Kigali-Rwanda

Partly sunny
22°C
 

APR FC irakina na Gicumbi FC mu  mukino w’umunsi wa 27

Yanditswe na BUGINGO FIDELE

Ku ya May 9, 2019

Tariki 09-05-2019

Gicumbi FC- APR FC (Gicumbi-15h30)

Tariki 10-05-2019

AS Kigali-AS Muhanga (Nyamirambo-15h30)

Kirehe FC-Mukura  (Kirehe-15h30)

Tariki 11-05-2019

Kiyovu-Espoir FC (Mumena-15h30)

Musanze FC-Sunrise FC (Musanze-15h30)

Bugesera FC-Police FC (Nyamirambo-15h30)

Amagaju FC-Rayon Sports (Nyagisenyi-15h30)

Tariki 14-05-2019

Marines FC-Etincelles FC (Rubavu-15h30)

Shampiyona y’u Rwanda   irimo kugenda igana ku musozo mu mpera z’iki cyumweru tariki 09 kugeza 11 Gicurasi 2019 harakinwa imikino y’umunsi wa 27.

Mu mikino itegerejwe ni ugomba guhuza ikipe ya APR FC na Gicumbi FC ndetse n’ugomba guhuza Rayon Sports n’Amagaju FC.

Izi kipe zombi, APR FC na Rayon Sports ni zo zihanganiye igikombe cya shampiyona y’uyu mwaka wa 2018-2019.

Ikipe ya APR FC nyuma yo kumara imikino 2 ititwara neza kuri uyu wa Kane tariki 09 Gicurasi 2019 irakina na Gicumbi FC iri mu makipe 3 ya nyuma.

Uyu mukino urabera kuri Sitade ya Gicumbi saa kenda n’igice (15h30).  Ku ruhande rw’ikipe ya APR FC ubu nta mukino   bagomba gutakaza kuko byaha amahirwe ikipe ya Rayon Sports yo kwegukana igikombe cya shampiyona kuko ibari imbere n’inota rimwe.

Mu mukino wa shampiyona ubanza APR FC yanganyije na Gicumbi FC 0-0

APR FC ikaba isabwa gutsinda imikino 4 isigaye harimo n’uyu wa Gicumbi FC  igategereza ko hari aho ikipe ya Rayon Sports yanganyiriza cyangwa igatsindwa.

Tugarutse kuri uyu mukino nta bwo uza kuba woroshye kuko  Gicumbi FC ikunze kugora APR FC. Kuva muri 2013 mu mikino 11 izi kipe zimaze guhura, APR FC yatsinze imikino 5, Gicumbi FC itsinda 2 indi 4 izi kipe ziranganya.

Muri iyi mikino 4 izi kipe zanganyije, 3 zayinganyirije i Gicumbi mu gihe umwe ari wo APR FC yanganyije na Gicumbi FC muri Kigali akaba ari umukino ubanza wa shampiyona ubwo izi kipe zanganyaga 0-0.

Mu mikino 5 APR FC yatsinze Gicumbi FC, ibiri gusa ni yo yabashije gutsindira Gicumbi FC iwayo. Umukino APR FC iheruka gutsindamo Gicumbi FC iwayo ni umukino ubanza wa shampiyoa ya 2017-2018   wabaye tariki 28 Werurwe 2018 aho APR FC yatsinze  ibitego 4-0.

Ikipe ya Gicumbi FC kuri ubu iri ku mwanya wa 14 n’amanota 27   irifuza amanota 3 kugira ngo  ive mu makipe ashobora kumanuka mu kiciro cya kabiri.

Rayon Sports izasura Amagaju FC

Ku rundi ruhande ikipe ya Rayon Sports igomba gusura Amagaju FC tariki 11 Gicurasi 2019. Rayon Sports nayo nta kosa ubu yemerewe ryo gutakaza umukino kuko  yahita ibura igikombe.

Iyi kipe ya Rayon Sports mu myaka 6 iheruka imaze gukina n’Amagaju FC  imikino 11. Muri iyi mikino Rayon Sports yatsinzemo 9, Amagaju FC atsinda umukino umwe  zinganya undi mukino umwe.

Muri iyi myaka nta bwo Amagaju FC arabasha kwakira Rayon Sports ngo ayitsinde uretse kunganya rimwe  gusa mu mikino 5 bivuze ko kuva muri 2013, imikino Rayon Sports yakiniye i Nyamagabe, 4 yayitsinze.

Rayon Sports izakina uyu mukino ikeneye amanota 3 ngo ikomeze kuyobora urutonde  rwa shampiyona no guhatanira igikombe naho Amagaju FC yo bisa n’ibyarangiye kuko iri ku mwanya wa nyuma aho igomba gusubira mu kiciro cya kabiri.

Iyi kipe ya Rayon Sports izakina idafite Rutanga Eric na Michael Sarpong naho ikipe y’Amagaju FC ikine idafite Amewuga Francis bose bakaba barujuje amakarita 3 y’umuhondo.

Indi mikino iteganyijwe

Mu yindi mikino y’umunsi wa 27, tariki 10 Gicurasi 2019, AS Kigali izakira AS Muhanga na Kirehe FC yakire Mukura . Tariki 11 Gicurasi 2019, Kiyovu izakira Espoir FC, Musanze FC yakire Sunrise FC naho Bugesera FC yakire Police FC.

Umukino uzasoza umunsi wa 27 wa shampiyona uzaba tariki 14 Gicurasi 2019 aho ikipe ya Marines FC izakira Etincelles FC. Uyu mukino ukaba uba ukomeye kuko izi kipe zombi zisangiye umujyi wa  Rubavu.

Kugeza ubu Rayon Sports irayoboye n’amanota 60 ikaba ikurikiwe na APR FC ifite amanota 59, ku mwanya wa 3 hari ikipe ya Mukura n’amanota 52 naho ku mwanya wa nyuma hari Amagaju FC ifite amanota 17.

Mu bamaze gutsinda ibitego byinshi, Ulimwengu Jules ukinira Rayon Sports ni we uyoboye n’ibitego 17 akurikiwe na Hakizimana Muhadjiri  ukinira APR FC akaba afite ibitego 14 naho ku mwanya wa 3 hakaza Michael Sarpong ukinira Rayon Sports akaba amaze gutsinda ibitego 13.