Kigali-Rwanda

Mostly cloudy
20°C
 

Amagare:Uwizeyimana yegukanye  shampiyona y’igihugu ya 2019

Yanditswe na BUGINGO FIDELE

Ku ya Jun 24, 2019

Abakuru (153.3km)

1. Uwizeyimana Bonaventure 3h39’40”

2. Ruberwa Jean 3h39’47”

3. Mugisha Moise 3h40’42”

Ingimbi (95,4km)                               

1. Gahemba Barnabe 2h24’34”

2. Hakizimana Felicien 2h24’43”

3. Uhiriwe Byiza Renus 2h25’23”

Abagore (95,4km)

1.Nzayisenga Valentine 2h33’07”

2.Mukashema Josiane 2h33’40”

3.Ishimwe Diane 2h34’30”

Uwizeyimana Bonaventure ukinira ikipe ya Benediction Excel Energy ni we wegukanye shampiyona y’igihugu  mu mukino wo gusiganwa ku magare muri uyu mwaka wa 2019 akaba ari inshuro ya kabiri  dore ko no muri 2016 ari we wayegukanye.

Shampiyona y’igihugu yabaye mu byiciro bibiri   aho tariki 22 Kamena 2019 habayeho gusiganwa n’isaha umukinnyi ku giti ke «Individual Time Trial ».

Mu kiciro cyo gusiganwa mu muhanda “Road Race”,  isiganwa ryabaye tariki 23 Kamena 2019. Mu bakinnyi bakuru n’abaterengeje imyaka 23  basiganwe intera ya kirometero 153,3 maze Uwizeyimana  aba uwa mbere akoresheje amasaha 3, 39 n’amasegonda 40.

Ku mwanya wa kabiri hari Ruberwa Jean (3h39’47”) naho Mugisha Moise  aba uwa gatatu (3h40’42”).

Muri iki kiciro, Uwizeyimana ni we wegukanye shampiyona y’igihugu mu bakuru “Men Elites” naho mu  batarengeje imyaka 23 yegukanwa na Ruberwa Jean.

Uwizeyimana nyuma yo kwegukana shampiyona ya 2019 yatangaje ko bitari byoroshye ariko bakoresheje imbaraga zabo zose kugira ngo bagumane shampiyona y’igihugu.

Ati: “ Ikipe yacu yagiye ku rwego mpuzamahanga  twagombaga rero gukora cyane tukisubiza iyi shampiyona  amanota akiyongera.”

Mu kiciro k’ingimbi “Men Juniors”, shampiyona y’igihugu ya 2019  yegukanwe na Gahemba Bernabe  ukinira Les Amis Sportifs y’i Rwamagana. Umwaka ushize yari yegukanwe na Habimana Jean Eric wagize ikibazo k’igare bigatuma asoreza ku mwanya wa 5.

Mu bagore “Women Elites” Nzayisenga Valentine ni we wegukanye shampiyona y’igihugu. Umwaka ushize wa 2018 yari yegukanywe na Nirere Xaverine uyu mwaka akaba atarakinnye kubera amasomo.

Hanatanzwe ibihembo ku makipe aho Benediction Excel Energy yihariye ibihembo mu bagore, mu bagabo bakuru n’abatarengeje imyaka 23 naho ikipe y’ingimbi yitwaye neza  iba Fly.

Perezida w’ishyirahamwe ry’umukino wo gusiganwa ku magare mu Rwanda “FERWACY’, Bayingana Aimable yatangaje ko muri rusange shampiyona yagenze neza kuko abakinnyi bagaragaje ko bafite imyitozo iri hejuru.

Shampiyona yahujwe no kwibuka

Muri Kamena buri mwaka  amashyirahamwe y’imikino itandukanye mu Rwanda ategura amarushanwa yo kwibuka abari mu muryango mugari wa siporo bazize Jenoside yakorewe Abatutsi mu 1994.

Muri iri rushanwa hakaba harabaye n’igikorwa cyo kuzirikana abari abayobozi, abakinnyi n’abandi bakundaga umukino wo gusiganwa ku magare bishwe muri Jenoside yakorewe Abatutsi mu 1994 aho mbere yo gutangira isiganwa bafashe umunota umwe wo kubibuka.

Abibukwa mu mukino w’amagare

Hari Gasinzigwa Edouard (Umukinnyi-Cinee Elmay), Gahutu Theophile (Umukinnyi – Cinee Elmay), Kayumba (Umukinnyi – Rwamagana), Kayibanda (Umukinnyi -Rwamagana) , Ariette (Umukinnyi – Gisenyi) , Musoni Francois (Umukinnyi – Butare) , Sakumi Anselme (Visi-Perezida wa FERWACY)  na Gasato (Umukanishi w’ikipe ya Butare.

Abegukanye shampiyona y’igihugu ya 2019, uhereye ibumoso ni Gahemba mu ngimbi, Nzayisenga mu bagore, Uwizeyimana mu bakuru na Ruberwa mu batarengeje imyaka 23 (Foto Bugingo F)

Mbere yo gutangira isiganwa ryo mu muhanda hafashwe umunota wo kwibuka (Foto Bugingo F)

Fly ni yo kipe yegukanye igihembo mu ngimbi (Foto Bugingo F)

Ikipe ya Benediction Excel Energy mu batarengeje imyaka 23 ni yo yabaye iya mbere (Foto Bugingo F)

Mu bakobwa, ikipe ya Benediction Excel Energy naho yegukanye umwanya wa mbere (Foto Bugingo F)

Mu kiciro cy’abakuru , Benediction Excel Energy yegukanye umwanya wa mbere (Foto Bugingo F)