Kigali-Rwanda

Partly cloudy
21°C
 

Amateka ya Modric wahawe igihembo cy’umukinnyi w’umwaka wa 2018

Yanditswe na Nkomeje Guillaume

Ku ya 11-12-2018 saa 08:39:53
Luka Modric

Luka Modrić ukina hagati mu kibuga muri Real Madrid n’ikipe y’igihugu ya Croatia, ni we uherutse gutorwa nk’umukinnyi w’umupira w’amaguru mu bagabo witwaye neza ku Isi mu mwaka ushize w’imikino wa 2017-2018.

Modrić ufite imyaka 33 y’amavuko yashyikirijwe iki gihembo “Ballon d’Or 2018”, mu birori byabereye muri Grand Palais i Paris mu Bufaransa, tariki 03 Ukuboza 2018.

Uyu mukinnyi wari uherutse no guhabwa igihembo cy’umukinnyi mwiza w’umwaka (2017-18) gitangwa n’ishyirahamwe ry’umupira w’amaguru ku Isi, FIFA, “The Best men’s footballer 2018” yatsinze bagenzi be bari bahanganye barimo Cristiano Ronaldo ndetse na Lionel Messi bari baragihererekanye mu myaka 10 ishize.

Modrić waje ku mwanya wa mbere n’amanota 753 yakurikiwe na  Cristiano Ronaldo ukomoka muri Portugal n’amanota 478, umufaransa Antoine Griezmann ukinira Atlético Madrid    na 414, Kylian Mbappé ukinira PSG na 347, Lionel Messi (Argentina)         ukinira FC Barcelone na 280.

Umunya Misiri Mohamed Salah ukinira Liverpool ari nawe mukinnyi ukomoka muri Afurika waje hafi   ku mwanya wa 6 akaba yaragize n’amanota  188, Raphaël Varane ukinira Real Madrid na 121, Eden Hazard ukinira Chelsea na 119, Kevin De Bruyne ukinira Manchester City na 29 ndetse na Harry Kane ku mwanya wa 10 n’amanota 25.

Modrić guhabwa iki gihembo abikesha kuba yaragize ibihe byiza mu mwaka ushize w’imikino wa 2017-2018. Yatwaranye na Real Madrid igikombe cya UEFA Champions League ndetse abasha no gufasha ikipe y’igihugu ya Croatia kugera ku mukino wa nyuma w’igikombe k’Isi.

Nyuma yo guhabwa iki gihembo, Luka Modrić yagituye abakinnyi bose batagize amahirwe yo kugitwara mu myaka irenga 10, aho kihariwe na Messi na Ronaldo.

Yagize ati “Birashoboka ko mu gihe cyashize hari bamwe mu bakinnyi bakabaye baratwaye Ballon d’Or nka Xavi, Andres Iniesta cyangwa Wesley Sneijder ariko noneho ubu ngubu abantu barimo kureba undi muntu”.

Akomeza agira ati “Iki gihembo ngituye abakinnyi bose bishoboka ko bari bakwiye kugitsindira ariko ntibagitsindire. Kuri jye, uyu umwaka mu by’ukuri wabaye udasanzwe.Biragoye ko navuga mu magambo uko numva merewe mu mutima wange. Ni ikintu kidasanzwe kuri jye”.

LUKA MODRIC NI MUNTU KI ?

Amazina yose ni Luka Modrić. Yabonye izuba tariki 9 Nzeri 1985. Yavukiye mu gace ka Zadar muri Croatia. Avuka kuri se, Stipe Modrić ndetse na nyina, Radojka Modrić. Yashakanye na Vanja Bosnić muri Gicurasi 2010 bakaba bafitanye abana 3 barimo umuhungu 1 n’abakobwa 2.

Imfura ya Modrić na Vanja Bosnić y’umuhungu, Ivano yavutse tariki 6 Kamena 2010, akurikirwa na Ema wavutse tariki 25 Mata 2013 ndetse na Sofia wavutse tariki 2 Ukwakira  2017.

Modrić areshya na metero imwe na 72. Akina mu kibuga hagati  akaba yambara nimero 10 haba muri Real Madrid n’ikipe y’igihugu ya Croatia.

Luka Modric ubwo yishimiraga igihembo cya Ballon d’Or ya 2018 yari amaze kwegukana

INZIRA YANYUZEMO KUVA AKIRI MUTO KUGEZA AHO AGEZE UBU

Mu 2002, Luka Modrić yasinye muri Dinamo Zagreb ku myaka 16, ni nyuma y’uko yari yagaragaje ko afite kuba yavamo umukinnyi ukomeye, mu ikipe y’abato yo mu gace avukamo ya   Zadar (1996-2001).

