Amajyaruguru: Aho magendu zinjirira hose ubu twarugariye twarakomeje – Mukanyarwaya

Yanditswe na Twizeyimana Fabrice

Ku ya 10-11-2019 saa 16:48:09
Umuyobozi w’urugaga rw’abikorera mu Ntara y’amajyaruguru Mukanyarwaya Donatha (Foto Twizeyimana F)

Umuyobozi w’urugaga rw’abikorera mu Ntara y’amajyaruguru Mukanyarwaya Donatha, avuga ko ku bufatanye n’Ikigo k’igihugu k’imisoro n’amahoro (RRA) bafashe ingamba zikarishye zo guhashya abinjiza ibicuruzwa mu gihugu mu buryo bwa magendu.

Mukanyarwaya avuga ko ibicuruzwa byinjira mu gihugu mu buryo bwa magendu bibangamira abacuruzi batanga umusoro binyuze mu mucyo, ndetse bigahombya igihugu muri rusange.

Avuga ko iki kibazo batakirebereye, ahubwo bafashe ingamba zirimo gushyiraho komite z’abikorera mu mirenge, zikurikirana ibikorwa byo guhashya abashobora kwinjiza ibicuruzwa mu gihugu badatanze umusoro wa Leta.

Yagize ati: “Ingamba twafashe ni ubufatanye n’ikigo k’igihugu k’imisoro n’amahoro, twarabutangiye ubu muri buri murenge hari komite y’abikorera, iyo komite iradufasha ikurikije ibintu bishobora kwinjira mu murenge wabo batazi ahantu byaturutse, kureba inyemezabuguzi noneho no ku marondo bakora kuko akenshi magendu zikunze kwinjira nijoro.

Ari ku mupaka, ari n’ahandi hose magendu zinjirira ubu twarugariye twarakomeje.Ahubwo na Guverineri yabikomojeho ko ikigo k’imisoro n’amahoro cyadufasha guhemba bariya bantu badufasha kurwanya magendu bagakora amashyirahamwe afatika kugira ngo barwanye iyo magendu kuko iyo magendu utayirwanyije waba wica ubucuruzi bwacu”.

Mukanyarwaya avuga ko uretse kuba ibicuruzwa bya magendu bidindiza ubukungu bw’igihugu, ngo bishobora no kugira ingaruka ku buzima bw’Abanyarwanda kuko akenshi ibyinjira usanga bitanujuje ubuziranenge.

Yakomeje agira ati “Magendu ntisora, magendu ishobora no kwangiza ubuzima bw’umuntu kuko ntibaba bafite ubuziranenge, ibyo byose rero turabyitwararika kandi twizera ko ubufatanye buzakomeza hagati yacu n’ikigo k’igihugu k’imisoro n’amahoro”.

Guverineri w’Intara y’Amajyaruguru Gatabazi Jean Marie Vianney avuga ko iyi Ntara ari yo ifite igice kinini gihana imbibe n’igihugu cya Uganda, ibi bigatuma hashobora no kwinjiriza magendu nyinshi irimo ibiribwa nk’akawunga, ibishyimbo, ibigori, amasaka, amavuta yo guteka n’ibindi birimo inzoga n’imitobe bikemangwa ubuziranenge.

Gatabazi avuga ko n’ubwo umupaka uhuza ibihugu byombi udafunze, ariko inzego z’umutekano mu Rwanda zikurikiranira hafi ibishobora kwinjira byose, ibi akaba ari byo byagabanyije igipimo cya magendu yinjira mu gihugu ivuye Uganda.

Yagize ati: “Umupaka wacu na Uganda nta bwo ufite bariyeri nta bwo ari umupaka uteye mu buryo wavuga ngo wabuza umuntu kwinjira, isaha iyo ari yo yose yakwinjira bitewe n’aho yinjiriye…..ariko inzego z’umutekano ziraharinze ku buryo zishobora kumenya abahinjiriye bose, ibyo byose biracunzwe ni byo byagabanyije igipimo cya magendu”.

Gatabazi avuga ko gukaza ingamba zo gukumira iyi magendu bizakomeza gushyirwamo imbaraga kuko uretse guhombya igihugu, haba hari n’impungenge ko hari ibyakwinjira bishobora kwangiza ubuzima bw’abantu kuko ubuziranenge bwabyo buba butizewe.

Yakomeje agira ati: “Hari ibinyobwa bivayo bikorwa n’inganda zabo bisanzwe nk’imitobe (juice) inzoga zo mu nganda zikoze mu buryo butarimo ubuziranenge ku buryo zishobora kwica ubuzima bw’abaturage.”

Yibukije ko magendu yangiza nyinshi, asaba abagifite agatima kayireharehera kuyigendera kure, kuko uwayifatiwemo ahura n’ibibazo biremereye, ku buryo ubukire bwihuse yashakaga bushobora kumugusha mu gihombo cy’ubuzima bwe bwose.

Ati: “Abagiye kubigura bose baba batanze Amafaranga, iyo bifashwe ari ibiyobyabwenge biratwikwa ibindi bikamenwa, ubwo si Amafaranga umuturage aba yatanze aba agiye se?

Ikindi gikomeye bano babyikorera bakabizana bakoresha urubyiruko mu mutwe warwo barwica, ariko ibyo binyobwa na byo iyo binyowe byica ubwenge bw’abaturage cyangwa bigateza umutekano muke….Ikindi kandi ibyo bicuruzwa baba bajya kuzana iyo urebye usanga na hano mu gihugu bihari bakagombye kubigura mu gihugu imbere bakinjiriza amafaranga abacuruzi b’imbere mu gihugu kandi bigatuma ubuhahirane hagati y’inganda n’abaturage burushaho kwiyongera”.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.