Kigali-Rwanda

Mostly cloudy
23°C
 

Amagare: Shampiyona y’igihugu iraba  mu mpera z’iki cyumweru

Yanditswe na BUGINGO FIDELE

Ku ya Jun 21, 2019

Mu mpera z’iki cyumweru, tariki 22-23 Kamena 2019 hateganyijwe shampiyona y’igihugu  mu mukino wo gusiganwa ku magare  mu  byiciro 2 birimo  gusiganwa n’igihe umukinnyi ku giti ke “Individual Time Trial” ndetse  no gusiganwa mu muhanda “Road race”.

Kuri uyu wa Gatandatu tariki 22 Kamena 2019, haraba gusiganwa n’igihe  umukinnyi ku giti ke “Individual Time Trial” aho  abasiganwa baza gukinira i Nyamata mu Karere ka Bugesera.

Biteganyijwe gusiganwa bitangira saa yine (10h00) aho mu kiciro  cy’abagore “Women Elite” basiganwa intera ya kilometero 25 (Nyamata-Mbyo-Nyamata). Mu kiciro k’ingimbi “Men Juniors” nabo barasiganwa iyi ntera naho mu bakuru n’abarengeje imyaka 23 mu bagabo “Men Elites &U-23”  basiganwa intera ya kilometero 41,8 (Nyamata-Ramiro-Nyamata).

Nyuma y’iki kiciro,  tariki 23 Kamena 2019 hazakinwa ikiciro cya gusiganwa mu muhanda “Road race”.

Mu ngimbi “Men Juniors” n’abagore “Women Elite” bazasiganwa intera ya kilometero 105,4 aho bazahagurukira kuri Sitade Amahoro saa tatu (09h00) bakomereze Prince House-Sonatube-Nyanza-Nyamata-Ramiro-Nyamata-Kicukiro-Sonatube-Chez Lando  basoreze kuri  Sitade Amahoro.

Mu bakuru “Men Elites &U-23” nabo bazakoresha iyi nzira ariko nibagera kuri Sitade Amahoro bagarutse  bazenguruka inshuro 3 inzira ya Sitade Amahoro-Kimironko-Kibagabaga Hospital-MTN-RDB-Airtel -Sitade Amahoro aho bazasoza bakoze intera ya kilometero 159,3.

Mugisha, Areruya na Uwizeye mu bashobora kwegukana shampiyona

Iyi shampiyona ya 2019 biteganyijwe ko yitabirwa n’abakinnyi baturutse mu makipe yose yemewe mu Rwanda uko ari 9 kongeraho abakinnyi 3 bakina ku mugane w’u Burayi banitezweho kuba bakwitwara neza.

Aba barimo Mugisha Samuel wegukanye Tour du Rwanda 2018 akaba akinira  ikipe ya Dimension Data for Qhubeka yo muri Afurika y’Epfo ariko ikaba ibarizwa mu Butaliyani. Hari kandi Areruya Joseph wegukanye Tour du Rwanda 2017  ukinira ikipe ya Delko Marseille mu Bufaransa  ndetse na Uwizeye Jean Claude ukinira  ikipe ya Sables Vendée  CC mu Bufaransa.

Abakinnyi bamaze kwegukana shampiyona  y’igihugu

Kuva 2010-2012, shampiyona y’igihugu yegukanwe na Niyonshuti Andrien , muri 2013, Gasore Hategeka ni we wegukanye iyi shampiyona anongera kuyegukana muri 2017. Muri 2014  yegukanwe na  Ndayisenga Valens, muri 2015 yegukanwa na  Biziyaremye Joseph, muri 2016 yegukanwe na  Uwizeyimana Bonaventure naho muri 2018 yegukanwa na Munyaneza Didier ukinira ikipe ya Benediction Excel Energy.

Muri aba bakinnyi bamaze kwegukana shampiyona abazitabira uyu mwaka wa 2019 ni Uwizeyimana Bonaventure na Munyaneza Didier bombi bakinira ikipe ya Benediction Excel Enery.

Uwegukanye shampiyona y’igihugu ahabwa umwambaro urimo ikirago k’igihugu  aho agomba kuwambara mu masiganwa yose yitabiriye ku rwego mpuzamahanga.

 

Uhereye ibumoso, Munyaneza Didier wegukanye shampiyona mu bakuru n’abatarengeje imyaka 23 muri 2018, Nirere Xaverine mu bakobwa na Habimana Jean Eric mu ngimbi

Ubwo Munyaneza Didier yegukanaga shampiyona y’igihugu ya 2018

Abegukanye shampiyona y’igihugu mu gusiganwa n’isaha umukinnyi ku giti ke “Individual Time Trial”, Uhiriwe Byiza Renus (ibumoso) mu ngimbi, Areruya (hagati) mu bakuru n’abatarengeje imyaka 23 na Tuyishimire Jacqueline (iburyo) mu bakobwa