29°C , Thunderstorms | Kigali-Rwanda

Amagare: Uwizeye yerekeje mu ikipe ya Pédale Pilotine muri Martinique

Yanditswe na BUGINGO FIDELE

Ku ya 07-10-2019 saa 10:27:39
Uwizeye Jean Claude werekeje mu ikipe ya Pédale Pilotine muri Martinique

Uwizeye Jean Claude wari umaze imyaka ibiri  akinira  ikipe ya  Les Sables Vendée CC yahoze yitwa Pays des Olonnes Cycliste Côte de Lumière mu Bufaransa yahiduye ikipe aho yamaze gusinya amasezerano y’umwaka umwe mu ikipe  ya Pédale Pilotine- Blue Car muri Martinique, ikirwa   cy’u Bufaransa.

Uyu mukinnyi wazamukiye mu ikipe ya Les Amis Sportis y’i Rwamagana yifujwe n’iyi kipe cyane nyuma yo kwegukana  isiganwa mpuzamahanga ryabereye Guyane “Tour de Guyane 2019”  ryatangiye kuva tariki 17 rigasozwa 25 Kanama 2019.

Aganira n’Imvaho Nshya, Uwizeye Jean Claude yavuze ko ari byo ubu yamaze guhindura ikipe. Ati: “Ni byo nahinduye ikipe ndetse namaze no gusinya amasezerano y’umwaka umwe aho nzakinira iyi kipe ya Pédale Pilotine mu mwaka wa 2020.”

Yakomeje avuga ko  nyuma yo kwegukana “Tour de Guyane 2019” amakipe menshi atandukanye yamwifuje ariko ahitamo ikipe  ya Pédale Pilotine kuko ari yo babashije kumvikana ikamuha ibyo yifuzaga.

Iyi kipe ikaba yakinirwaga n’abakinnyi  bakomoka muri Eritrea, Daniel Teklehaimanot  wegukanye Tour du Rwanda na shampiyona y’Afurika muri  2010   na Tesfom Okubamariam wegukanye shampiyona y’Afurika muri 2013 na 2016.

Uwizeye yashyize umukono ku masezerano   muri iyi kipe  tariki 07 Ukwakira 2019  nyuma y’isiganwa ry’umunsi umwe ryabereye mu Bufaransa “Tour de Vendée 2019” tariki 06 Ukwakira 2019 aho yasoreje ku mwanya wa 65 akaba ari nawe mukinnyi rukumbi w’ikipe y’u Rwanda wabashije gusoza muri 6 bari bitabiriye.

Mu myaka ibiri yari amaze mu ikipe ya Les Sables Vendée CC, Uwizeye arashimira cyane  Steven Laget, usanzwe ari umutoza we muri iyi kipe  wamufashije cyane kuko ari we watumye ajya ku mu Bufaransa gukina nk’uwabigize umwuga kuva umwaka ushize wa 2018.

Uwizeye Jean Claude ubwo yari kumwe n’ikipe muri Tour de Guyane 2019

Uwizeye ari kumwe n’umutoza we, Steven Laget nyuma yo kwegukana Tour de Guyane 2019

Ubwo Uwizeye Jean Claude yitabiraga shampiyona y’igihugu muri Kamena 2019

Uwizeye Jean Claude ubwo yakinaga isiganwa “Tour de Vendée 2019” ari naryo rya nyuma muri uyu mwaka wa 2019

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.