17°C , Thunderstorms | Kigali-Rwanda

Amagare: Munyaneza Didier yegukanye intera ya “Kivu Race”

Yanditswe na Bugingo Fidèle

Ku ya 22-09-2019 saa 09:54:38
Munyaneza Didier wegukanye intera ya 4 ya Rwanda Cycling Cup 2019

Abakuru (150 km)

1.Munyaneza Didier 3h55’43”
2. Nsengiyumva Shemu 3h55’45”
3.Uhiriwe Byiza Renus 4h01’05”

Ingimbi (112.5 km)
1. Muhoza Eric 3h08’26”
2.Niyitegeka Omar 3h18’08”
3.Bikorimana Elysee 3h19’20”

Abakobwa (90 km)
1.Izerimana Olive 3h11’58”
2.Ishimwe Diane 3h12’10”
3.Tuyishimire Jacqueline 3h12’16”

Munyaneza Didier ukinira ikipe ya Benediction Excel Enery ni we wegukanye intera ya 4 ya Rwanda Cycling Cup 2019 yakiniwe mu mujyi wa Rubavu “Kivu Race” kuri uyu wa 21 Nzeri 2019.

Uyu mukinnyi ufite imyaka 21 akaba ari we wegukanye shampiyona y’igihugu umwaka ushize wa 2018 mu kuzenguruka inshuro 20 intera ya kirometero 7.5 yakoresheje amasaha 3, iminota 55 n’amasegonda 43. Ku mwanya wa kabiri haje Nsengiyumva Shemu wakoresheje amasaha 3, iminota 55 n’amasegonda 45 mu gihe ku mwanya wa 3 haje Uhiriwe Byiza Renus wakoreheje amasaha 4, umunota 1 n’amasegonda 5.

Nyuma yo kwegukana iyi ntera, Munyaneza Didier wari uhanganye cyane na Nsengiyumva Shemu ukinira ikipe ya Les Amis Sportifs y’i Rwamagana yatangaje ko  isiganwa ritari ryoroshye ariko yishimiye kuryegukana.

Muri iki kiciro cy’abakinnyi bakuru n’abaterengeje imyaka 23 hatangiye abakinnyi 39 ariko hasoza 15. Mugisha Samuel ukinira ikipe ya Dimension Data For Qhubeka yasoreje ku mwanya wa 6 akaba we na Uhiriwe Byiza Renus bagomba kwerekeza mu Bwongereza tariki 24 Nzeri 2019 bagiye kwitabira shampiyona y’Isi.

Muhoza yongeye kwegukana intera

Muhoza Eric ukinira ikipe ya Amis Sportifs y’i Rwamagana ni we wegukanye intera ya 4 ya Rwanda Cycling Cup 2019 ya “Kivu Race” mu kiciro k’ingimbi “Juniors” akaba ari nawe wari wegukanye intera iheruka ya “Rwamagana Circuit”.

Mu ntera ya kirometero 112.5, Muhoza yakoresheje amasaha 3, iminota 08 n’amasegonda 26 mu gihe ku mwanya wa kabiri haje Niyitegeka Omar nawe ukinira Amis Sportifs wakoresheje amasaha 3, iminota 18 n’amasegonda 8.

Ku mwanya wa 3 haje Bikorimana Elysee ukinira Benediction Excel Energy wakoresheje amasaha 3, iminota 19 n’amasegonda 20. Muri iki kiciro hatangiye abakinnyi 31 hasoza abakinnyi 5.

Mu bakobwa “Women Elites”, Izerimana Olive ukinira Benediction Excel Energy ni we wegukanye “Kivu race” aho muri kirometero 90 yakoresheje amasaha 3, iminota 11 n’amasegonda 58 mu gihe yakurikiwe n’abakinnyi bakinana ari bo Ishimwe Diane na Tuyishimire Jacqueline. Muri iki kiciro abakinnyi 14 ni bo batangiye isiganwa hasoza 8.

Rwanda Cycling Cup 2019 itegurwa n’ishyirahamwe ry’umukino wo gusiganwa ku magare mu Rwanda “FERWACY” ku bufatanye na Skol na Cogebanque, intera ya 5 izakinirwa i Huye “Huye Circuit” tariki 19 Ukwakira 2019.

Abakinnyi bose mbere yo gutangira isiganwa

Abakinnyi mu isiganwa

Aha bazengurukaga umujyi wa Rubavu

Muhoza Eric wabaye uwa mbere mu kiciro k’ingimbi

Izerimana Olive wegukanye isiganwa mu bakobwa

Mugisha Samuel na Uhiriwe Byiza Renus nyuma y’iri siganwa bagomba guserukira u Rwanda muri shampiyona y’Isi 2019 mu Bwongereza

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.