21°C , Partly sunny | Kigali-Rwanda

Ambasaderi w’u Bushinwa muri Isiraheli yasanzwe yapfuye

Yanditswe na Imvaho Nshya

Ku ya 17-05-2020 saa 11:20:56
Ambasaderi w'u Bushinwa muri Isiraheli Du Wei, yasanzwe yapfuye aho yari acumbitse

Ambasaderi w’u Bushinwa muri Isiraheli Du Wei, yasanzwe yapfiriye aho yari acumbitse i Herzliya mu Majyaruguru y’Umurwa Mukuru Tel Aviv, nk’uko byatangajwe na Minisiteri y’Ububanyi n’Amahanga na Polisi by’icyo gihugu.

Mu itangazo ryahyizwe ahagaragara n’iyo Minisiteri, nta mpamvu yihariye yaba yateye urwo rupfu yagaragajwe, ariko Polisi yavuze ko yatangiye iperereza ryimbitse ku cyaba cyaruteye.

Umuvugizi wa Polisi Micky Rosenfeld, yemeje ayo makuru ko umurambo wa Du Wei wamenyekanishijwe n’umwe mu babakozi bakoranaga mu gitondo cyo kuri Iki Cyumweru tariki ya 17 Gicurasi 2020.

Yavuze ko Polisi yahageze rugikubita ihita itangira iperereza ku kintu cyose gikekwa ko cyaba intandaro y’urupfu rwa Du.

Ibitangazamakuru byo muri Isiraheri byatangaje ko ibimenyetso by’ibanze ku iperereza byagaragaje ko Du ashobora kuba yafashwe n’indwara y’umutima, ariko nta nzego z’ubuyobozi zirabyemeza.

Umuyobozi Mukuru muri Minisiteri y’Ububanyi n’Amahanga ya Isiraheli Yuval Rotem, yavuze ko yamaze kuvugana n’Ambasaderi Wungirije w’u Bushinwa amwihanganisha ku byago bagize kandi anamwizeza ubufatanye n’Ambasade y’u Bushinwa ku kintu icyo ari cyose yakenera muri ibi bihe.

Du yageze muri Israheri muri Gashyantare uyu mwaka, avuye muri Ukraine aho na ho yari ahagarariye inyungu z’u Bushinwa muri icyo Gihugu, nk’uko bigaragara ku rubuga rw’Ambasade y’u Bushinwa muri Isiraheli.

Asize umugore n’umwana w’umuhungu, bose bivugwa ko batari kumwe batabanaga mu mezi agera kuri atatu amaze muri Isiraheli.

Ibi byago bibaye mu gihe Isiraheli ikomeje umubano mwiza n’u Bushinwa mu nzego zitandukanye haba mu bya Politiki ndetse no mu buhahirane.

Urupfu rwa Ambasaderi Du rubaye nyuma y’iminsi ibiri gusa yamaganye ibitekerezo by’Umunyamabanga wa Leta Zunze Ubumwe z’Amerika (USA) Mike Pompeo, wanenze ishoramari ry’u Bushinwa muri Isiraheli akanashinja u Bushinwa guhisha amakuru ajyanye n’icyorezo cya Koronavirusi (COVID-19), bikarangira kibaye icyorezo k’Isi yose.

Umwanditsi:

Imvaho Nshya

One Comment on “Ambasaderi w’u Bushinwa muri Isiraheli yasanzwe yapfuye”

  1. What’s going on?? How this could be possible to find someone like that dead? Let’s we wait we will know a cause of a death. Tqw

Tanga Igitekerezo

Email yanyu ntigaragazwa ku rubuga. Amazina na Email ni ngombwa.