21°C , Partly cloudy | Kigali-Rwanda

Amateka yo Kwibohora mu bukerarugendo, ikindi gitego cy’u Rwanda

Yanditswe na NTAWITONDA JEAN CLAUDE

Ku ya 12-07-2020 saa 22:20:14

Urugamba rwo kubohora u Rwanda rwaranzwe n’amateka ababaje yasojwe n’insinzi yasubije benshi ubuzima bagishimira Ingabo zahoze ari RPA-Inkotanyi zemeye gutanga ubuzima kugira ngo u Rwanda ruhindure ikerekezo, buri Munyarwanda agire agaciro kamukwiriye mu gihugu ke.

Urugamba ubwarwo ntirwari rworoshye ndetse no kurutsinda byasabye ubwitange bw’Abanyarwanda bari bahuje intumbero yo gukura u Rwanda mu icuraburindi, rukarusha ubuhangange tubona uyu munsi.

Nk’uko umuhanga Elbert Hubbard yabivuze, “ubuzima nibuguha indimu uzayikoremo umutobe…” Amateka mabi y’u Rwanda yasojwe n’urugamba rwo guhagarika Jenoside yakorewe Abatutsi n’urw’iterambere rumaze imyaka 26, ni isoko y’ubukungu imaze igihe ihishwe benshi.

Kimwe n’ahandi hose ku Isi, ahantu nyaburanga habitse amateka adasanzwe hakurura ba mukerarugendo benshi. uhereye i Yerusaremu ahavugwa ubuzima bwa Yezu n’amateka y’Imana ya Isiraheli ukageza ku Rukuta Runini rw’u Bushinwa. ni uduce dukurura ba mukerarugendo mu buryo budasanzwe.

Mu mpera z’icyumweru cyashize u Rwanda rwizihije isabukuru ya 26 yo Kwibohora, umunsi wo kishimira insinzi yo guhagarika ubuyobozi bwateguye bukanashyira mubikorwa Jenoside yakorewe Abatutsi, iterambere Igihugu kigezeho nyuma y’imyaka 26 ishize.

Kuri uwo munsi ibikorwa  by’iterambere byatashywe ahantu hatandukanye birimo inzu zubakiwe abatishoboye, ingo mbonezamikurire, amashuri, ibigo nderabuzima n’ibindi.

Bamwe mu Ngabo za RPA-Inkotanyi zabohoye u Rwanda

By’umwihariko mu muhango wabereye mu Burasirazuba, Perezida wa Repubulika y’u Rwanda Paul Kagame afatanyije n’abandi bayobozi, yatashye ku mugaragaro ibikorwa by’iterambere byubatswe mu gace ka Gikoba gafite amateka y’urugamba rwo kwibohora.

Ako gace gaherereye mu Murenge wa Tabagwe, Akarere ka Nyagatare, ni ko kabaye ibirindiro bya mbere by’Ingabo za RPA-Inkotanyi  mu Rwanda mu 1991 kugeza mu 1992.

Ni kamwe mu turimo gutegurirwa kuba site z’ubukerarugendo kuko ari ho ingabo za RPA-Inkotanyi zateguriye uburyo bwo kwagura urugamba kuko ibirindiro zahashinze bitashoboraga gutsimburwa n’ingabo z’uwari Perezida Habyarimana.

Ako gace n’utundi duherereye mu bice bitandukanye by’Igihugu twateguriwe kujya twakira Abaturarwanda n’Abanyamahanga bifuza gusobanukirwa byinshi ku mateka y’urwo rugamba.

Uduce tubitse amateka yihariye, tugiye kubakwamo ingoro ndangamateka

Uretse Gikoba utundi duce twihariye ku mateka y’urugamba rwo kubohora Igihugu ni Kagitumba, Shonga, Mulindi, Mukarange, Musanze/Ruhengeri (Nyamagumba), Urugano mu Birunga no muri CND mu Ngoro y’Inteko Ishinga Amategeko.

Umupaka wa Kagitumba, uvugwaho kuba agace kavugiyeho isasu rya mbere ry’Ingabo za RPA-Inkotanyi ubwo zari zitanfiye urugamba rwo kubohora u Rwanda ku itariki ya 1 Ukwakira 1990.

