20°C , Intermittent clouds | Kigali-Rwanda

Amateka ya Sangwe  wagaragaje ko afite impano muri Basketball

Yanditswe na BUGINGO FIDELE

Ku ya 28-09-2019 saa 19:14:51
Mu mwaka w’imikino utaha wa 2019-2020, Sangwe Armel azakinira ikipe ya APR BBC

Sangwe Armel  ni umwe mu bakinnyi bakiri bato  bagaragaza ko bafite impano mu mukino wa Basketball.

Uyu mukinnyi w’imyaka 20 y’amavuko yari amaze imyaka 3 akinira ikipe ya Espoir BBC ariko kuva  tariki 27 Nzeri 2019 ni umukinnyi w’ikipe ya APR BBC aho azayikinira umwaka w’imikino utaha wa 2019-2020.

Mu kiganiro kihariye Imvaho Nshya yagiranye na Sangwe Armel  yagize byinshi ahishura ku buzima bwe n’uko yatangiye gukina umukino wa Basketball ndetse n’intego  ze.

SANGWE YAVUKIYE I BURUNDI

Sangwe Armel yavukiye i Bujumbura  mu murwa mukuru w’igihugu cy’u Burundi ahitwa Jabe. Yabonye izuba tariki 15 Mata 1999. Sangwe Armel ni umuhererezi mu bana 4 ba  Kabura Bernard na Nsabiyumva Christine. Se umubyara akaba ari Umunyarwanda naho Mama we akaba ari Umurundi.

Amashuri abanza, Sangwe yayigiye muri EP  St  Gabriel ahitwa  Rohero  mu mujyi wa Bujumbura nyuma akomereza mu Buyenzi muri CPBU  aho yavuye aza mu Rwanda.

UKO YAJE MU RWANDA

Sangwe Armel  avuga ko yageze mu Rwanda muri 2015 akomereza amasomo mu ishuri rikuru rya College St Marie Reine Kabgayi mu Karere ka Muhanga.  Nyuma Sangwe yagiye kwiga muri AP Rugunga (2017 na 2018) ubu arimo kwiga umwaka wa nyuma  muri Lycee de Kigali  mu ishami ry’imibare, Ubukungu n’Ubumenyi bw’Isi « MEG » atuye i Nyamirambo.

SANGWE YAKUNZE BASKETBALL KUBERA MUKURU WE

Sangwe Armel avuga ko  akiri muto yajyanaga ku kibuga  na mukuru we yakinaga mu kiciro cya mbere muri Mutanga United bituma akunda umukino wa Basketball na we atangira gukina. Muri 2014 yakinnye mu kiciro cya mbere muri Gymkhana.

Muri 2015 ni bwo Sangwe yaje mu Rwanda ajya kwiga muri College St Marie Reine aho yakinnye imikino ihuza amashuri.

Yagize ati: “Uwari umutoza w’ikipe y’igihugu, Mutokambali yarambonye abona mfite impano  aramfasha  ngo nze kwiga i Kigali nkine no mu ikipe yamfasha kuzamura urwego rwange.”

SANGWE YAHISEMO GUKINIRA ESPOIR BBC

Akigera muri Kigali yari afite amahitamo yo kujya mu makipe abiri ari yo Patriots BBC na Espoir BBC gusa yahisemo Espoir BBC.

Sangwe yagize ati : «Nakoze  imyitozo muri Patriots BBC mbona hari abakinnyi benshi bakuze kandi nzi ndavuga nti nta bwo nzabona umwanya  uhagije  wo gukina mbona muri Espoir BBC  nabasha kubona umwanya wo kwigaragaza. »

Avuga ko atari ugutinya guhanganira umwanya muri Patriots BBC ahubwo ko iyo umukinnyi akiri muto hari byinshi aba agomba kubanza kwiga. Yagize ati : «Nta bwo byari ugutinya ahubwo iyo ukiri muto hari ibyo uba utaramenya, naravuze nti reka mbanze nge muri Espoir BBC  ndebe uko shampiyona imeze hanyuma nzerekeze ahandi nyuma.»

MURI ESPOIR BBC, SANGWE YAKIRIWE NEZA

Sangwe avuga ko muri Espoir BBC yakiriwe neza mbese afatwa nk’umwana  mu muryango.

Yakomeje avuga ko yari yashyizwe mu ikipe y’igihugu y’abatarengeje imyaka 18 yagombaga gukina imikino  y’Afurika   yabereye mu Rwanda ariko icyo gihe nta byangombwa yari afite bimwemerera gukinira u Rwanda.