Yaje gukomeza kuzamura imikinire ye muri Zagreb. Yazamuwe mu ikipe y’abakuru ayikinira kuva mu 2003 kugeza mu 2008. Gusa hagati aho yagiye atizwa mu makipe abiri ari yo Zrinjski Mostar (2003-2004) na Inter Zaprešić (2004-2005).

Mu mwaka wa mbere akinira Dinamo Zagreb (2005) yatwaranye nayo ibikombe 3 bya shampiyona ya Croatia ndetse n’ibindi bikombe bitandukanye bihatanirwa muri kiriya gihugu, binamuhesha igihembo cy’uwitwaye neza muri shampiyona mu 2017 « Prva HNL Player of the Year in 2007 ».

Mu 2008, yaje kwerekeza muri shampiyona y’u Bwongereza mu ikipe ya Tottenham, ku gahigo atanzweho agera kuri miliyoni 16 n’igice z’amapawundi.

Yafashije iyi kipe gukina amarushanwa ya UEFA Champions League (2010-2011), ku nshuro ya mbere nyuma y’imyaka hafi 50  itabasha kwitabira igera no muri ¼.

Mu myaka 4 (2008-2012), Modric yabaye muri Tottenham yakinnye imikino 159 mu marushanwa yose, ayitsindira ibitego 17.

Mu 2012, Modrić yasinye muri Real Madrid yo muri Espagne, atanzweho miliyoni 30 z’amapawundi, yaje kugira uruhare mu gufasha iyi kipe yatozwaga na Carlo Ancelotti kwegukana igikombe cya 10 cya UEFA Champions League « La Decima ».

Real Madric, imaze gufatwa na Zinedine Zidane, yongeye kuba ngenderwaho mu gutuma itwara iki gikombe inshuro 3 zikurikiranya (2015-2016 kugeza 2017-2018), muri izi nshuro, yanatorwaga mu ikipe y’umwaka y’iri rushanwa.

Mu bikombe yatwaranye na Real Madrid birimo; shampiyona, igikombe cy’umwami, ikiruta ibindi muri Espange inshuro 2, ibikombe 4 bya UEFA Champions League, ikiruta ibindi i Burayi inshuro 3 ndetse n’igikombe k’Isi cy’amakipe inshuro 3.

Modrić ni umwe mu bakinnyi bagiye bakinira ikipe y’igihugu kuva mu bato. Yakiniye ikipe y’igihugu y’abatarengeje imyaka 15 “U15” (2001), U 17 (2001), U18, (2003), U19 (2003-2004) ndetse na U21 (2004-2005).

Yatangiye gukinira ikipe y’igihugu nkuru mu 2006, mu mukino wahuje Croatia na Argentine. Modrić ufatwa nk’ikiragano cya kabiri cya zahabu, muri iki gihugu “Croatia’s second Golden Generation”, kuko yabashije kwitabira buri marushanwa akomeye bagiye babona itike yo gukina arimo; igikombe cy’u Burayi “Euro”mu 2008, 2012 na 2016, igikombe k’Isi cyo mu 2006, 2014 na 2018.

TUMWE MU DUHIGO YASHYIZEHO N’IBIHEMBO YAHAWE

Modric yahawe igihembo ku nshuro ya kabiri cy’umukinnyi mwiza ukina hagati muri shampiyona ya Espagne mu 2016 «  La Liga Best Midfielder”, ndetse ahabwa n’icya UEFA inshuro ebyiri « UEFA Club Football Award for Best Midfielder” mu 2017 na 2018.

Mu 2015, yabaye umukinnyi wa mbere w’umupira w’amaguru ukomoka muri Croitia, wagaragaye mu ikipe y’Isi ya FIFA « FIFA World XI”, yongera kubikora mu 2016 na 2017. Yaje no kugaragara mu ikipe y’umwaka ya UEFA “UEFA Team of the Year”, mu 2016 na 2017.

Mu 2018, Modrić yabaye umukinnyi wa mbere w’umupira w’amaguru ukomoka muri Croitia, wabashije kwegukana cy’umukinnyi mwiza w’umwaka gitangwa na UEFA, “UEFA Men’s Player of the Year Award”, ubwo yahabwaga igihembo cya “The Best FIFA Men’s Player and Ballon d’Or awards”, ndetse aba umukinnyi ubashije gutwara ibi bihembo atari Messi na Ronaldo, mu myaka irenga 10.

Modric yahawe guhabwa igihembo cy’umukinnyi mwiza w’iyi mikino y’igikombe k’Isi, amaze gutorwa nk’umukinnyi w’umupira w’amaguru mwiza  w’umwaka muri Croitia inshuro 6, akaba anganya na Davor Šuker wari ufite iki gihembo inshuro nyinshi.

Umwanditsi:

Nkomeje Guillaume

Tanga Igitekerezo

Email yanyu ntigaragazwa ku rubuga. Amazina na Email ni ngombwa.