Kigali-Rwanda

Mostly cloudy
21°C
 

APR FC yihimuye kuri Mukura, Rayon Sports itsinda Kiyovu

Yanditswe na BUGINGO FIDELE

Ku ya Mar 29, 2019

Sunrise FC 1-1 AS Kigali
Mukura 1-2 APR FC
Rayon Sports 1-0 Kiyovu

Tariki 27 na 28 Werurwe 2019 habaye imikino y’umunsi wa 21 ya shampiyona y’ikiciro cya mbere itarakiniwe igihe kubera ikipe y’igihugu  yiteguraga umukino  wa nyuma mu itsinda  H mu gushaka itike ya CAN 2019.

Mu mikino yabaye, ikipe ya APR FC inayoboye urutonde rwa shampiyona yihimuye kuri Mukura iyitsindira iwayo  ibitego 2-1.

Uyu mukino wabereye kuri Sitade ya Huye tariki 27 Werurwe 2019, APR FC  ni yo yabonye igitego cya mbere ku munota wa 18 gitsinzwe na Hakizimana Muhadjiri. Ku munota wa 68, Sibomana Patrick “Papy” wari ukinnye umukino we wa  mbere yishyuye iki gitego  gusa ku munota wa 90, Mugiraneza Jean Baptiste wari umuze igihe adakina kubera imvune atsinda igitego  cyahesheje APR FC amanota 3.

Mugiraneza Jean Baptiste (7) watsinze igitego cyahesheje APR FC amanota 3

Ikipe ya APR FC ikaba yarihimuye kuri Mukura kuko mu mukino wa shampiyona ubanza, APR FC yari yatsindiwe na Mukura  kuri Sitade ya Kigali i Nyamirambo igitego 1-0.

Gutsinda uyu mukino kuri APR FC byayihaye amahirwe yo gukomeza kuyobora urutonde ndetse no guha intera iyi kipe ya Mukura kuko ubu harimo ikinyuranyo cy’amanota 7.

Mu wundi mukino wabaye, ikipe ya Sunrise FC yanganyije na AS Kigali igitego 1-1, umukino ukaba warabereye i Nyagatare.

Rayon Sports yanze gutsindwa na Kiyovu bwa kabiri

Undi mukino  wakinwe nawo utarabereye igihe  ni uwahuje ikipe ya Rayon Sports na Kiyovu, ikipe zisanzwe zihangana cyane kubera amateka.

Uyu mukino wabereye kuri Sitade ya Kigali i Nyamirambo tariki 28 Werurwe 2019, Rayon Sports yitwaye neza itsinda Kiyovu igitego 1-0 cyatsinzwe na Sarpong Michael ku munota wa 55 ku mupira yari aherejwe na Manishimwe Djabel.

Uyu mukino ku ruhande rw’ikipe ya Rayon Sports bari bawiteguye cyane kuko batifuzaga kongera gutsindwa na Kiyovu dore ko umukino wa shampiyona ubanza, Kiyovu yari yatsinze Rayon Sports ibitego 2-1.

Nyuma y’iyi mikino y’ibirarane, APR FC ikomeje kuyobora n’amanota 51, ikurikiwe na Rayon Sports  ifite amanota  47, Mukura ku mwanya wa 3 n’amanota 44 naho Kiyovu ikaza ku mwanya wa 4 n’amanota 35.  Ku mwanya wa nyuma wa 16 hari Amagaju FC n’amanota 15.

Kugeza ubu  rutahizamu w’ikipe ya Rayon Sports, Ulimwengu Jules  ni we uyoboye urutonde rw’abamaze gutsinda ibitego byinshi aho yatsinze 12. Akurikiwe na  Nizeyimana Djuma ( Kiyovu)  ufite ibitego 11 na Bizimana Yannick (AS Muhanga)  umaze gutsinda 10 anganya na Hakizimana Muhadjiri (APR FC) na Sarpong Michael (Rayon Sports).