20°C , Intermittent clouds | Kigali-Rwanda

Ambasaderi w’Amerika yasuye ibitaro bya Musanze ashima uko Ebola ikumirwa

Yanditswe na Kayitare Jean Paul

Ku ya 19-11-2019 saa 19:23:39
Peter Vrooman, Ambasaderi w'Amerika mu Rwanda, yashimye uburyo ibitaro bya Ruhengeri bifite inyubako yakurikiranirwamo uwagaragarwaho indwara ya Ebola (Foto Josee)

Ambasaderi wa Leta Zunze Ubumwe z’Amerika mu Rwanda, Peter Vrooman, yagiriye uruzinduko mu bitaro bya Ruhengeri ashima uburyo ibi bitaro bitanga serivisi ndetse n’uko bishyize imbere gahunda zo gukumira icyorezo cya Ebola.

Amb. Vrooman yasuye inyubako nshya yuzuye mu bitaro bya Ruhengeri mu Ntara y’Amajyaruguru, ikaba ishinzwe kwakira abakekwaho kwandura icyorezo cya Ebola. Iyi nyubako yubatswe n’Ikigega cya Leta Zunze Ubumwe z’Amerika Gishinzwe Iterambere Mpuzamahanga (USAID).

Amb. Vrooman yagize ati “Nshimishijwe n’uburyo u Rwanda rukataje mu gukumira icyorezo cya Ebola, nyuma yo kubaka inzu yakira abakekwaho icyo cyorezo nkuko twabigaragarijwe n’Umuyobozi Mukuru w’Ibitaro bya Ruhengeri. Ni ubwa mbere mbonye inyubako nk’iyi mu Rwanda ishobora gushyirwamo umurwayi wa Ebola cyangwa ukekwaho iyi ndwara.”

Yavuze ko uruzinduko rwe mu bitaro bya Ruhengeri rwari rugamije kureba aho inyubako igenewe kwakira abantu bakekwaho indwara ya Ebola igeze yubakwa nk’uko ngo biri muri gahunda USAID isanzwe ifashamo ibi bitaro.

Umuyobozi w’Ibitaro bya Ruhengeri Dr. Muhire Philbert, ahamya ko inyubako nshya bubakiwe na USAID ari inzu bafashijwemo gusanirwa n’umushinga witwa ‘Ingobyi’ uterwa inkunga na USAID.

Dr. Muhire yagize ati “Ni ikintu cyari ngombwa ko aza kuyireba kuko ni iya mbere twafashijwemo n’Amerika mu bijyanye no kuyisana no kuyishyiramo ibikoresho. Rero byamushimishije kubona ko inyubako ya mbere mu Rwanda igeze kuri ruriya rwego.”

Iyo nyubako yavuguruwe yari isanzwe mu bitaro bya Ruhengeri ikorerwamo izindi serivise, biba ngombwa ko ivugururwa igashyirwamo n’ibikoresho hagamijwe gukumira icyorezo cya Ebola.

Dr. Muhire Philbert avuga ko iyo nzu ijyanye n’igihe kuko ifite ibyangombwa byose bijyanye no gupima Ebola no kwita ku wayanduye.

Ati “Iyo nzu yuzuye ku kigero cya 99% kuko yarasanwe, inzira zinyuzwamo abarwayi bakekwaho Ebola ziratunganye neza, aho abarwayi bashobora kuba haratunganye neza, ibikoresho by’isuku bashobora kwitabaza birahari, n’ibikoresho byo kuvura byose birimo.

Harimo ibitanda, imashini zikurikirana umurwayi n’izitanga umwuka. Ibikiburamo ni ibintu bike cyane nk’intebe n’ameza, birahagije ku baganga bavura, ariko aho bakorera n’ibyo tubikamo ibikoresho byose birahari.”

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.