanye igikombe cy’Amahoro ni yo ihagararira u Rwanda mu mikino y’Afurika y’amakipe yitwaye neza iwayo “Total CAF Confederation Cup”. Umwaka ushize wa 2018, Mukura ni yo yari yegukanye iki gikombe itsinze ku mukino wa nyuma Rayon Sports.

AS Kigali na Kiyovu zigiye guhatanira igikombe cy’Amahoro 2019 (Foto Ntare J.)