Kigali-Rwanda

Partly sunny
23°C
 

APR FC igiye kwakira Police FC mu mukino w’umunsi wa 15

Yanditswe na Bugingo Fidèle

Ku ya 18-01-2019 saa 08:59:01
Ndayishimiye Antoine Dominique (14) ni umwe mu bakinnyi ba Police FC bitezweho kuyifasha kwitwara neza imbere ya APR FC

Uyu munsi
Kiyovu-Musanze FC (Mumena-15h30)

Tariki 19-01-2019
AS Muhanga-Espoir FC (Muhanga-15h30)
Marines FC-Rayon Sports (Rubavu-15h30)
AS Kigali-Amagaju FC (Nyamirambo-15h30)

Tariki 20-01-2019
Kirehe FC-Bugesera FC (Kirehe-15h30)
APR FC-Police FC (Nyamirambo-15h30)
Etincelles FC-Sunrise FC (Rubavu-15h30)

Mu mpera z’iki cyumweru, tariki 18 kugeza 20 Mutarama 2019 harakinwa imikino y’umunsi wa 15 ari na yo isoza imikino ibanza ya shampiyona y’ikiciro cya mbere mu bagabo.

Iyi mikino irabimburirwa n’umukino wa Kiyovu yakira Musanze FC, umukino uteganyijwe kuri uwa Gatanu tariki 18 Mutarama 2019 kuri Sitade Mumena. Ikipe ya Kiyovu ikaba imaze iminsi yitwara neza dore ko yatsinze imikino itatu iheruka.

Ikipe ya Kiyovu, umukino uheruka yatsinze Amagaju FC ibitego 3-0 mu gihe Musanze FC yanganyije na Bugesera FC ibitego 2-2.

Imikino y’umunsi wa 15 izakomeza tariki 19 Mutarama 2019 aho ikipe ya AS Muhanga izakira Espoir FC, Marines FC yakire Rayon Sports naho AS Kigali yakire Amagaju FC.

Ubwo imikino y’umunsi wa 15 izaba isozwa tariki 20 Mutarama 2019, Kirehe FC izakira Bugesera FC, Etincelles FC yakire Sunrise FC.

Ndayishimiye Antoine Dominique (14) ni umwe mu bakinnyi ba Police FC bitezweho kuyifasha kwitwara neza imbere ya APR FC

APR FC NA POLICE FC, UMUKINO UTEGEREJWE NA BENSHI

Ikipe ya APR FC ubu iyoboye urutonde rwa shampiyona n’amanota 32 igomba kwakira ikipe ya Police FC ubu iri ku mwanya wa 5 n’amanota 21.

Izi kipe zombi zikaba zikunze kugorana cyane kuko umukino wazo haba muri shampiyona ndetse n’igikombe cy’Amahoro wakunze kurangwamo kunganya cyane n’ubwo APR FC ijya inyuzamo igatsinda.

Mu mikino 10 ya shampiyona iheruka guhuza izi kipe kuva muri 2013, APR FC yatsinze imikino 2 mu gihe indi yose uko ari 8 izi kipe zanganyije. Mu mwaka w’imikino uheruka wa 2017-2018, izi kipe zanganyije imikino yombi aho umukino ubanza zanganyije 0-0 naho uwo kwishyuza zikanganya 1-1.

Muri iyi myaka 6, Police FC ikaba itarabasha gutsinda APR FC mu gihe iyi kipe inafite igikombe cya shampiyona cya 2017-2018 iheruka gutsinda Police FC muri shampiyona ya 2015-2016 aho mu mukino wo kwishyura wabaye tariki 24 Mata 2016, APR FC yatsinze Police FC ibitego 2-1.

Muri uyu mwaka wa 2018-2019, APR FC yatangiye yitwara neza dore ko imaze gutakaza umukino 1 mu gihe Police FC yatsinzwe imikino 4. Umukino uheruka wa shampiyona APR FC yatsindiye Espoir FC i Rusizi igitego 1-0 cyatsinzwe na Nshimiyimana Imran naho Police FC inganya na AS Kigali ibitego 2-2 byombi byatsinzwe na Ndayishimiye Antoine Dominique.

Mbere y’iyi mikino y’umunsi wa 15, APR FC irayoboye n’amanota 32 ikurikiwe na Rayon Sports n’amanota 28, Mukura ikaza ku mwanya wa 3 n’amanota 26 n’imikino 5 y’ibirarane. Ku mwanya wa nyuma wa 16 hari Amagaju FC n’amanota 8.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.