Yagize ati : « Abakinnyi benshi twari kumwe muri U-18 ni bo twajyanye muri Espoir BBC ba Nshobozwabyosenumukiza, Furaha n’abandi  aho Perezida Rutagarama Fidele  yatwakiriye atubwira  ko muri Espoir BBC ari nko mu rugo ko nihagira icyo  tuzabura tuzamubwira nta kibazo.»

Mu gihe  Sangwe Armel  yari amaze muri Espoir BBC yagaragaje ko ari umukinnyi ufite impano idasanzwe mu mukino wa Basketball.

Muri shampiyona ya 2017-2018, ikipe ya Espoir BBC yatsinze REG BBC amanota 100 kuri 77 muri uyu mukino, Sangwe Armel yarigaragaje cyane kuko yatsinze amanota 3 inshuro 11 birangira asoje umukino ari we uyoboye abatsinze amanota menshi 35. Umukino wabaye muri Mutarama 2018. Yagize ati : « Kiriya gihe narishimye cyane gusa byampaye imbaraga zo gukomeza gukora cyane.»

Umukino Espoir BBC yatsinzemo REG BBC amanota 100 kuri 77, Sangwe Armel (ufite umupira) agatsinda wenyine amanota 35

Nyuma y’igihe gito, Sangwe Armel yakoze amateka aca agahigo ko gutsinda amanota menshi (40) mu mukino umwe aho Espoir BBC yatsinze UGB amanota 95 kuri 78, umukino wabaye tariki 27 Mata 2018.

Si iyi mikino yigaragajemo gusa kuko hari n’indi yagiye afasha  Espoir BBC kwitwara neza harimo uwo yafashije Espoir BBC kwegukana igikombe cyo kwibuka mu makipe y’imbere mu gihugu itsinze REG BBC amanota 61 kuri 58.

Muri uyu mwaka wa 2018-2019, Sangwe  ni we watsinze amanota 3 inshuro nyinshi (46), ni uwa 3 mu batsinze amanota  menshi (376) ndetse ni uwa 3 mu batanze imipira yabyaye amanota (76) aho aba mbere ari Sagamba na Mugabe bakinira Patriots BBC (105).

SANGWE NGO YITEGUYE GUKINIRA IKIPE Y’U RWANDA

Kugeza ubu Sangwe Armel avuga nta kipe y’igihugu arakinira  yaba ikipe y’igihugu y’u Burundi cyangwa ikipe y’igihugu y’u Rwanda.

Yagize ati : «Mu minsi ishize  narebye  imikino y’igikombe k’Isi 2019, iyo ubonye umukinnyi arimo gukinira ikipe y’igihugu ke uba ubona ari byiza cyane kandi buri mukinnyi wese aba abyifuza. »

Yakomeje avuga ko afite ubwenegihugu bubiri ko yemerewe gukinira ikipe y’igihugu y’u Rwanda cyangwa u Burundi gusa kuko amaze kumenyera mu Rwanda yumva gukinira ikipe y’u Rwanda ari byo byamushimisha.

Sangwe avuga kugeza ubu batari bamuvugisha ariko ko bizaterwa n’uko azakomeza kwitwara kuko ibyangombwa byatumye adakinira ikipe y’u Rwanda muri 2016 ubu byabonetse nta kibazo.

AFITE INTEGO YO GUKINA HANZE Y’U RWANDA

Sangwe Armel atangaza ko yifuza gukina nk’uwabigize umwuga hanze y’u Rwanda nko muri shampiyona  yo muri Amerika “NBA” cyangwa ku Mugabane w’u Burayi. Ati : “Nta yindi nzira rero bizacamo ni uko ngomba gukora cyane nkigaragaza abantu bakambona.”

ARASHIMIRA MUTOKAMBALI NK’UMWE MU BAMUFASHIJE

Ku byo amaze kugeraho byose, Sangwe Armel ashimira cyane umutoza Mutokambali Moise  n’abandi bamufashije.

Ati : “Ndamushimira cyane  yaramfashije kuko yarambwiye ati ndabona ufite impano ngwino ukine, urumva icyo gihe yari umutoza w’ikipe y’igihugu ubwo rero umutoza w’ikipe y’igihugu akubwiye uko uhita wumva ko  hari icyo akubonamo.”

Sangwe kandi ashimira umutoza wa Espoir BBC, Mwiseneza Maxime ndetse n’ubuyobozi bwa Espoir BBC kuko bamufashije cyane mu bujyanama n’ibindi byatumye azamura urwego rw’imikinire.

Sangwe agira inama abana bakizamuka aho abasaba gukora bakumva ko bazagera kure nta gucika intege.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.