APRW BBC na REGW BBC zageze muri ¼ cy’Imikino Nyafurika

  • Imvaho Nshya
  • Ugushyingo 2, 2023
  • Hashize amezi 4
Image

REGW BBC yatsinze JKL Lady Dolphins yo muri Uganda amanota 66-65, APRW BBC itsindwa na Equity Bank yo muri Kenya amanota 63-56 mu Mikino Nyafurika ‘FIBA Africa Women Basketball League’, zombi zibona itike ya ¼.

Iyi mikino ya nyuma y’amatsinda yabaye kuri uyu wa Gatatu, tariki 1 Ugushyingo 2023 muri Lycée de Kigali.

Mu itsinda rya mbere APR WBBC na Equity Bank zahataniraga kuyobora iri tsinda.

Uyu mukino watangiye Ikipe y’Ingabo z’igihugu itsinda amanota menshi ibifashijwemo na Tetero Odile wari wazonze cyane iyi kipe yo muri Kenya.

Agace ka mbere karangira iyoboye umukino n’amanota 14 ku 9 ya Equity Bank.

Mu gace ka kabiri Iyi kipe yo muri Kenya yaje yashyizemo imbaraga nyinshi ibifashijwemo na Malu Irebu Grâce watsindaga amanota menshi, mu minota ya nyuma y’aka gace APR, WBBC yongeye kuyobora umukino maze karangira itsinze Equity Bank amanota 29-25.

Agace ka gatatu Equity Bank yatangiye itsinda amanota atatu ndetse no kugarira neza by’umwihariko abakinnyi bayo bari babashije kugarira neza Tetero wari wabagoye cyane.

Iyi kipe yo muri Kenya yatsinze amanota menshi izamura ikinyuranyo kigera mu manota arindwi.

Ni mu gihe Ikipe y’Ingabo yo byari byanze by’umwihariko ku bakinnyi bayo igenderaho nka Tetero wari wafashwe neza ndetse na Abigayle Jackson.

Agace ka Gatatu karangiye Equity Bank iyoboye umukino n’amanota 47 kuri 42 ya APR WBBC.

Agace ka nyuma karushijeho gukomera no kuryoha, APR WBBC yakuyemo ikinyuranyo cyose ndetse iyobora umukino.

Mu minota itanu ya nyuma yako Equity yongeye kuyobora umukino ibifashijwemo n’imbaraga z’umubiri z’abakinnyi bayo.

Iyi kipe yagumye imbere itemera ko ikinyuranyo cyayo gito kivamo. Habura amasegonda 25, Janai Crooms yabonye ‘lancerfranc’ ebyiri zagombaga gusubiza APR mu mukino ariko arazihusha.

Umukino warangiye Equity Bank yatsinze APRW BBC amanota 63-56 biyihesha gusoza itsinda rya mbere iyoboye.

Muri ¼, Equity Bank irahura na Nile Legends yo muri Sudani y’Epfo, mu gihe APR WBBC ihura na JKL Lady Dolphins yo muri Uganda.

Imikino yombi iteganyijwe kuri uyu wa Kane, tariki 2 Ugushyingo 2023.

REGEW BBC yatsinze JKL Lady Dolphins bigoranye

REGW BBC yatangiye neza uyu mukino ibifashijwemo, Anastasia Hayes Faith na Chelsea Jennings batsindaga amanota menshi.

Agace ka Mbere karangiye iyi kipe iyoboye umukino n’amanota 13 ku 9 ya JKL Lady Dolphins.

Mu gace ka kabiri ikipe ya Sosiyete y’Igihugu ishinzwe ingufu yakomeje kwitwara neza Jennings yongera yakomezaga amanota.

JKL Lady Dolphins nayo yakomeje kongera amanota Hope Akello na Amaniyo Mary Moses bageragezaga gutsinda,

Igice cya mbere cyarangiye REG WBBC yatsinze JKL Lady Dolphins amanota 33-29.

Mu gace ka gatatu, amakipe yombi yakomeje kwegerana mu manota kuko ikinyuranyo cyari amanota ane gusa.

Mu minota ya nyuma y’aka gace, Imanishimwe Ritah yafashije Dolphins gukuramo ikinyuranyo ndetse inayobora umukino ku kinyuranyo cy’amanota atanu.

Agace ka gatatu karangiye JKL Lady Dolphins yigaranzuye REG WBBC igatsinda ku manota 51-44.

Iyi kipe yo muri Uganda yakomeje gukina neza no mu gace ka nyuma irusha imbaraga abakinnyi ba REGW BBC wabonaga barushye.

Habura umunota ngo umukino urangire, Nyota Mireille na Anastasia Hayes ba REGW BBC batsinze amanota hasigaramo ikinyuranyo cy’inota rimwe.

Ku isegonda rya nyuma, Anastasia yahaye umupira Chelsea Jennings atsinda amanota abiri yahesheje intsinzi Ikipe ya Sosiyete y’Igihugu ishinzwe Ingufu.

Umukino warangiye REGW BBC yatsinze JKL Lady Dolphins amanota 66-65 isoza ku mwanya wa kabiri mu Itsinda rya kabiri.

Itsinda rya kabiri ryarangiye Kenya Ports Authority iri ku mwanya wa mbere, REG WBBC ku wa kabiri, JKL Lady Dolphins ku wa gatatu na Nile Legends yo muri Sudani y’Epfo iri ku mwanya wa kane.

Mu mikino ya ¼, REGW BBC irahura na Gladiators y’i Burundi, mu gihe JKL Lady Dolphins ikina na APRW BBC yabaye iya kabiri mu itsinda rya mbere.

SHEMA IVAN

  • Imvaho Nshya
  • Ugushyingo 2, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE