25°C , Partly sunny | Kigali-Rwanda

Amateka ya Ciza Hussein uheruka guhabwa ubwenegihugu bw’u Rwanda

Yanditswe na BIZIMANA ERIC

Ku ya 07-05-2018 saa 08:29:33

Ciza Hussein ni umwe mu bakinnyi bane bakiniye ikipe y’igihugu y’umupira w’amaguru y’u Rwanda “Amavubi”  bahawe ubwenegihugu na Leta y’u Rwanda.

Ciza Hussein wishimiye guhabwa ubwenegihugu bw’u Rwanda kuko afite intego yo kongera gukinira ikipe y’u Rwanda

Muri 2014 u Rwanda rwasezerewe  mu mikino yo gushaka itike y’igikombe cy’Afurika “CAN 2015” ruzira gukinisha Agiti Taddy Etekeama ukomoka muri RDC  wari warabatijwe Birori Dady. Icyo gihe abakinyi bose b’abanyamahanga barimo n’abari bafite indangamuntu z’u Rwanda barazambuwe batangira gukina nk’abanyamahanga.

Ciza usanzwe ari kapiteni wa Mukura ni umwe mu banditse basaba ubwenegihugu, asabwa kuzana icyangombwa by’amavuko, icy’uko atafunzwe mu Burundi, icyangombwa cy’umuturage mwiza gitangwa n’umurenge wa Ngoma mu mugi wa Huye abamo. Yanatsinze ikizamini  cy’ubumenyi rusange ku Rwanda.

Uyu mukinnyi  wakiniye Amavubi mu 2013-2014, akaba akomoka ku babyeyi b’Abarundi yaganirije Imvaho Nshya urugendo rwe mu mupira w’amaguru  no mu buzimana busanzwe.

Umwirondoro we

Amazina ye ni Ciza Hussein. Rimwe na rimwe abantu bongeraho izina Mugabo ritanditse mu byangombwa bye, yahawe n’abakinnyi ba Mukura akigera mu Rwanda barikuye ku ijambo ry’Ikirundi yakundaga kuvuga kenshi rya ”Mugabo” rishaka kuvuga ngo ”ariko” mu kinyarwanda.

Yavukiye muri  Cibitoke mu majyaruguru ya Bujumbura i Burundi, tariki 11 Gicurasi 1995. Ariko yaje gukurira mu gace ka Bwiza, kavuga cyane Igiswahili cyane mu murwa mukuru Bujumbura.

Ni umwana w’imfura mu muryango w’abana babiri (we na mushiki we witwa Anna Djuma) ba Muhoza Pauline ufite inkomoko muri RDC  na nyakwigendera Ndikumana Djuma ukomoka mu Burundi  wapfuye muri  2006.

Yazamukiye mu makipe y’abana y’i Burundi

Ciza yatangiriye umupira  mu ikipe nto y’abana ya Etoile de Bwiza aho yakuriye afite imyaka 10, ahamara imyaka ibiri ajya mu ikipe yo mu kiciro cya gatatu ya papa wa nyakwigendera Ndikumana Hamadi Katauti wabaye umukinnyi w’ikirangirire mu Rwanda ahantu atigeze abona amahirwe yo gukina cyane kuko harimo abakinnyi bamurutaga  mu myaka banamurusha mu kibuga barimo na Kwizera Pierrot ukinira Rayon Sports.

Ati: “No kuza mu bakinnyi 18 byari bigoye, ahubwo haje indi kipe aho mu gace nge mbona ko nta mahirwe nzagira yo gukina muri ya kipe twitaga iya Katauti, mpitamo kujya muri iyo kipe yitwaga Dynamic, ari na yo yampaye amahirwe, ntagira kugira ubunararibonye, nkina gutyo nk’umukinnyi ubanza”.

Imyaka 5 muri Athletico, akinana n’abakinnyi bose baciye mu Rwanda

Ciza yamaze umwaka akinira Dynamic mbere yo kubengukwa na Atletico Olempike yo mu kiciro cya mbere yamusabye kuza gukora igeragezwa ari kumwe na Laudit Mavugo, rutahizamu wa Simba kuri ubu, biganagaga; binjirira rimwe muri iyi kipe yarimo abakinnyi bakomeye nka Kwizera Pierrot, Nahimana Claude n’abandi bahamusanze nka Gael Duhayindavyi na Ndayishimiye Christophe n’ubu bari kumwe i Huye.

Ati: “Nkigerayo mu mwaka wa mbere narakinnye kandi sinari mukuru, mbona amahirwe. Ibi ni na byo byamfashije guhamagarwa mu ikipe y’igihugu y’u Burundi  y’abatarengeje imyaka 17, tujya muri Sudani ndi kumwe na ba Laudit Mavugo, ba Amissi Cedrick”.

Mu myaka itanu yamaze muri Atletico, Ciza yatwaye igikombe cya shampiyona, ibikombe bibiri bya Perezida (bigereranywa n’igikombe k’igihugu) hamwe n’igikombe kiruta ibindi inshuro 2.

Mu mwaka we wa nyuma, Atletico yitabiriye CECAFA muri Tanzania itsinda Yanga ibitego 2-0, inganya na APR FC  0-0, basezererwa na AS Vita muri ¼ . Ibi byafunguriye umuryango abakinnyi bayo. Umutoza Kaze Cedrick ahita abona amasezerano yo gutoza Mukura.

