20°C , Mostly cloudy | Kigali-Rwanda

APR FC yashyikirijwe igikombe cya shampiyona ya 2019-2020

Yanditswe na BUGINGO FIDELE

Ku ya 02-05-2021 saa 22:52:45
Abakinnyi ba APR FC nyuma yo guhabwa igikombe cya shampiyona ya 2019-2020

Muri Werurwe 2020, shampiyona y’umupira w’amaguru  y’icyiciro cya mbere ya 2019-2020 mu bagabo yarahagaritswe kubera COVID-19. Iyi shampiyona yahagaritswe igeze ku munsi wa 23 habura imikino 7 ngo isozwe.

Ubwo shampiyona yahagarikwaga, ikipe ya APR FC yari iyoboye urutonde n’amanota 57 aho yari ikurikiwe na Rayon Sports  yari ifite amanota 50 mu gihe ku mwanya wa 3 hari Police FC  n’amanota 43.

Muri Gicurasi 2020 bimaze kugaragara ko shampiyona ya 2019-2020 itazasubukurwa, ishyirahamwe ry’umupira w’amaguru mu Rwanda “FERWAFA” ryafashe umwanzuro wo guha ikipe ya APR FC igikombe cya shampiyona nyuma y’inama zitandukanye zagiye ziba hagati ya komite nyobozi ya FERWAFA ndetse n’abanyamuryango.

Mu Kuboza 2020, shampiyona ya 2020-2021 yaratangiye nayo iza gusubikwa  nyuma y’iminsi mike kubera ko amakipe atubahirizaga uko bikwiye amabwiriza yo kwirinda COVID-19  . Iyi shampiyona ikaba yari yatangiye igikombe kidatanzwe.

Kuri iki cyumweru tariki 02 Gicurasi 2021 ubwo ikipe ya APR FC yari igiye gukina umukino wa mbere wa shampiyona ya 2020-2021 yabanje gushyikirizwa igikombe cya shampiyona ya 2019-2020.  Ni igikorwa cyabereye kuri Sitade ya Huye aho iyi kipe izajya yakirira imikino yayo muri iyi minsi.

Nyuma iyi kipe iri mu itsinda A hamwe na AS Muhanga, Gorilla FC na Bugesera FC yitwaye neza itsinda Gorilla FC ibitego 2-1.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.