Kigali-Rwanda

Mostly cloudy
18°C
 

Amavubi U-17 yatsinzwe na Cameroun mu mukino wa gicuti

Yanditswe na BUGINGO FIDELE

Ku ya 31-03-2019 saa 10:51:08
Ikipe y'u Rwanda U-17 na Cameroun mu mukino wa gicuti

Tariki 29-03-2019

Amavubi 1-3 Cameroun

Tariki 01-04-2019

Cameroun-Tanzania (Regional-15h30)

Tariki 04-04-2016

Amavubi-Tanzania (Regional-15h30

Ikipe y’u Rwanda mu batarengeje imyaka 17 «Amavubi U-17» yatsinzwe n’ikipe y’igihugu ya Cameroun nayo y’abatarengeje imyaka 17 mu mukino wa gicuti wabereye  kuri Sitade ya Kigali i Nyamirambo  tariki 29 Werurwe 2019.

Muri uyu mukino, ikipe y’u Rwanda ni yo yafunguye  amazamu  ku gitego cyatsinzwe na Nyarugabo Moise ku munota wa 26. Ikipe ya Camroun yahise yishyura ibi bitego ku munota wa 36 ku gitego cyatsinzwe na Bere Francois ndetse na Wamba Leonel ku munota wa 38.

Mu gice cya kabiri, Cameroun yabonye igitego kuri penaliti ku munota wa 65 gitsinzwe na Mvoue Steve ku ikosa ryari rikozwe n’umunyezamu  w’ikipe y’u Rwanda,  Hakizimana Adolphe.

Ikipe y’u Rwanda U-17 na Cameroun mu mukino wa gicuti

Nyuma y’uyu mukino, umutoza wa Cameroun U-17, Thomas Libih yatangaje ko  bishimiye uko umukino wagenze. Yakomeje avuga ko barimo kwitegura imikino ya CAN U-17 kandi  imyiteguro ikomeje.

Ku ruhande rwa Rwasamanzi Yves, umutoza w’Amavubi U-17 we yavuze ko adatunguwe cyane kuko yari azi ko agiye gukina n’ikipe ikomeye kandi  imaze iminsi yitegura imikino y’Afurika. Ati Twagerageje gukina neza tubona igitego gusa kubera uburangare badutsinze ibitego bibiri icya gatatu ni umunyezamu wakoze ikosa ariko bibaho biriya, gusa iyi ni  urugero rw’ikipe yo  kwipimiraho”.

Yakomeje avuga ko  batiteguye cyane  bihagije kuko abakinnyi bamwe bari mu bizamini ariko ko imikino nk’iyi ari myiza kuko  ituma abakinnyi bamenyera.

Ati Imikino nk’iyi ni myiza, ubuyobozi bwatwemereye ko buri kwezi bazajya badushakira umukino wa gicuti ku buryo tuzajya gukina umwaka utaha  imikino yo gushaka itike ya CAN U-20 tumeze neza.”

Kuri gahunda biteganyijwe ko tariki 01 Mata 2019, ikipe ya Cameroun izakina na Tanzania kuri Sitade ya Kigali i Nyamirambo (15h30) naho imikino izasozwe tariki 04 Mata 2019, ikipe y’u Rwanda ikina na Tanzania nabwo kuri Sitade ya Kigali i Nyamirambo (15h30).

Ikipe ya Cameroun na Tanzania iyi mikino ikaba irimo kubafasha kwitegura imikino ya nyuma y’Afurika y’abaterengeje imyaka 17 “CAN U-17” izabera  i Dar es Salaam muri Tanzania kuva tariki 14 kugeza 28 Mata 2019.

Abakinnyi babanjemo ku mpande zombi

Rwanda: Hakizimana Adolphe, Kazungu Claver, Mwebaze Yunusu, Mariza Innocent, Niyomugisha Eny, Ishimwe Anicet, Nsanzimfura Keddy, Isingizwe Rodrigue , Nyarugabo Moise , Nshuti Aime Cedrick  na Ishimwe Jean Rene.

Cameroun : Ekoi Manfred, Ndzie Fabrice, Ngolna Patrice, Ngatchou Ricky, Bere Francois, Dibongue Gael, Ben Nassourou, Mvoue Steve, Wamba Leonel, Yannick Noah  na Moumbagna Camal Ryan.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.