Kigali-Rwanda

Mostly cloudy
26°C
 

APR FC yongeye gusezererwa na Club Africain mu mikino y’Afurika

Yanditswe na Bugingo Fidèle

Ku ya 06-12-2018 saa 07:43:48
APR FC yongeye gusezererwa mu mikino y'Afurika na Club Africain nk'uko byagenze muri 2011

Club Africain 3-1 APR FC (3-1)

Ikipe ya APR FC yari ihagarariye u Rwanda mu mikino y’Afurika y’amakipe yabaye aya mbere iwayo «Total CAF Champions League 2018-2019» yamaze gusezererwa nyuma yo gutsindwa n’ikipe ya Club Africain yo muri Tunizia ibitego 3-1 mu mikino yombi.

Umukino wo kwishyura wabereye muri Tunizia, tariki 04 Ukuboza 2018, APR FC yatsinzwe ibitego 3-1. Club Africain ni yo yafunguye amazamu ku munota wa 13 ku gitego cyatsinzwe na Bilel Khefifi. Ku munota wa 27, Hakizimana Muhadjiri yishyuye iki gitego kuri penaliti.

Kuva kuri uyu munota kugeza ku wa 62, APR FC yari ifite amahirwe yo gukomeza kuko yari yabashije gutsindira igitego hanze. Ku munota wa 63, Club Africain yabonye igitego cya kabiri cyatsinzwe na Derrick Sasraku hanyuma ku munota wa 68, Imanishimwe Emmanuel myugariro wa APR FC yitsinda igitego cyabaye icya 3 cya Club Africain.

APR FC yongeye gusezererwa mu mikino y’Afurika na Club Africain nk’uko byagenze muri 2011

Iyi kipe yahise ikomeza mu kiciro gikurikiraho isezereye APR FC ku bitego 3-1 mu mikino yombi kuko umukino ubanza wabaye tariki 28 Ugushyingo 2018 izi kipe zari zanganyije 0-0. Club Africain izahura na Al Hilal Omdurman yo muri Sudani yasezereye JKU yo muri Zanzibar ku bitego 6-0 mu mikino yombi.

Ikipe ya Club Africain ni inshuro ya kabiri isezereye ikipe ya APR FC mu mikino y’Afurika kuko zaherukaga guhura muri 2011 aho Club Africain yasezereye APR FC ku bitego 6-2. Umukino ubanza wabereye i Kigali, APR FC yanganyije na Club Africain ibitego 2-2 naho umukino wo kwishyura Club Africain itsinda APR FC ibitego 4-0.

Mu mikino y’Afurika iheruka, ikipe ya APR FC yari ihagarariye u Rwanda mu mikino y’Afurika y’amakipe yitwaye neza iwayo “Total CAF Confederation Cup 2018” aho yaviriyemo mu kiciro cya kabiri isezerewe na Djoliba yo muri Mali nyuma yo kunganya ibitego 2-2 igakurwamo n’igitego yatsindiwe mu Rwanda.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.