Amagare: Mugisha yishyuriye  mituweri abatishoboye 50

Yanditswe na BUGINGO FIDELE

Ku ya 25-08-2020 saa 13:12:02
Mugisha Samuel wishyuriye mituweri abaturage batishoboye 50 bo mu Murenge wa Mukamira

Mugisha Samuel usanzwe ari umukinnyi w’ikipe y’igihugu y’u Rwanda mu mukino wo gusiganwa ku magare yishyuriye ubwisungane mu kwivuza abaturage batishoboye bagera kuri 50 batuye mu Murenge wa Mukamira,  Akarere ka Nyabihu  mu Ntara y’Iburengerazuba.

Uyu mukinnyi ubusanzwe unavuka muri uyu Murenge wa Mukamira yatangarije Imvaho Nshya ko yagize iki gitekerezo nyuma yo kubona ko hari abantu badafite ubushobozi bwo kwitangira amafaranga y’ubwisungane mu kwivuza.

Ati : “ Nararebye ndavuga nti nubwo ntafite byinshi ariko nagerageza ngafasha  nk’abantu 50 nkabagurira mituweri  kugira ngo bage babona uko bivuza.”

Yakomeje avuga ko yagize iki gitekerezo akabanza  kubiganirizaho umubyeyi  we  nawe akamubwira ko ari  gitekerezo kiza. Nyuma rero ni bwo Mugisha Samuel yegereye ubuyobozi bw’Umurenge wa Mukamira abagezaho  iki kifuzo cyo gufasha abantu na bo barabyishimira  ndetse banashaka abatishoboye bababaye kurusha abandi kugira ngo bagenerwe ubufasha.

Muri rusange, Mugisha Samuel akaba yaratanze amafaranga agera ku bihumbi 150 y’u Rwanda  kugira ngo  aba baturage  babone mituweri.

Iki gikorwa yagikoze muri Nyakanga 2020 mbere yo kwerekeza mu Bufaransa mu ntangiriro za Kanama 2020 aho yagiye gukinira ikipe ya LMP-La Roche Vendée Cycling ibarizwa mu Burengerazuba bw’u Bufaransa mu Mujyi wa Nantes.

Umunyamabanga Nshingwabikorwa w’Umurenge wa Mukamira, Munyansengo Fred yatangarije Imvaho Nshya  ko iki gikorwa bakishimiye nk’ubuyobozi ndetse anasaba abafite ubushobozi gufasha abatishoboye.

Ati: “Buri wese  wagira ubushobozi  yafasha kuko turacyafite abaturage badafite ubushobozi bwinshi cyane muri iki gihe cya COVID-19, n’undi wese ufite ubushobozi n’ubumuntu nta bwo yabura icyo afasha.”

Munyansengo avuga ko kugeza ubu mu Murenge wa Mukamira, gutanga ubwisungane mu kwivuza muri uyu mwaka wa 2020-2021  bigeze ku kigero cya 80%.

Mugisha Samuel afite imyaka 22 y’amavuko akaba yaregukaye Tour du Rwanda 2018 yazamukiye mu ikipe ya Benediction y’i Rubavu, kuva muri 2017 kugeza  2019 akinira ikipe ya kabiri ya Dimension Data for Qhubeka ubu yahindutse NTT Pro Cycling yo muri Afurika y’Epfo ariko ikaba  ibarizwa mu Butaliyani.

Mugisha Samuel ari mu ikipe nshya ya LMP mu Bufaransa

Umwanditsi:

BUGINGO FIDELE

2 Comments on “Amagare: Mugisha yishyuriye  mituweri abatishoboye 50”

  1. Byiza cyane birashimishije kubwigitekerezo yagize nabandi barebereho buriwese abigire ibye gufasha nibyiza cyane bravoo

  2. Uwo musore yakoze igikorwa kiza cyane. Kandi siwe mukire kurusha abandi. Imana imuhe umugisha kandi isubize aho akuye. Bibere n’abandi urugero. Aho gusuzugura abakene ahubwo tubafashe.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.