Kaze yaje mu Rwanda mu mikino yo kwishyura y’umwaka w’imikino wa 2011-2012, atwara umwanya wa gatatu hamwe na Mukura. Mu mwaka wakurikiyeho yaguze Nahimana Claude na Ciza Hussein yatozaga muri Atletico kugira ngo bamufashe gutwara kimwe mu bikombe bikinirwa mu Rwanda.

Ciza ati: “Kaze ni umutoza wari unzi nkiri umwana.We yaje mu Rwanda mbere yange, ariko nange i Burundi nari mu bihe byiza, nanatorwa nk’umukinnyi wa kabiri mu bitwaye neza i Burundi; Kaze ni bwo yashatse umukinnyi ukina ibumoso wa LLB academic ntibyakunda kuko yari abonye amahirwe yo kujya i Burayi; ahita ambaza niba nakwemera kuza, ndamubwira  ngo nta kibazo maze Nizeyimana Olivier, Perezida wa Mukura araza turaganira, nza gutyo”.

Guhinduka kw’abakinnyi, impamvu yo kudatwara igikombe  kuri Mukura

Nubwo Mukura yari imaze kugura abakinnyi ba mbere beza i Burundi  byarangiye Kaze yirukanwe ku mpamvu z’umusaruro muke Mukura VS igarukira ku murongo igiye kumanuka mu kiciro cya kabiri.

Ciza Hussein asanga byaratewe no kuba hari abakinnyi beza barimo Gabriel Mugabo na Serugendo Arafat bari bamaze kuyivamo.

Ati:”Twe tuza twasanze ikipe imeze neza, ifite abakinnyi beza bayifashije kuza ku mwanya wa gatatu. Abo beza bahise batwarwa n’amakipe y’i Kigali.Twahuye n’ibibazo muri ba myugariro; hakanabura kwishyira hamwe kw’abakinnyi. Icyo gihe twe twari tuje tutaramenyera, dusanga harimo abakinnyi batazi neza agaciro k’ikipe bamwe bafite imyitwarire mibi y’ubusinzi”.

Mu myaka yose yakurikiyeho, Mukura yarangizaga ku mwanya wa munani n’uwa kenda usibye mu 2015-2016 aho iyi kipe yaje ku mwanya wa gatatu muri shampiyona. Ciza kuri ubu asanga kuba buri gihe umukinnyi mwiza aba agomba kugenda ari yo ntandaro yo kuba nta gikombe  bashobora gutwara.

Ati: “Nge maze imyaka myinshi muri Mukura, buri mwaka tubona abakinnyi bashya , hakabura umwanya wo kugira ngo abakinnyi bamenyane, bamenye ngo kanaka akina gutya. Reka nguhe urugero hari  igihe  twagize umwaka mwiza tuba aba gatatu, abakinnyi bari bazanywe na Kayiranga barimo Hakizimana Muhadjiri, Habimana Hussein, Niyonzima Ally, Celestin Ndayishimiye, iyo bahaguma tukarushaho kumenyana imyaka ibiri, itatu, twari kubona umusaruro. Kumenya ngo Ciza akina gutya  ntiwabimenya mu mezi abiri , atatu. Ibintu byo kuba uyu mwaka haje abakinnyi batandatu hakagenda abakinnyi 8, ntibyatuma utwara igikombe”.

Ciza asanga kandi kugira ngo batware igikombe hakwiye kwongerwa urukundo rw’ikipe ku bakinnyi, abatoza, abayobozi n’abakunzi. Abakinnyi bakabona ko bashyigikiwe na bo ariko bagashyira ku ruhande amafaranga kuko iyo umuntu yitwara neza aya mafaranga aza.

Kubona ubwenegihugu byongeye kumufungurira imiryango mu ikipe y’igihugu

Ciza wahamagawe mu ikipe y’igihugu yakinnye CECAFA muri  2013  avuga ko uburyo yakiriwe n’Abanyarwanda byatumye yiyemeza gukorera iki gihugu mu mpano afite.

Ati : ”Navukiye i Burundi, ni igihugu nzi neza, ariko nashimishijwe cyane n’ukuntu u Rwanda rumeze, ni ukuntu imitima y’Abanyarwanda imeze, ibintu nabonye mu Rwanda byatumye nifuza  gushaka gukorera igihugu nk’Umunyarwanda mu mpano mfite.”

Ciza waje gusaba ubwenegihugu mu nzira zemewe n’amategeko avuga ko agiye kongera guharanira kugaruka mu ikipe. Ati “Nsaba ubwenegihugu navugaga ko maze imyaka irenga itanu mu Rwanda kandi nahagiriye inshuti n’abavandimwe benshi, nababwiye ko nakunze iki gihugu kandi ko nanigeze kugikorera, kuri ubu nshaka no kuhubakira ubuzima. Kubona ubwenegihugu ni amahirwe kuko nakunze iki gihugu mu buryo mutakumva, ni amahirwe mu kazi kange.”

Yavuze ko afite intego yo kujya mu ikipe y’igihugu, agafasha Igihugu ke.

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.