Mu Ruhengeri (ubu ni mu Karere ka Musanze),zo ngabo zarahateye zibohora imfungwa za Politiki ku ngoma ya Habyarimana. Abenshi muri izo mfungwa bahise biyunga kuri urwo rugamba rwo gukomeza kubohora u Rwanda.

Muri CND hazwi ku mateka adasanzwe y’ingabo 600 zarinze abanyepolitiki batavugaga rumwe na Leta y’abicanyi, ndetse zinagira uruhare mu guhagarika Jenoside yakorerwaga Abatutsi mu bice bitandukanye by’Umujyi wa Kigali no mu nkengero zawo.

Imwe mu ndaki z’amateka zacukuwe n’ingabo z’u Rwanda mu gushimangira ko zitazasubira inyuma, iherereye ku Mulindi

Urwego rw’Igihugu rw’iterambere RDB rutangaza ko hateganyijwe amafaranga y’u Rwanda asaga miliyari 4 azakoreshwa ku mushinga wo kubaka ingoro ndangamateka 8 zibumbatiye amateka akomeye y’urugamba rwo kubohora u Rwanda.

Biteganyijwe ko umwaka wa 2021 i Gikoba hazaba hari imwe muri izo ngoro ndangamateka y’urugamba rwo kwibohora igenewe gusurwa na ba mukerarugendo. RDB yamaze kumurika igishushanyo mbonera cy’ahazubakwa ingoro ya Gikoba yiswe Gikoba Underground and Open Air Museum.

Ikiciro cya mbere cy’uwo mushinga kigizwe no kubaka Ingoro ya Gikoba, iya Shonga n’iya Mulindi,  mu gihe igikurikira kizaba kirimo Ingoro y’Urugano (muri Pariki y’Ibirunga), Musanze na CND kitezweho kuzaba cyuzuye mu mwaka wa 2023.

Ikiciro cya gatatu cyo kizaba kigizwe no kubaka ingoro ya Kagitumba n’iya Mukarange. Muri rusange izo ngoro zigomba kuba zuzuye bitarenze mu mwaka wa 2024. uyu ni umushinga uzaba ubitse amateka y’urugamba guhera mu Kwakira 1990 kugeza muri Mata 1994.

Igitekerezo cyo gukora uyu mushinga cyatangiye gushyirwa mu bikorwa mu mwaka wa 2018 ku bufatanye bwa RDB na Minisiteri y’Ingabo.

Umuyobozi w’Ishami ry’Ubukerarugendo muri RDB Belise Kariza, yagize ati: “Kubungabunga amasite y’ubukerarugendo abumbatiye amateka yo kubohora u Rwanda ni ingirakamaro, haba ku Banyarwanda n’abanyamahanga. Ibi bizafasha kwinjiriza abayaturiye, by’umwihariko abafashije ingabo zari ku rugamba rwo kubohora u Rwanda.”

Intego nyamukuru ni iyo kumenyekanisha umuco, umurage n’amateka by’u Rwanda, kongerera ingufu ubukerarugendo bw’imbere mu Gihugu ndetse no guteza imbere uburezi n’imyidagaduro ku rubyiruko rw’ejo hazaza, bijyana no guhanga isoko nshya y’amadovize akomoka ku bukerarugendo.

Biteganyijwe ko igihe amasite azaba amaze kuzura, azagira uruhare rukomeye mu guhaza isoko ry’ubukerarugendo bushingiye kumateka, umurage n’umuco, usanga rikunzwe cyane mu ruhando mpuzamahanga.

RDB yamaze gutangiza ikoranabuhanga rihuza ayo mateka, binyuze muri “application” yiswe “Dubbed Liberation History Tourism Trail” irimo amakuru y’ahantu nyaburanga habumbatiye amateka y’urugamba rwo kwibohora. Iyo application igaragaza n’ibindi byinshi byafasha mukerargendo nk’amahoteri yegereye site z’ubukerarugendo, aho yabona ubufasha bw’ubuvuzi n’ibindi byinshi.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.