AS Kigali  irakira Rayon Sports mu mukino w’ikirarane

Yanditswe na BUGINGO FIDELE

Ku ya 30-05-2018 saa 07:24:09
Kwizera Pierrot ukinira Rayon Sports (23) arwanira umupira na myugariro wa AS Kigali Kayumba Soter ubwo izi kipe zanganyaga igitego 1-1 mu mukino wa shampiyona ubanza

Uyu munsi

AS Kigali-Rayon Sports (Nyamirambo-15h30)

Mukura-Etincelles FC (Huye-15h30)

Marines FC-Sunrise FC  (Rubavu-15h30)

Uyu munsi tariki  30 Gicurasi 2018 hateganyijwe imikino ya shampiyona  itarakiniwe igihe aho ikipe ya AS Kigali yakira Rayon Sports yegukanye igikombe cya shampiyona giheruka, Mukura ikakira Etincelles FC naho Marines FC ikakira Sunrise FC.

AS Kigali iheruka gutsinda Rayon Sports muri 2015

Ikipe ya AS Kigali ihagaze neza dore ko iri ku mwanya wa kabiri ku rutonde rwa shampiyona  n’amanota 48 gusa ifite imikino 2 y’ibirarane harimo n’uwo iza gukina na Rayon Sports. Ikipe ya Rayon Sports iri ku mwanya wa 4 n’amanota 40 n’imikino 4 y’ibirarane harimo n’uw’uyu munsi.

Kwizera Pierrot ukinira Rayon Sports (23) arwanira umupira na myugariro wa AS Kigali Kayumba Soter ubwo izi kipe zanganyaga igitego 1-1 mu mukino wa shampiyona ubanza

Izi kipe zikunze guhangana cyane  nta bwo uyu mukino  wazo uza kuba woroshye kuko AS Kigali irifuza kubona amanota 3 igasatira ikipe ya APR FC  mu rwego rwo gushaka igikombe cya shampiyona. Ku ruhande wa Rayon Sports gutakaza uyu mukino bizabagora gushyikira ikipe ya APR FC ndetse n’iyi AS Kigali kugira ngo babe bakwisubiza igikombe cya shampiyona.

AS Kigali n’ubwo ikunze kugora cyane Rayon Sports, mu nshuro 17 izi kipe zimaze guhura kuva muri 2009, Rayon Sports yabashije gutsinda inshuro 7 banganya 6, AS Kigali itsinda inshuro 4. Iyi kipe ya AS Kigali iheruka gutsinda Rayon Sports muri shampiyona ya 2015-2016, mu mukino wabaye tariki 23 Nzeri 2015 warangiye AS Kigali itsinze ibitego 2-1. Mu mukino wa shampiyona uheruka izi kipe zombi zanganyije igitego 1-1.

Ikipe ya AS Kigali irakina idafite Ngama Emmauel, Benedata Janvier na Nsabimana Eric wagize imvune ku mukino wa Kiyovu. Naho kuri Rayon Sports nta bwo, rutahizamu Shaban Hussein Tchabalala aza gukina uyu mukino nyuma y’uko yari yaragiye iwabo i Burundi.  Undi utaza gukina uyu mukino ni Mugabo Gabriel ndetse na Nahimana Shassir.

Indi mikino iteganyijwe

Ikipe ya Mukura imaze iminsi ititwara neza nyuma yo gutsindwa na Espoir FC  ibitego 2-0, irakira ikipe ya Etincelles FC. Kuri Mukura iri ku mwanya wa 11 n’amanota 25 n’imikino 2 y’ibirarane harimo n’uw’uyu munsi  naho Etincelles FC iri ku mwanya wa 6 n’amanota 35 n’imikino 2 y’ibirarane.

Undi mukino urahuza ikipe ya Marines FC na Sunrise FC.  Marines FC ikaba ishaka kwitara neza kugira ngo ive hafi y’amakipe abiri ya nyuma azasubira mu kiciro cya kabiri. Iyi kipe iri ku mwanya wa 14 n’amanota 23 n’imikino 4 y’ibirarane.

Mbere y’iyi mikino, APR FC ikomeje kuyobora urutode n’amanota 50 ikurikiwe na AS Kigali n’amanota 48, Kiyovu ikaza ku mwanya wa 3 n’amanota 41 naho ku mwanya wa nyuma wa 16  hari Miroplast FC  n’amanota 17.

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.